¹ Ani nge musabhibhu weriira,na Tita nge muhingi.Kinsi utabhi ruri kumunda naani rwamafundwa ibhuta byuma nt'wakeraro na. ² Kinsi utabhi ndu rubhutange byuma,ushekerengi ro kongo rwabhuta tu nguru. ³ Mumakind'ishuururwa,bhushwa ne kinwa charebw' ire' ani. ⁴ Murike kumunda nani,nani kumunda n'iinu,Erutabhi rutakochibhuta byuma rwesine rwamafund'irika kumunda ne musabhibhu. Nge bhumbo na bhanu mutukoche ibhuta mumafund'irika kumunda nani. ⁵ Ani nge musabhibhu,bhanu ntabhi Ing'warika kumunda nani naani naserika kumunda nae uuwo uri na byuma bhiingi,bhushwa utukoch'ikora kitikiti hasir'ani. ⁶ E mwea wamafund'irika kumunda nani,ntwatawa hambuka,bhuri ntabhi na ntwakama na ntyasomborwa entabhi njo,n'itawa mo kasha na yatinda. ⁷ Mumarika kumunda nani,ne bhinwa byani bhiri kumunda ninu,muhema e byashima bhanu,nambyo muuninkwa byo. ⁸ Kuti muba na byuma bhingi,na nge bhumbo Tita ntwatatwa,na ntimuba ntumwa sani. ⁹ Itukana ne bwanshima Tita,nani naribhushima na murike n'enchimi yani. ¹⁰ Kubha mubhika e myomba yani,murika mo nchimi yani,na bhumbo e bwabhika ani e myomba ya Tita ne bwarik'ani munchimi yae. ¹¹ Naribwere e bhinwa mbi bhushwa e rimoa rani ribhe ninu,nerimoa rinu rikomenwe. ¹² Ngi himpo e myomba yani: mushimane, e bwabhushimanga ani. ¹³ Hasira nchimi nkiri bhuri ininkana e bhuingo bwabhe mo bhira bhabhe. ¹⁴ Bhanu bhira bhani,kuti mukora e bhibhuhemange ani. ¹⁵ Ntabhubhikiri yo tu mbu bhanu bhakobhe,bhushwa e mukobhe nt'osi e bhikiange e muhani wae: Ina naribhubhikira mbu bhaanu bhira bhaani,bhushwa naribhuhana e bhiti bya hanisiwang'ani na Tita. ¹⁶ Nti bhanu ngi munirondoranga;ina ani,ngi nabhurondoranga na nabhutereka,bhushwa mwendi na mubhute byuma,ne byuma bhinu bhisungwe e matuati,ne bhisehema bhanu kuri Tita murina rani nti wabhuninka byo. ¹⁷ Echabhuhema 'ni ani,nty'eshimana bhaanu bhisine na bhisine. ¹⁸ E chuo chabhubhaa,musibhiriranga mbu chakumbaanga kubhusondori ninu. ¹⁹ Mumubhesange bhe chuo,e chuo chamubhushimange inchi kiri kumunda nae,bhushwe nti mubhesanga bhe chuo na nabhurondoranga munkati ne chuo,bhushwe nancho e chuo chabhubhaa. ²⁰ Mwesubhukianga ne kinwa e chabw'irenga 'ni: e mukobhe nti mukiri irenga e muhani wae. E bwaninubya bho,bhaabhunubya na bhanu,bhamabhe nti bhareranga e bhinwa byani bharangayo ne bhinu. ²¹ Ina bhasebukoreyo e bhiti mbi,bhushwa bwe rina rani,bhushwa nti bhasingu warentuma. ²² Ntamweyange na ntamwebhange nabho. Bhatamubhesengi na bhubhi: ina bhasira nsomombo bhushe bwe bhubhi bwabho. ²³ Ung'wantina,watina na Tita. ²⁴ Kubha ntamukorange bhishisharo munkati nabho, hasira umpe wamukorabyo,bhatamubhange na, bhubhi,ina bharisunga byo,na bhantina ani na Tita. ²⁵ Inambyo byeya bhushwa e kinwa cha Ongo kibherereshwe;e chatiranyiwa mo myomba yabho; bharentinire bhusa. ²⁶ E rotu rweyayo e mubhonganyi,e usebhurebhekayo ani ituka kwa Tita,e mutima we reira,usebhesayo kariho kani. ²⁷ Na bhanu nabho,hotu mukubhesayo kariho bhushwa mukubhesanga na 'ni itukire mo ntangiro.