¹ Yakobo ntumwa ya Ongo,na ye mwami Yesu Kirisitu, enkerei sani mo nganda ekumi na sibhi esansansabhana. Nabhukeya. ² Bhanakitu musibhe mbu imoa rikiri mo myereko y'etange mo bhanu, ³ Musibhe mbw'e myereko yetange mo bhanu ibhutanga muho we mutima. ⁴ Eina rakomenwa e muho ukore murimo wae, kongo warisha bhunkangwe mo mitima, ikomenwa mutubhesingi bhatetera mu kikai. ⁵ Kuti munkati ninu uma wamaruka bwenge wahemebho kwa Ongo wamuninke bho, hasira efinirwa mumbo bhati bhamuhemange na Ongo waninka bho. ⁶ Ina waheme hima nisimira, hasira mitikotiko, bhushwa ing'utikatikange wasusanyiwa na mibhimbi ya nyansa irianyiwange na keme na kwikaso inku nanku. ⁷ Nti bhura mbwe mwea ngo kiro waanikira mbu waaninkwa kikai kuri Ongo, ⁸ nti mwea witikatika mu sanse sae siti. ⁹ E musene mubhate washime e bhusene wae, ¹⁰ ne muhime wa tatwe mo runeno rwae bhushwe waseeta bhuri ntondo sa mirime. ¹¹ E mwishi wamasaka na chuka kingi nt'yakama, ne santondo ne bhukome we muti nti bwasira, ngi bhuri. E bhatumba bhaseeta mo mirimo yabho. ¹² Ngaa mo mweya 'ngo wesumya munkati e myereko,waninkwayo kembo ka karamo, kakia Nyerekuritu warae 'mbi bhamushima. ¹³ Anga mwea webha entambi y'erekwa we mbw' itukange kuri Ongo, bhushwa Ongo utamerekwa na bhubhi n'utakoch'iereka mwea. ¹⁴ Kinsi mweya werekwanga ne karawa kae wesine. Ngi kahusange bho niria bho kore na Ongo. ¹⁵ E karawa kamabhe kingi nti kabhuta bhubhi, ne bhubhi bwama bha bwingi nti bwabhuta oku. ¹⁶ Bhanakitu munkati na Yesu, kiro mwehusa. ¹⁷ Ne bhihembo bhiti e byahunda ne byahunda nguru bhitukange e kwiyo kuri Ongo we chaka, kumunda nae kusira mwerimya w'ebhundukana. ¹⁸ Waritubhuta etukana n'er'isasa rae, mo kinwa ch'er'eira kongo twabhesa ntangi mo bhabhumbwa bhae. ¹⁹ Musibhe shu bhanakitu, kinsi mweya wabhesi w'iyorukira tete, n'iebha mpompo, n'isubhuka r'ikeke. ²⁰ Bhushwa e mungo we mwan'emweya utangabhereresha er'eira ra Ongo. ²¹ Mumbyo murie ebhiti byema kumushi ninu, na kinsi bhususe bhuti bwa nkuse nitingirira mu bhurongu e kinwa chareriarwa kumunda ninu echamoshukay'emitima y'inu. ²² Musimire ebhinwa bya Ongo, anga mushire mor'iyorukira ho byo, mu kw'ehusa bhanu bhesine mu myanikiri y'ebhuhusa. ²³ Bhushwe mwea wamorukira ekinwa na wafundi ikeracho, nti uri bhuri mwea ukaengu ensusanya yae mu kiyowa. ²⁴ wamesisirisa mo kiyowa nti wenda, ina nti wobya tu ensusanya yae. ²⁵ Ina ing'usi e myomba ye reira nerika munkati nayo, myomba y'ihorokerwa n'ibhesa na muho, nti mworukiri na moobya, ina wakora byo, wakasanirwa mo murimo wae. ²⁶ Kubha mwea wamahaka mbu uri na Ongo na ntwahangisa e rwami rw'ae mu iyebha bhubhi, ungo nt'uhusang'emutima 'e waen'er'isimira rae nti ra manko. ²⁷ Ensimiro y'er'eira ne yashuururwa isira bhubhi kuri Ongo Tita, ngi yerisake esankubhi, ebashumbakari, mo minubho y'abho na k'wiranga ne bhibhi by'echuo.