¹ Mo rirameso ra Ongo ra ku Antiokia abhesenga murikire bhatahwa nambi bhasi nguru emyomba; Barnaba, Simeoni wabhikirwaa mbu Nigeri, Rukisi wa ku Kirene, Manahemu ing'wasimanyiwanga na Herode, na Sauri. ² Bharekiya bakorengi Nyerekuritu mo murimo wabho nanti bhari mu mahemo etin'erisa, e Mutima- wakonda webha: mundieri kwahehe Baranaba na Sauri bhushe n'emurimo ng'wasingwanga nabhikira bho. ³ Nampo, kuruma n'emahemo atin'ererisa, bhatereka bho emine, na bareke bho bhendi. ⁴ Baranaba na Sauro, bhashishiwa n'e Mutima 'konda bhendi, bhahite ku-Sereukia, na kundo bhirereka mw'ienda ku-Kipuro. ⁵ Bharekiya bheya ku Saramina, bhatur'e kinwa cha Ongo mo marameso a Ongo ebhayahudi, bhabhesenga na Yohana mw'isake bho. ⁶ Bharekiya kuruma nampo bhamasoka ekisanga kiti iya ku Pafu, bhakumana muira uma, mutahwa wa manko muyahudi erina rae Bar- Yesu. ⁷ Ingu wabhesenga hima n'emuhanga Seregio Pauro, mwea uri na bwenge. Ingo wabikira Baranaba na Sauro, na washea mwanikiri w'iyorukira ekinwa cha Ongo. ⁸ Eina Erima emuira bhushe ng'webh'erina rae, wabhese nt'utinange, nt'usondange ibhundura er'isimira r'emuhanga. ⁹ Nampo, Sauro, ngw'abhikirwa hotu mbu Pauro, warisa Mutima wakonda, wamusumy'emeso, wamushisha: ¹⁰ Mwea 'ng'urisere na kinsi bhususe bwa mpuse na bwibhi, musik'y amushumbu, murenda wa kinsi obhansa, utusond'ishirempo n'ihabhuch' esans'esatunganana sa Nyerekuritu? ¹¹ Ekashangi kano, emwine wa Nyerekuritu uri habhasirwa nabe, ukubha kihumihumi, na muntambi nima utusungy'emwishi. Kuruma mpo ekwasiro n'emwerimya byamuhite, wasondekanya, mw'imamata, bhea bhushe n'imwenja. ¹² Nampo emuhanga, mwesungae echabhesa, wasimira, ntwamarisa bhobha n'emahano a Nyerekuritu. ¹³ Pauro n'ebhemisanya nae, bharekiya bhirereka ku Pafo, bhenda ku Perge ya ku-Pamfiria. Yohana wasiana nabho, n'ekuruka ku- Yerusaremu. ¹⁴ Ituka ku Perge bhemis'ense yabho n'iya ku- Antiokia ya ku- Pisidia. Bharekia bhamakime mor'irameso ra Ongo er'otu rweriruhuka, bharik'ekwansi. ¹⁵ Kuruma n'erisisiris'emyomba n'ebhatahwa, ebhakakare bherirameso ra Ongo bhashisha bho bhendi k'ebha: Bhabhume bhanakitu, kuti bhanu mukwengi ch'insonsomor'enkumanano, mwebhe. ¹⁶ Pauro w'asimana, na warekiya wamaronjiebho kengeko mo mine, w'eba: bhabhume bhaisraeri, na bhanu 'mbi musubhaha Ongo mw'erukire! ¹⁷ E Ongo war'ino eimba ra Isiraeri w'arondoranga bhatita, warianga r'ino eimba m'osubhahwa mo matu abo mo chuo cha ku-Misiri, na watunjaro ko mo mombo wae w'ebhunkangwe. ¹⁸ warishabo iya mubindi makumi anye munkaty'ebweru. ¹⁹ Na, bharekiya bhamashiria nganda sirinda mo chuo cha ku-Kanaani, waninka bo cho mbu chabho. ²⁰ Kuruma nampo, mu bhindi man'anye na makumi asanu, w'aninka bho bhakeri bhamansa, iya kuri e mutahwa Samweri. ²¹ Bhahema himpo mubhake, na Ongo waninka bho, mubhindi makumy'anye Sauri, musike wa Kishi, w'ekisasa cha bhenjamini. ²² Etuka mpo, warekiya wamurekera, washeereshie bho e mubhake Ndaudi, mw'iwe wakuruch'erimusibhirira: Namashee Ndaudi musike wa Yese, mweangu wasas'emutima wani, ng'usebherereshayo erisasa rani riti. ²³ Wamo bhura bwa Ndaudi ngi Ongo, etukana n'erirai rae, washeere bho mwoshukayi, ngi Yesu. ²⁴ Bhusondori bw'eriya rae, Yohana abhesenga ntwamatur'emwasi w'ererubhikwa r'emusasiro mo bhea bhati bha Isiraeri. ²⁵ Na warekiya Yohana wamashea emwehu wae, webha: nti aningingw'anikirange banu; eina musunge, kuruma nani kwiyange ngu ntinakomenwa iyobhor'etunantiro twae. ²⁶ Bhabhume bhanakitu, bhana bhe mubhi wa Iburahimu, n'ekuri bhanu ngi kino kinwa ch'enchukaro charebhekwa. ²⁷ Bhushe bhisa ku Yerusaremu n'ebhakakare bhabho bhateerera Yesu bhubhi, na mori muker'erubhansa rw'erikwa, bhabhereresh'e bhinwa by'ebahtahwa mbi bhinsonsomorwange kinsi otu rw'eriruhuka. ²⁸ Kiro mbu ntibhasungang'ekuriwe kinwa nchi chakomenwanga erikwa rae, bhahema kuri Pirato imushura. ²⁹ Na kuruma bharekia bhamakind'ibhereresha ebhiti mbi byatiranyiwangako kuriwe, bhamuhicha mo riyango n'imuriya mor'esinda. ³⁰ Eina Ongo wamufura munkati n'ebhakwi. ³¹ Wasaire mu matu mingi m'umbi ebhatayanga hima nae ituka ku- Ngariraya ienda ku- Yerusaremu, nabho kano kashangi nge kariho kae munkati n'ebhea. ³² Na bhate tubhutureng'ingo mwasi wakonda ng'erirai raronjirwa bhatita. ³³ Ongo wakubereresharo kuri bhate ebhana bhae, morifura Yesu, iemisanya n'ebwatiranyiwa cho mo Zaburi yemet'abhi: Ongo musiky' ani, namakubhuta run'otu. ³⁴ Ngwamufura munkaty'ebhakwi, iya m'oero watakuruki tu mwebhiha, ngi bw'ebhangae mbu: nabhuninkayo nsasi sashuururwa sabhikirwanga Daudi, nsasi 'nsi sakomenwa. ³⁵ Bhushe nancho webha tu hampe: utusimiriyo emushuururwa wabhe wasung'eribho. ³⁶ Nakubha, Daudi kuruma n'ematu ae wakorenga Ongo, wakwa, wariarwa hima na bhishe, na wabho. ³⁷ Eina ingu wafuranga Ongo ntw'arebho. ³⁸ Musibhirire ke, bhabhume bhanakitu, mbu ietere iwe: ngi mwareturirwa bhanu emusasiro w'ebhubhi. ³⁹ Nakinsi ngu wasimira ntwamakind'iebhererwa nae mo bhikai ebhiti mbi abhesenga bhitamebererwa mo ongo mo myomba ya Musa. ⁴⁰ Himpo, mubhesenga nti mw'iranga ritabwiyeringi, imbu ebwarebwa n'ebhatahwa. ⁴¹ Mukai, bhae bharisere Oneno, mushishare na murimine, bhushe nseronja mo matu inu kikai kima, kikai kima inchi kitamusimira bhanu nakiro bhabhuture cho. ⁴² Bharekiya bhasaa, bhahema bho iebha mor'otu rwer'iruhuka rwemisa mu bhibya bhibya bhikai. ⁴³ Na, hende n'enkumanano, bhayahudi bhingi, nambo ebharesimira bhemisa Pauro na Baranaba, nti bhebhange nabho, n'ihana bho irika nti bhetingire mo nsasi sa Ongo. ⁴⁴ E rotu rw'eriruhuka rusindu, erobhungu ruti rwakumanana mw'iyorukira ekinwa cha Ongo. ⁴⁵ Ebayahudi, mor'isunga bho hareh'ekikembe bharisa mono, n'itina abhesenga byebhange Pauro, mwemuhakanya n'imukamba. ⁴⁶ Pauro na Baranaba abhesenga bhashishange bho anga mitikotiko: E kuri bhanu eraroso ngy'atuka ekinwa cha Ongo chamuturwange, eina bhushe murahacho, na mw'iker'obhansa bhanu bhesine ntimukomenwa ebhuingo bw'ematu ati n'eati, sunga, twabhunduka mo bhea bhe chuo. ⁴⁷ Bhushe imbo ngwaretwire Nyerekuritu: Nakusimanikanga ubhes'echaka ch'esanganda, mweriya eroshukaro iya kwend'echuo. ⁴⁸ E bhea bh'echuo bhamoa mor'iorukira mbo, bhatata ekinwa cha Nyerekuritu, n'ebhati mbi abhesenga bharairwa ebhuingo bwematu ati n'eati bhasimira. ⁴⁹ E kinwa cha Ongo chatamba mo chuo kiti. ⁵⁰ Eina ebhayahudi bhakimiya mutiro wema mabhomina mbi abhesenga bhari mo nkuru yarengekana bh'erobhungu; bhashaisha mario kuri Pauro na Baranaba, n'ihensanya bho mo bhutaka bwabo. ⁵¹ Pauro na Baranaba bhatiture e mukungu w'ebhisando byabho, n'ienda ku-Ikonio. ⁵² Na kubha ebhemisa abhesenga nti bharisere ngoa na Mutima- wakonda.