¹ Mukikakika kashangi, e mubhake Herode wasimana mwinubya bheya bhimabhima bhamo rirameso ra Ongo. ² Na washura Yakobo musike wabho Yohana n'Obhasi. ³ Mwisunga mbu chashimwa n'ebhayahudi, waronja hotu bhatinge Petero. abhesenga matu etumbonsa tusira ntero. ⁴ Kuruma n'erimutinge n'imutaa mo ngori, wamuria mwirangwa na bhikembe bhinye bya bhashirikani bhanye kinsi kima, mw'ehuna wariarwe mu makako ebhea kuruma n'e Pasaka. ⁵ Petero abhesenga warangwa mo r'echumbi r'ebhaminwa n'ebherirameso nti bhasianga irebheka bhushwa nae mahemo kuri Ongo. ⁶ Mo mutu eriemisa erotu ndu rwakiya Herode wamusibhura, Petero, nti waminwa mu bhurebhure sibhi, nti wekinde munkati na bhashirikani bhabhi; n'ebharangi kubhusondori n'e muyango bharangange erechumbi r'ebhaminwa. ⁷ Na sunga ngashani uma wa Nyerekuritu wiya, na chaka chasaka mor'echumbi rebhaminwa. Engashani wasimo Petero, mwemuturana mo wendende, n'iebha; simana tete! Ebhurebhure bwahuka mo mine yae. ⁸ N'engashani wamwere: mbara emukobha wabhe n'etunantiro twabhe, na wakia mbo. engashani wamw'ire tu; mbara esanchangi sabhe na nemise. ⁹ Petero wasaa, n'imwemisa, utasibhi ebhikiange engashani kubha eira, na nt'uhakange mbu isheirwa. ¹⁰ Bharekiya bhama kunduk'emurangi wa roso n'ewemetabhi, bhiya harubhi rw'er'ichumbi indu rwakimire mo robhungu, rwerindo rwesine kubhusondori nabho, bhasaa, na bhashere mu kanse. Kuruma nampo engashani wasia Petero. ¹¹ Kwekurukamo wesine, Petero webha: nasunga ke mubhususe bweira bwakukiya Nyerekuritu warebheka engashani wae na ngwamantunja mo mine ya Herode na mobiti mbi atuka byarindire ebhayahudi. ¹² Kuruma, nina wa Yohana, ubhikirwange tu mbu Mariko, himpo bhea bhingi abhesenga bhakutumana ho bhahemange. ¹³ Wakaso mo rubhi rukeke, na mufuku uma wabhikirwa mbu Roda, weya kwihi mwiorukira. ¹⁴ Wateerera e murenge wa Petero, na mor'imoa rae, erekia warundo, wakanyaha itur'emwasi mbu Petero uri hamuyango. ¹⁵ Bhamushisha; ongo mushire. ina wabhereresha mbu ngi bhuri cho. ¹⁶ Bhebha ingo ngashani wae, ina Petero wesimike mwikaso mo rubhi, bharindo, na bhashishara moremusunga. ¹⁷ Petero wabhese nti werengibho n'emine mbu bhabhebhere waturebho wakukiya Nyerekuritu wamukurura mo rechumbi r'ebhaminwa, n'iebha; mutureo kuri Yakobo na mo bhanakitu, kuruma wasaa n'ienda kumpe. ¹⁸ Entambi yachang'ebhutu, ebhashirikani bhabhesa mo mushiki mukiri mwesibha inki ngi chakubhesa mo Petero. ¹⁹ Herode warekiya umusondekanyange watamushei washisha ebharangi n'ininkana momba w'eshura bho ienda ku Kaisaria mw'eruhukeko. ²⁰ Herode abhesenga nt'uri na rwanko rwabhusubhuke kuri bhisa, ku Tiro na bhisa ku Sidoni, ina bhiya kamusunga mu rwanko ruma, ina kuruma n'ew'ishee Brasto, e murangi mukakare w'erechumbi r'emubhake, bhamubhongabhonga mw'eshee bhuhoro, bhushe e chuo chabho abhesenga kiramengi muncho ch'emubake. ²¹ M'otu ruma rwaterekwa, Herode, wambara emyambaro yae y'ebhubhake, n'erika mo kitumbi chae ch'ebhuhime nt'webhange bhusondori bwe bhati. ²² E bhea bhakua; murenge wa Ongo nti wa mwea! ²³ Mo kashangi kika kika, ngashani uma wa Nyerekuritu wamuhumba, bhushe nti wakuninka Ongo er'otunda, na wahuhuka, bhushe nt'uriwange na munyore. ²⁴ Ina e kinwa cha Mukota ch'enderana tu. ²⁵ Baranaba na Pauro, bharekiya bhamakindany'emwasi wabho, bhakuruka ku Yerusaremu, bharisha hima nabho Yohana , ingu ubhikirwange tu mbu Mariko.