1 Namabwire e bhinwa mbi, bhushwa kiro byabhese kuri bhanu ntangiro ya kweshina. 2 Bhasebhuhensayo mo masinangoki; ne ntabi yeya Nampo bhea bhingi bhasebhushura, nti bhanikirange mbu bhakorengi Ongo. 3 Na bhasekora mbyo, Bhushwa nti bhasi Tita na nti bhanisi. 4 Namabwire e bhinwa mbi, kongo e ntambi isekiya yeya, mubhesi n'esubhukiya, mbu na bwerenga byo. Nti nabwerenga byo itikure mu ntangiro bhushe nti nikiri hima n' inu. 5 Ani nakuruka e kwa sairenga'ni, na anga n'uma wa nchisha: Kuni kwendange ongo? 6 Ina bhushwa narekind' ebwire, e mitima inu yarisa bhonso. 7 Na bwere e riira hano, rarengekana nendi bhushwe kubha nti nenda, e mubhongibhongi nt'uteyi e kuri bhanu, ina namenda, nti nabhurebheka e. 8 Wasekiya wameya, waahim'echuo mo by'ebhubhi, mor'eira n'er'ikera mansa. 9 Mo byakae bhubhi, bhushwa nti bharinsimira; 10 E riira, bhushwa nenda kwa Tita, na mutunsungi tu. 11 Erikera e mansa, bushwa e mubhake wa kino chuo wamakindi 'kererwa obansa. 12 Nikiri na bhinwa bingi by'ebwire, ina neki mutumuria byo mukano kashangi. 13 E Mubhonganyi wakii wamiya, e mutima wereira usebwenjayo muriira e riti, bhushwa utebhiyo mwiwe wesine, ina usebhayo e bhiti biserukirayowe, wasebhutureyo e bhisiya. 14 Use nitatayo, hbushwa usetingeyo e bhiri kuriani, na wabhutureyo byo. 15 E bhiti bhiri na Tita, byani ngi chasingwa watinge e bhiri kumunda nani, na wabhutureyo byo. 16 Ntambi nkeke, mutunsungi, na ntambi nkeke tu mukunsunga, bhushwa nenda kuri Tita. 17 Himpo bhima musantumwa, bhashishana: inchi chebha bhuni e kitushisange we: mukantambi kakeke, mukunsunga na muka ntambi kakeke mutunsungi bhushwa nendange kuri Tita? 18 Bhebha bhuno: webhange nki 'ngu: kampe kantambi nti tusi e byebhange we. 19 Yesu wateerera mbu bhasondange imushisha, na weerebho: bhanu mweshishirishange ebyam'ebha'ni kashangi kakeke mutunsungi, kashangi kakeke tu mukunsunga. 20 Muriira,nibwerengi, mukureyo na mukweshishirisha, ne chuo nti kimoange: mukurikayo mu bhonso, ina e bhonso bwinu bwabhunduke ngoa. 21 E momina, e ntambi yeritangirwae ntwa tingirwa na bhonso, bhushwa e ntambi yae yiya ye roku, ina e ntambi yabhuta we, nt'utanikiri tu e bwae bhushwa bw'esangoa s'erubhuta mwana mo chuo. 22 Na bhanu enompena, murisere bhonso, na nsebhukuruke ne mitima y'inu yaarisa ngoa, na kusira wabhunyakayo e sangoa sinu. 23 Er'otu ndo, mutushishirishiyo tu. muriira, nibwerengi, ekisehemayo bhanu kuri Tita wabuninkayo cho murina rani. 24 Iya mo kashangi kano, mutungahemanga kikai murina rani. Muheme na mukuninkwa, kongo e ngoa sinu sakomenwa. 25 Nakubwerenga e bhinwa mbi mu mishumo. E ntambi iseya, ntabweriyo tu mu mishimo, ina nabw'ireyo shushu bhushwa na Tita. 26 Er'otu ndo, mukuhemayo mo rina rani na ntangabwere mbu naahemayo tita bhushwa n'inu. 27 Bhushwe Tita wesine wabhushima, bhushwa murinishima, na muresimira mbu natukanga kuri Ongo. 28 Natukanga kuri tita, na neyanga mo chuo, natuka mo chuo, nenda kwa Tita. 29 E santumwa sae sa mushisha: hano rero webhashu, na utungebha mu mishumo. 30 Twasibha kwe mbu ongosi e bhinwa bhiti na nturaa mu mweya wakushishe. Chasingwa twasimira mbu usairenga kwa Tita ongo. 31 Yesu wasubhie bho: musimira kwe. 32 Sunga e santambi siya, na samakindi iya mukusansabhanayo kinsi mwea wendi rwae, na mukunsiayo wisine, ina nti niri ani sine, bhushwa Tita uri hima nani. 33 Nakubwire e bhinwa bhino, bhushwa kongo mubhesa na bhuhoro kuri ani. mukurungutanyiwa mo chuo; eina mubhesi na muho, namahima echuo.