¹ Na wabhume uma wabhikirwa ngi Anania, na mukari Safira, bhachuya kebhe chishwa rabho. ² Wabisa muhango uma we bhusi, mukari wasibha, ne byasianga wenda kasicha byo mo mindi ye Santumwa. ³ Petero wamwire: Anania, bhushwanki mushumbu wamarisiya e mutima wabhe, mwiya moero rw'iebha bhushukishuki kuri e Mutima mushasha, na ntu masiya ne muhango uma we bhusi bwe rishwa? ⁴ Ritamuchukange kongo nti rabhe ho? na kuruma n'er'ichuya, e bhehe nti byakosi bhiri mu rikocha rabhe bhushwa nki umariya mo mutima wabhe kitunge mpi? Utungebere e bhabhume bhano manko, ina Ongo. ⁵ Anania, warekiya wamorikira e bhinwa mbyo, wenduka, na wakwa. Koha kakiri katinge e nkumanano eiti. ⁶ E bhoshukira, bhasimana, bhamubhungabhunga, bhenda nae bhamutaa. ⁷ Ntambi ishatu sarikia sa meta, mukari wakime, ntiti usi e byameta. ⁸ Petero wamushisha: Neri, nge bhehe bhimbi ngi byakuchuyanga bhanu e chunda cherishwa? warisiya,mbu nge bhusi bhumbo. ⁹ Petero wamwire: bhuni ngi bwa kurisiana bhanu mwishukeshuke e Mutima wa Nyerekuritu? kae nge bhimbi ebhatukange kataa moke wabe ngi bhano bhari hamiango, na ongo bhasekuria. ¹⁰ Mukashangi nko, wenduka mo mundi y'esantumwa, na wakwa. E bhoshukira bharekia bhamakime bhamukumana ntwamakwa, bhenda nae bhamutaa kwihi na moke. ¹¹ Koha kakiri karisa mo nkumanano nambi e bhati ebhorukirang' e mwasi ngo. ¹² Bhishisharo bhingi na tushingishiro twakierwa munkati n'ebhea mo mine ye santumwa. Bhabhesanga bharika e bhati mo rubhi rwa Soromono. ¹³ Na hasira nompe mwea wabhesenga wehiengi bho! ina e bhea nti bhatatange bho nguru. ¹⁴ E mwanso we bhasimira Nyerekuritu, bhabhume ne bhomina wa ongererwa, tu nguru. ¹⁵ Mwiya na mungerero ye reriya e bhakoni mo sense ni tereka bho mu sentange, bhushwa Petero usekiya wameta e kirimirimi chae kibhumbi uma mubho. ¹⁶ E kikembe che bhea e bhabhesenga mu se mbungu sa kumushi mushi bhati bheya ku Yerusaremu, karishako e bhakoni na bhea bhatingirwa na bhifasi ne bhati bharama. ¹⁷ Eo e mukakare we bhashe bhakungu ne bhati bhabhesenga nae, isibha e rushu rwe bhasandukayo nti bharisere na mono. ¹⁸ Bhariya e mine yabho kuri e santumwa, bhataa bho mo ngori. ¹⁹ Ina ngashani uma wa Nyerekuritu, warekiya wamarundo e sandubhi munkati bhutu, wasaisha bho, w'ire bho: ²⁰ Mwendi, musimane mu riramaso muture e myasi ye karamo ke bhuingo bhuno. ²¹ Bharekiya bhamorukira mbo, bhakime mo murangaranga morirameso bhabhucha ihano e mukakare we bhashe bhakungu nambo e bhabhesenga nae, bharekiya bhamiya bhabhikira e rushu ruti rwe bhasandukayo ne bhakungu e bhati bhebhana bha Isiraeri, bhatuma bhea bhendi kasonda e santumwa mu ngori. ²² E hbafuku,bharekiya bhamakuruka, nti bhasunga anga n'uma mu ngori, Bhakuruka bhatura e mwasi wabho. ²³ Mwiyeba: Twa kukumana e ngori nti Yarindikwa ishu, ne bharangi e bhabhesenga bhari kubhusondori ne rorubi, ina twakukiya twamarundo, nti twakumana anga numa kumunda. ²⁴ Bharekiya bhorukir'e bhinwa mbyo, e mukakare we rirameso ne bhakakare bhe bhashe bhakungu ntiti bhasi e byanikirange e santumwa ne bhisiya kuruma ne bhinwa bhino. ²⁵ Mwea uma wiya werebho: mukai, e bhabhume e bhakurianga bhanu mu ngori bhari murirameso, bhahanange bhea. ²⁶ Nampo e mukakare wenda ne bhafuku niendja bho mpompo, bhushwa wabhesenga usubhahange mbu wamurekerwa makoi ne bhea. ²⁷ Bharekiya bhamarisha bho mumakako e rushu rwe bhasandukayo, e mukakare webhashe bhakungu washisha bho bhuno: ²⁸ Nti twakubhuhangirenga mbu kiro mu hana tu mu rina ndo? Na mukai, mumariya tu Yerusaremu e uti ne mahano inu na bhanu musondange mbwe nchama ye mwengu ibe hambasiro nitu. ²⁹ Petero ne santumwa bhasako: rakomenwa isubha Ongo mwisubha e bhea. ³⁰ Ongo wa tita wakufukayanga Yesu, e wakushuranga bhanu mwi muiririsa mo muti. ³¹ Ongo wamutarisha e kwabhume kwae bhuri mubhake na moshukayi, mwininka bha Isiraeri e ribhunduka ne risasirwa e bhubhi. ³² Bhate kari ho ke bhinwa mbyo, ne Mutima mushasha ungu e waninkwanga e bharimusimira. ³³ Isubhuka ne bhinwa mbyo, nti bhasondange ishura bho! ³⁴ Ina mufarisayo uma, wabhikirwa mbu ngi Kamarieri, muhani mukiri we myomba, waninkwa Otunda ne bea bhati, wasimana mo rushu rwe bhasandukayo, weba mbu bh'obhore kasa esantumwa. ³⁵ Werebho: bhabhume bha ku Isiraeri, mukohyanga mumbi e bhisondange ikora bhanu kuri e bhea bhano. ³⁶ Bhushwa nti reta matu mingi wasaa Theuda webhikira mb'wiwe mwea mukiri, na kuruma nae kwarika bhea mana anye, bhashurwa, ne bhati e bhamutuchanga bhabheka ni nsansabhana bhabha bhusa. ³⁷ Ituka iwe, hiya umpe ngi Yuda e mu Gariraya mo matu eritiranywa e mwanso we bhea, wakurura bhea bhingi mo ruharo rwae, bhashirira nabho, ne bhati bhamutuchanga bhansasabhana. ³⁸ Na hano, ni bwerengi, kiro muraa mo bhea bhano, mureki bho bhendi,kuti e mikorere yabho yatukana na bhea , yaabhihabhiha. ³⁹ Ina kuti e mikorere yabho yatukana na Ongo mutumukocha ibhishabhisha yo, kiro mukime mu kinwa chibhanganya Ongo. ⁴⁰ Bhamurisiya, bhabhikira e santumwa, bhahumba bho tushushu, na bhahangise bho iyebha e rina ra Yesu, bhareke bho. ⁴¹ E santumwa satuka mo makako e rushu rwe bhasandukayo, mu ngoa sisunga bhakererwa ubhansa rwakonda rw'inenwa bhushwa bwe rina ra Yesu. ⁴² Na kinsi otu, murirameso na mo manumba nti bhatangasiya ihana ne ritura e mwasi wakonda wa Yesu Kirisitu.