¹ E mukungu mukiri w'ebha: e bhinwa mbi mbenti eira? ² Setefano wasako: bhabhume bhanakitu na bhatita, mwerukire: E ongo weritatwa wasairenga Tita witu Ibrahimu, wabhesanga nturi ku Mesopotamia, nt'utangarikanga ku Harani Wamushisha. ³ Tuka mo Chuo chabhe, na mo kisasa chabhe, enda mo Chuo kisekushea ani. ⁴ Watuka mo chuo che Bakaldayo, warika ku Harani. watuka nko kuruma n'erikwa r' ishe. Ongo, wamuria mukino Chuo ekiri mo bhanu runotu. ⁵ Nanti wamuninka bhutaka kumunda nancho Chuo, anga n'ehamuriarw' e mwindi, eina wamuninka ndaani mbu usemuninkayo habhesi haae, hima ne robuto rwae kuruma nae na kiro abhesenga utangabhese na mwana. ⁶ Ongo webha bhuno: erobhuto rwae bhasebhesayo bheni mu Chuo cha bhampe bhea; nabho bhasekiayo bho bhakobe bhabho, n'ikore bho bhubhi mu bhindi mananye. ⁷ N'eroanda ndo erusekiayo bho bhakobhe, aningi n'sekereyo bho erobhansa, Ongo ngwebha. Na kuruma nampo bhasetukayo nabho bhasenikoreyo hano. ⁸ Kuruma Ongo waninka Iburahimu endani y' erotende; nampo Warekiya wamabhuta Isake, wamuriye kotende erotu rw' emunane, Isake, wabhuta Yakobo n' imuriy' ek' otende, na Yakobo e bhatita ekumi na bhabhi. ⁹ Bhatita bhakakare bhakwire Yosefu mono, bhamuchua mwienda ku Misiri, ¹⁰ Eina Ongo abhesenga uri hima nae, wamuranga mo minubho iti, wamuninka nshumo na mihake yakonda, bhusondori na Farao, mubhake wa ku Misiri, nae wamukia wabhesi mukakare wa ku Misiri hima ne numba yae iti. ¹¹ Rwaka rwiya mo chuo kiti cha ku Misiri hima na ku Kanani. E mario abhese makiri na bhatita bhitu bharukirwa bhiyo. ¹² Yakobo wakiya wamerukira mbu ku Misiri kuri bhiyo, raroso washisha bhatita bhitu mbu bhendi ko. ¹³ Moriya rabho re metabhi Yosefu wesibhisha kuri bhanachabho, na Farao wasibha ekisasa chae. ¹⁴ Yusufu washisha bho mbu, wabhikira Yakobo ishe na bhana chabho bhati, bhea makumi arinda na bhasanu. ¹⁵ Yakobo wenda ku Misiri, nanko wakwireko iwe na bhatita bhitu. ¹⁶ Bhariarwa ku Sekemu bhatawa murisinda rachuranga Ibrahimu kuri ebhana ba Hemora, ishe wa Sekemu. ¹⁷ Entambi yeya y'er'ibhererera endani yakianga Ongo kuri Iburahimu, nambo bhea bharira n' iyongerere ku Misiri. ¹⁸ Kwa saa umpe mubhake ingu nti usi Yosefu. ¹⁹ Ingo mubhake wakor' erubhuto rwitu bhubhi, nikora bhubhi kuri bhatita bhitu, Wakiya momba mbu ebhana bhabho bhendi bhatawange kiro bhabhesa ho. ²⁰ Mokirangancho Musa wabhutwa, nae nti mwana wakonda kuri Ongo, wabhikwa myeri ishatu mo numba y' ishe. ²¹ Warekiya watawanga, mwisi wa Farao wamuringa wamuranga bhuri mwanawe. ²² Musa wahanwa e bwenge bhuti bwa ku Misiri wabhesa na maa mo bhinwa na mo mikorere. ²³ Wakiya wamabhesa na bhindi makumi anye e mutimae wanikira ikae bhana chabho, bana bhe Bhaisiraeri. ²⁴ Wasunga uma ubhabharange, wamusake: wahunane ingu wabhesanga unubhiwange wakama e mumisiri. ²⁵ Wahaka mbu bhana chabho bhasesibha mbu Ongo waninka bho karamo mo mine yae. Ina nti bhasibha. ²⁶ Erotu rwemisa wakumana bho nti bhakwanange, wahuna ironganya bho webha: nabho ra bhuhoro: bhanu bhanakima, Bhushwa nki bhanu mubhabhayanange? ²⁷ Ina ingu wabhesanga ukorengi munachabho bhubhi, wamuhimira kore, webha: inye ngwarekukia mukakare na mukeri wa mansa kuri bhate? ²⁸ Oongo sondange nishura ebwakushuranga ongo e mu Misiri mo miyoro? ²⁹ Musa wabheka bhushe ne kinwa ncho, wabhesa mweni mo chuo cha ku Mediani, wabhuta bhana bhabhi kuko. ³⁰ Hakiya hameta bhindi makumi anye ngashani wa Tita wamusaire, mo bweru bwe ntata ya ku Sinai mukasha kasakange mu kisiki. ³¹ Musa wakiya wamakae , washishara washeere kwihi wakai, murenge wa Tita werukirwa. ³² Webha ani Ongo wa bha'so bhabhe, Ongo wa Ibrahimu, wa Isake, wa Yakobo, Musa watingirwa na kambo, nae ntwerekanga n'ikae. ³³ Nyerekuritu wamwire: kuto ebhinantiro mo bhisando byabhe, bhushe hano hari ongo bhutaka bwashuururwa. ³⁴ Namasunga e minubho ye bhea bhani ku Misiri, namerukira er' ebhibhe namasika noshukae bho. Ina nakushisha wendi ku Misiri. ³⁵ Musa ingu watinanga bho, bhebha: inye ngi wakurianga mbu ongo mukakare na mukeri wa mansa? iwe ngwashishiwa na ongo mbu wendi mw'ibhesa mukakare na moshukayi mo mine y' engashani wamusairenga munkati ekisiki. ³⁶ Iwe ngwakutonga bho, wakiya bhishisharo na tushingishiro ku Misiri, namunyasa , na mu bweru mu bhindi makumi anye. ³⁷ Ingu ngi Musa ngi washishanga ebhana bha bhaisraeri: Ongo winu wabusimanyieyo mutahwa watuka kuri bhanu bhuri ani; ³⁸ Iwe ngwabhesanga mor' irameso mo bweru hima n' engashani ingwebhanga nae mo ntata ya ku Sinai, hima na bha'so bhinu, iwe ngwaninkwanga ebhinwa bye karamo, watuninka na bhate. ³⁹ Bhatita nti bhamutundanga, bhamutaa kore, na mo mitima yabo bhakuruka ku Misiri. ⁴⁰ Bere Haruni: turonjei ba Ongo, mwitusondore, bhushe Musa ngu ngwatukutonga ku Misiri, nti tusi e chakubhesa mo we. ⁴¹ Morotundo bharonja nkambu, bhatunjie ohembo ekamoi bhamoe e murimo w' emine yabho. ⁴² Kuruma nampo Ongo wabhunduka, waria bho mo bhashirikani bh' e kwiyo bhuri mbu bwatiranywanga mo Karisi k' e bhatahwa: Munisubhurenga hongo na bhisabu, bhindi makumi anye mo bweru, ongo numba ya Isiraeri? ⁴³ Na bhanu murianga eri hema ra Moloki ne nkekeni ya Ongo refani etumoi twakianga bhanu mwitunda to na nabhukutoyo hano mwendi kore na ku Baberi. ⁴⁴ Eri hema re Kariko rabhesenga hima na bha'so bhinu mo bweru bhuri mbu bwarerangawe ingu webhanga na Musa, mbu waronjero bhuri rasunganga we. ⁴⁵ Na bhatita bharekiya bhamaninkwaro, r'enjiwe na Yoshua, mo chuo abhesenga chatingirwi n'abo, iya mo matu a Daudi. ⁴⁶ Daudi washee nchumo mo makako a Ongo na wakonga isimanya bhuriki, kuri Ongo wa Yakobo. ⁴⁷ Rabhesa Soromono ng' wamwimbe numba. ⁴⁸ Eina ingu urikokwiyo nguru utarikanga mu numba yaronjiwa na. ⁴⁹ mine ya bhea bhuri mbu bwebha e mutahwa. Mu mbingu ngie kitumbi chani che bhubhake n'echuo nge bwari bweririya emindi yani, Numba nki isenimbeyo bhanu? Nyerekuritu weebha; mbenti hani hasebhesa bhuari bw' e maruhukiro ani? ⁵⁰ Mbenti ntyemine yani ng' yakuronja e bhikai bhiti mbi? ⁵¹ Bhanu bh' erikoti rasuma, nti murironjiwa otende rw'e Mutima n'emate!e matuati bhanu mukiange bhuhaka ne Mutima washururwa: ebwakianga bhaso, na bhanu bhubho. ⁵² Inye mo bhatahwa nti wanubhiwanga na bhaso? Nabho bhashuranga ebhaturang' eraroso eriya rangu mine r' eira: ngi mumusubura mubhesa bhayeri. ⁵³ Bhanu musheenga e myomba iyetire esangashani, nanti mur' iranga yo! ⁵⁴ Bharekiya bhamorukira ebhiinwa mbi, bhasubhuka mo mitima yaabho, na bhashiish' emeno bhushe nae. ⁵⁵ Eina Setefano, warisa Mutima washuururwa, wasumy' emeso ko kwiyo, wasung'e bhukiri bwa Ongo na Yesu usimene mo kwabhume kwa Ongo. ⁵⁶ Webha: Kae,namasunga e mbingu samobhoka, n'e mwana w'e mwea wamasimana mo kwabhume kwa Ongo. ⁵⁷ Bhakuwa nguru, bharindika e mate abho bhamoke e bhati mongo, ⁵⁸ Bhamukurur' ekubhutara n' erubhungu bhamuya. Nambi bhasibhanga ekariho bhatereka esanchangi sabho mo mindi ya musike uma, rina rae Sauro. ⁵⁹ Bhashura Setefano, nt' uhemange n' ieba: Mukota Yesu wangiriro emutima! ⁶⁰ Warekiya wamand' emaru, ware mu murenge mukiri: E Mukota anga iansire bho ebhubi bhuno! Wakiya wamakinda iyebha e bhinwa'mbi, wahuhuka.