¹ E bhanakitu, ensimiro y'inu kuri Nyerekuritu Yesu Kirisitu kiro yabhesa ya karondori mo bhea. ² Bhushwa wamakime munkati enkumanano y'inu, numbara muriga wabehe na nchangi sahunda, emusene wakime na nchangi sa mikonsi, ³ Na mumarika bhanu mukaengi 'ngo ewambara shu, Nimushisha rikampo hahunda, Nishisha emusene, simana hiha hari rika mu bhisando byani! ⁴ Bhuni nti murondora bhanu bh'esine, nti mw'ikere obhansa iyetire myanikiri yema? ⁵ Morukire bhanakitu, Ongo nt'warondorang' ebhasene mo chuo bhabhesi bhasoki mo nsimiro, bhabhesi bhis'emwandu w'ebhubhake bwaninkanga we ebhamushima? ⁶ Na bhanu mumanena ebhasene! Ebhasoki nti ngi bhabhunubyange n'ebhutereka mu mansa? ⁷ Mbeni nti ebhasoki ngi bhasimyang' emina inu ahunda? ⁸ Mumarengekenya e myomba ye bhubhake imbu bwatiranyiwa yo mo mitiro: ushimanga munakitu bhuri ongo wesine nt'uronja 'shu. ⁹ Ina mumorondor'ebhea nti muronja bhibhi nikererwa obhansa ne myomba mwibhese bhabhi ¹⁰ Bhushwa kira mweya uti uti wasimira e myomba nawamasitara mukinwa kima nti wamanoa e myomba iti. ¹¹ Bhushwa Ongo ng'webhanga angi kora osingirwa. Na angi shura: kubha nti ukora osingirwa ari umashura nt'umanoa e myomba ya Ongo. ¹² Mw'ebhe n'ikora bhuri bheya bhakererwa mansa mu myomba. ¹³ Bhushwa erubhansa rusira bhonso mungo wa tangasunga bhonso. E bhonso bhusungwang'erotu rw'er'obhansa. ¹⁴ E bhanakitu rahunda bhuni mweya iyebha mbu wasimira na usira mikorere yakonda? Er'isimira rae ramumoshukaya? ¹⁵ Kubha munakitu wabhume ari munakitu momina ntwambara nchangi n'eruka biyo by'ekir'otu, ¹⁶ Ne mweya wa kurwabho wamushisha, mwendi rinu mu bhuhoro mkutu kasha nisukuta. na nti wabhuninka echaraisha, incho chasake mu 'nki? ¹⁷ Bhubhobhubho n'erisimira ramaba risira mikorere nti ramakwa kumunda naro resine. ¹⁸ Ina emweya wamebha oongo 'ri ne risimira nani niri ne mikorere. Nishee erisimira rabe anga mikorere, n'ani nakuhana er'isimira r'ani mo mikorere y'ani. ¹⁹ Usimira mbu Ongo uma, umakora 'shu ebashumbu hotu nabo bhasimira ncho n'ititimane. ²⁰ Ongo 'sondi siba ongo mweya bhusabhusa mbw'ensimiro isira mikorere yabhusa? ²¹ Bhuni tita witu Ibrahimu nt'wansirwanga isimira mu mikorere, warekia wamasibhura Isake musike we h'irango? ²² Usunga erisimira rakora murimo hima ne mikorere yae na bhushwa erisimira rira rasimananga munse ye mikorere yae. ²³ E mikorere yabherereshiwa bwebhanga: Ibrahimu yo: Wasimiranga Ongo, Chamwansire ibhesa w'eira, wabhikirwa mbu mira wa Ongo. ²⁴ Musunga kwe mbu e mweya wansirwang' eira mo mikorere na nti mo nsimiro y'esine ho. ²⁵ Bhubhobhubho na Rahabe, ekihanga, nae bhuni! nti wansirwang'emikorere, warekia wamakoke esantumwa muriechie bho mu impe 'nse? wakuto bho ekubhutara? ²⁶ Kubha emubhi usira mutima ntiwamakwa. Bhubho bhubho ne risimira anga mikorere nti ra makwa.