¹ Yesu wenda mor'ou rw'e Miseituni. ² Iina itukire mu mukomakoma, wenda tu mo numba ya Ongo, ne beya bati kuriwe, wa'hana bo na nti warika. ³ ngi hakiya ebandiki n'ebafarisayo bamurishie mumina watingirwa nt'usingiranange. ⁴ Bamutereka munkati ne beya, bashisha Yesu: eMuhani, e mumina uno wakumanwa nt'usingiranange. ⁵ Musa, itukana ne myomba, watusiburenga ishura mumina wa buno na makoi: n'oongo weba buni? ⁶ Bebanga e kinwa 'ncho nti bamutea kinwa, bamushei mo nsomombo eina bamusongere. Iina Yesu wakiya wamarika mushuni, w'echa rwandiko ne murimba mu 'roto. ⁷ Busha esanga ukiri ushishirishange bo, wasimana n'iere bo: ingu usira bubi munkati ni'nu wabesi mubere murirekera e rikoi. ⁸ Wakia wamarika tu mushuni, w'echa tu e rwandiko habasirwa neroto. ⁹ Bakia bamorukira byebae, b'esiba mo mutima babuch'ihonoka uma uma, ibuchie mo bakakare iya mo bakekebakeke, Yesu wasiya wisine ne mumima wabesanga munkati nabo. ¹⁰ Wakiya wama simana, wasunga e mumina wamasiya wisine, Yesu wamushisha: ongo momina, e basongeri babe bari kuni? kusira ngu wa kukuker' ubansa? ¹¹ Wasubhie: kusira, e Mukota, na Yesu wamw'ire: nani hotu nti nakuker'ubansa: enda, ang'ikora tu bibi. ¹² Yesu w'ire tubo: ani nge chaka che chuo, ing' wantucha watabesi tuyo mu mwirimya, iina waabese na chaka che karamo. ¹³ Habusondori, e bafarisayo bamw'ire: ongwieberengi ongwesine, e binwa byabe nti eira. ¹⁴ Yesu wasubie bo: nakiro nebo bushwa ani sine e binwa by'ani eira, bushwa nos'inku kwasairenga ani nanku kwendange ani, eina banu, nti banu mosi nku kusaange ani nanku kwendange ani. ¹⁵ Banu mukerang'ubansa rwa mubi, ani ntangakere mwey'ubansa. ¹⁶ Na namakere myey'ubansa, erubansa rwani rw'eira, bushwa nti niri an'isine, eina tita ngu wantumanga uri hima n'ani. ¹⁷ Chatiranyiwa mu myomba yiinu mbu ekinwa cham'ebwa na bea babi nti eira, ¹⁸ N'ebange bushwa an'isine, na Tita ngu wantumanga w'ebange bushwa ani. ¹⁹ Bamushisha: Iso uri kuni? Yesu wasoka: nti banu munisi ari na tita mumunsibange, mumusibange na Tita. ²⁰ Yesu wabesanga webange e binwa bino na nt'uhanange mo numba ya Ongo, nt'warika mpi harikang'enku, na anga nangu wamutinge bushwa e ntambi yae nti nesi yeya. ²¹ Yesu w'ere tubo: n'enda rani, muunsondayo na muukwireyo mo bibi binu, mutukoch'iyo iya nku kwendange ani. ²² Mu'cha bayahudi beba: wi'shura yo, bushwa weba mbu mutukoche iya 'nku kwendange ani? ²³ Na w'erebo: banu ba hano ha'nsi, ani we kwiyo, baanu beya be chuo kino, ani nti we chuo kino. ²⁴ Ngy'asingwa nabw'ere mbu muukwireyo mu bibi binu, bushwa mumafundw'isimira mbi birimo ani, muukwireyo mu bibi binu. ²⁵ Ongo ngi nye? nti bamushishange. Yesu wasako bo nakubu'ere cho mu ntangiro. ²⁶ Niri na binwa biingi by'ibuere na by'ubansa kuri banu, iina ingu wantumanga w'eira, nanchi chorukiranga 'ni kuriwe, n'ebange cho mo chuo. ²⁷ nti borukira mbu w'ebange bushwa n'Ishe. ²⁸ Yesu w'ere kebo: mubeyo mumakukuma e Mwan' e mweya, ngi haakiyayo musiba mbu ani nginye, na ntangakiya kikayi bushwa n'ani 'sine eina n'ebange itukana nambi byanihananga tita. ²⁹ Ingu wan'tumanga uri hima n'ani, nt'warensiya an'isine, bushwa nikorange kinsi otu e byashimawe. ³⁰ Mor' ieba r'ae'mbo, bea bingi bamusimira ³¹ W'ere ebayahudi imbi babesa bamamusimira: mumarika mu binwa byani, nti ba'nu ntumwa s'ani mu ri'ira. ³² Muusiba yo eri'ira, n'eriira ra buruhuchi. ³³ Bamusako: bate ubuto rwa Aburahanu, na tutangabenga bakobe ba mweya, buni wamatushisha ongo mbu twaaruhuchiwayo? ³⁴ Mor'eira, n'ibw'irengi, kinsi ngu ukorange e bubi, mukobe we bubi. ³⁵ Ne mufuku watarikanga kir'otu mu numba, eina e mwana urikanga kir'otu mo numba. ³⁶ Kuba musike wa Ongo wamaburuhucha, muuruhuchiwayo rer'iira. ³⁷ N'osi mbu banu uanda rwa Aburahamu, eina banu musondange inchura, bushwa e binwa bhitangakime kumunda n'inu. ³⁸ Nibw'erengi mbi bya sunganga 'ni kwa Tita, banu mukorange mbi byorukira bhanu kwa iso winu. ³⁹ Bamusako: Tita wi'tu ngi Aburahamu. Yesu w;ere bo mumabengi bana ba Aburahamu, mumasungwangemo mikorere ya Aburahamu. ⁴⁰ Iina banu musondange inshura, ani ngu nibw'erengi eri'ira rorukirenga 'ni kuri Ongo Icha, Aburahamu nt'wakoranga cho. ⁴¹ Banu mukorange mikorere ya 'so bamusako: nti bate bana ba kihanga, turi na Tita uma, ngi Ongo. ⁴² Yesu w'erebo: Ongo wamabesengi iso, mumanchimange bushwa kwa Ongo ngi kwa sairenga 'ni na ngi kwendange ani, nti nariya mu rwa'ni an'isine, iwe ngw'antumanga. ⁴³ Bushwa nki mutungandukire? bushwa mutukochi iyorukira e kinwa ch'ani. ⁴⁴ Iso winu mushumbu, na banu musondange ibereresha ekarawa ka iso. Iwe muyeri wa beya itukire mu ntangiro,na watarikanga mor'eira, bushwa kumunda nawe kusira eira. wamabe uhusange, ntu'ebange mu bya kumunda nae, bushwa iwe mushukishuki, na iwe ngwabuta e bhushukishuki. ⁴⁵ Na ani,bushwa n'ebang'eira, mutungansimira. ⁴⁶ Inye ngw'ansingayo bushwa n'ebubi? Nam'eba eira,bushwa nki mufundw'insimira? ⁴⁷ Ingu wa Ongo, urukiranga e binwa bya Ongo, mutungorukira bhushwa nti bhanu bhea bha Ongo. ⁴⁸ Bayahudi bamusako: tutamu simirwa muri eba mbu Ongo musamaria n'oongo uri n'ishumbu? ⁴⁹ Yesu wasubya: n'sir'ishumbu, eina n'itundange Tita, na banu munendekanyange. ⁵⁰ Ntangasonda wi'me, kuri uma ng'usondange bo nang'uri ne rubansa. ⁵¹ Mor' eira, nibushishange, ingu waranga e kinwa, watakwiyo. ⁵² E bayahudi bamw'ere: hano twamasiba mbu ong'ori n'ishumbu, Iburahimu wakwire, n'ebatahwa nabo hotu, noong'webange: e mweya wamaramang'ekinwa chani watakwiyo. ⁵³ mbe ongo mukakare irenga tita Aburahamu, ngu wakwire? e batahwa nabo bakwire, ongo ngi nye ketu? ⁵⁴ Yesu wasako: namitata ani'sine e wime wani ntinti kikayi, Tita ngu ntatanga, ing'utikongi banumbu ngi Ongo winu. na nti banu mumusi, kuri ani, nimusi, na. ⁵⁵ nam'ebambu nti n'imusi, nti nenda kabususa, nti nabe mushukishuki. eina nimusi na naranga n'ekinwa chae. ⁵⁶ Iso, Aburahamu, waminanga n'esa ngoa muri'rukira mbu waasunga e rotu rwani, na wasunganga, wamoa. ⁵⁷ Bayahudi bamwere: utungarumisha neki myaka makumi asanu, usunganga Abrahamu kuni? ⁵⁸ Yesu w'erebo: muriira,muriira,nibw'erengi, Abrahamu ntinti nensi wabutwa ani nti niriko. ⁵⁹ kubusondori naha, basombo makoi bamurekere, eina Yesu w'ebisa, n'isaa mo numba ya Ongo.