¹ Sauro wabhesanga ntwasimira er'okurwa Setefano rotundo minubho yabhucha bhushe kwabhesa minubho mikiri y'erirameso na ku Yerusaremu; n'ebhati esiya e santumwa bhansanswa mo bhutaka bwa ku Yudea na ku Samaria. ² E bhea mbi bhashuuruwa bhataa Setafano, bhamukiere kiro kingi. ³ Sauro m'oharo rwae, wariany' erirameso, wakime mu manumba, wakura bhabhume na bhomina n' eriabho mo ngori. ⁴ Imbi bhansanswanga bhenda uharo mw' oharo bhatura emwasi wakonda w'ekinwa. ⁵ Firipo wahita ku Samaria, watura emwasi wa Kirisitu. ⁶ E bhea bhati bhorikirire ebhiti byebhanga Firipo, mor' iyorukira bho n'isunga etushingishiro twakianga we. ⁷ Bhusha ebhifasi byatuka mu bhingi bhari n'eshumbu, nti bhirengi mu murenge mukiri. Na bhea bhingi bhe rumboonsa ne sankata bharama. ⁸ Umoo rukiri rwabhesa mo rubhungu ndo. ⁹ Kwabhesanga eraroso mund' obhungu mwea uma mbu ngi Simoni, wironja mwea waraisha, Wabhesanga ukiyange bhuira n'ishishay' ebhea bhaku Samaria. ¹⁰ Bhati bhamwerukirire, itukire mukeke iya mo mukakare bhebha: Ingu bhunkangwe bwa Ongo imbu bhubhikirwange mbu bhukiri. ¹¹ Bhamwerukirire bhushi washishayanga bho n'e mikorere y'ebhurori bwae matu mingi. ¹² Eina bhakia bamasimira Firipo, ntuturange e mwasi w'e bhubhake. ¹³ Firipo wesine wasimira na kuruma ner' irubhikwa, ntwasia tu Firipo, nt' usungange n' ebhishisharo mo tushingishiro n' ebhishiisharo bhibhesange: kuri Ongo, n' erina ra Yesu Kirisitu, bhabhume na bhomina bharubhikwa. ¹⁴ Ne santumwa esabhesanga ku Yerusaremu, bhakia bhorukira mbu ku Samaria bhamasimira ekinwa cha Ongo, bharebheka bho Petero na Yohana. ¹⁵ Bhahita bhehie bhisa ku Samaria, bhaheme bho kongo bharisa Mutima wakonda. ¹⁶ Bhushe abhesenga utangasikenga anga n' uma mubho; abhesenga bhamarubhikwa ho mo rina ra Mukota Yesu. ¹⁷ Himpo Petero na Yohana bhatereka bho emine, na bharisa Mutima Wakonda. ¹⁸ Na Simoni wakia wamusung'e bhea bhamarubhikwa mo Mutima wakonda mo reriarwa emine ne santumwa, wasonda ininka bho bhehe, ¹⁹ Webha munininke nani e bhunkangwe mbu kinsi ngu useriere ani e minwe warubhikwe n'E mutima wakonda. ²⁰ Eina Petero wamwire: E bhehe byabhe bhirimine hima nabhe, bhushe ongo hakange mbwe ruhembo rwa Ongo rushekananga mu bhehe. ²¹ Nty' ongo kwengi muhango mukino kikai, bhushe emutima wabhe nt' watunganana mo makako a Ongo. ²² Siya e bhubhi bwabhe, hema Mukota kongo e mwanikire w'e mutima wabhe wasasirwa, amabhesa nti ramukocheka. ²³ Bhushe nakusunga munkati n'e bwae n'e bhubhi, ²⁴ Simoni wasubya: munihemi kuri Nyerekuritu bhanu bhesine kiro chanehiye na kima mumbi byameba bhanu. ²⁵ Bharekia bhamahea itura e kinwa cha Nyerekuritu, na kuruma n' erihana cho, Petero na Yohana bhakuruka ku Yerusaremu, bhaturange emwasi wakonda mu mbungu ningi sa bhisa ku Samaria. ²⁶ Ngashani ya Mukota yashisha Firipo, webha: Simana enda mu haro rwe kurembe, munse nji yahite ku Yerusaremu mo rienda ku Gasa: nayo bweru. ²⁷ Wasimana, wenda: kae Mwisa ku Etiopia ingusira ebyuma bye bhuume mukakare wa Kandake, mumbo waku Etiopia na murangi w'e bhehe byae ebhiti, wabhesenga utukange ku Yerusaremu kahema. ²⁸ Wabhesanga ntukurukange wamarika mo katibhita kae, ntukaengi mu rwandiko rwe mutahwa Isaya. ²⁹ E Mutima washisha Firipo: sheere kwihi n' ekatibhita 'nko. ³⁰ Firirpo wenda tete, na worukira mwisa ku Etiopia ntukaengi mu mitiro ye mutahwa Isaya. Wamushisha: ong' werikirange mbi ebhisisirisange ongo? ³¹ Wasako: namukocha buni na nsira ingu wamunihana? Wabikira Firipo wataya n'erika hima'ne. ³² Ne bhinwa byabhesanga bhinsonsomorangewe nge bhino: warierwanga bhuri mburi ya hankwiro na bhuri chana cha mburi ekikerwang' ebyosa byae n'angi iebha nae nti w' oborang' e bhunu bwae. ³³ Mo kwehicha kwae, erobhansa rwae rwabese. mbe nt'inye ngusetura yo emwasi werubhuto rwae? bhushe ebhuingo bwae bwakuturwa mo chuo. ³⁴ Ingusira e byuma bye bhuume washisha Firipo: nikuhemange, e mutahwa webhange bhushe bwanye: bhushe nawe wesine, kubha nti umpe mwea? ³⁵ Firipo wobhor'e bhunu bwae wabhucha mo mitiro iiya, wamuture e mwasi wakonda wa Yesu. ³⁶ Na nti bhendange mo munse bhiya hari mecha. Ingo mwea webha: kae emicha; kinwa nki chamusingwa ntarubhikwi? ³⁷ Firipo webha: umasimira mo mutima wabhe uti, ramukocheka. wasako webha: nasimira Yesu Kirisitu mbu Musike wa Ongo. ³⁸ Webha; simany' ekatibhita, Firipo n' ango mwea bhahita ebhabhi kumunda ne mecha, Firipo wamurubhika. ³⁹ Murituka mu mecha, e Mutima wa Mukota wocha Firipo, n' ango mwea ntwamusungatu. Wenda nti umoange. ⁴⁰ Firipo wasungwa ku Asoto, nanko ntwetange ntuturange emwasi wakonda mu sambungu siti setange mowe ku Kaisairia.