¹ E santumwa na bhanachabho, abhesenga bhari ku Yudea bhorukira mbu entibhasimira bhareninkwa nabo ekinwa cha Ongo. ² Na Petero warekiya wataya ku Yerusaremu, ebhasimira ebharenda ekotende bhamweke ; ³ Mwebhura mbu: Ukukime mumbi entibheta mor' otende na ukurisa hima nabho. ⁴ Petero wabhuch' iturebho emwasi ebhususe itukana nambi byakweta. ⁵ Weba: Akosanga nirikire mor' obhungu rwa ku Yopa na narekiya nihemange, n' enda kimbu na nasunga kikai kima, chasusana na nshangi nkiri yaminwa mosenkaro sayo sinye nt' ihitange etuka mo mbingu n' iya hari ani. ⁶ Mwesumy' emeso munjo nshangi, nasisirisa, na nasunga, es' emindi inye s' echuo, esenyama s' ebhusara, ebhikururukange, n' emironge yamo mwanya. ⁷ Na norikira murenge wanishisha: simana, Petero, shura n' urise. ⁸ Ina n' eba: Anga e Nyerekuritu, bhushwa anga kikai chema ari chaherwa, kitangakimenga mo bhunu bwani. ⁹ Na mokashangi kemisa emurenge werukirwa mo mbingu: inchi chatikurwa na Ongo mbu chashuururwa, ang' itiko cho mbu chema. ¹⁰ Icho cheya ngendo ishatu; kuruma ebhiti byakuruk' ekwiyo. ¹¹ Nasunga, kurumampo bhea bhashatu bhasimana ha miyango y'enumba abhesenga muri ani. ¹² Emutima wanshisha n'endi hima nabho ang' itikatika. Ebheya mutubha bhano bhantindike na twakime mo numba ya Koroneriyo. ¹³ Emweya watuture bhuni bwakusunga e mo numba yae ngashani wishaisha kuriwe n' iebha: Rebheka ku Yopa n'ibikira Simoni wabhikirwa tu mbu Petero. ¹⁴ Ngwasekwire bhinwa ietere byo ukoshukara, ongo n'enumba yabhe iti. ¹⁵ Narekiya nabhuch' iebha, e Mutima wakonda wahite bho, bwabhesenga ro kuri bhate mo ntangiro. ¹⁶ Nasubhukia ekinwa cha, Nyerekuritu: Yohana warerubhika mo mecha, eina bhanu mukurubikwa mo Mutima Wakonda. ¹⁷ Nakubha, bhushwa Ongo wamaninka bho muhang' uma n' itu bhate mbi twaresimira Nyerekuritu Yesu Kirisitu, na mukochange, ani, ironja bhuhaka na Ongo? ¹⁸ Kuruma n' iyorukira mbo bhabhebhera, na batata Ongo mwiebha: Ongo wamasimira eribhunduka hotu n'ekuri mbi nti bhasimira kongo bhashee karamo. ¹⁹ Ebhasanswanga, mo minubho y' ehienga Setefano, bhenda n' iya ku Foinike mo kisanga cha ku Kipuro na ku Antiokia mw' etur' emwasi kuri bhayahudi ho. ²⁰ Eina kwahbesa munkati nabho bheya bhima bha ku Kipuro na bha ku Kurene bharekiya bheya ku Antiokia, beba kuri ebhayunani n' iture bho emwasi wakonda wa Nyerekuritu Yesu. ²¹ E mwine wa Nyerekuritu wabhesa hima nabho na bhea bhingi bhasimira na bhabhunduka kuri Nyerekuritu. ²² Echanga chabhese mo mate ebheya bherirameso ra ku Yerusaremu, bharebheka, Baranaba wiya ku Antiokia. ²³ Muntamb' iyangawe na mor' esunga enchumo ya Ongo, wakokome yo na were bho ebhati mwerika na mutima wasimika w'iseke kuri Mukota. ²⁴ Bhushwa abhesenga mweya wahunda warisa Mutima Wakonda na w'esimira. Na kikembe kikiri chakumanana na Mukota. ²⁵ Kuruma nampo Baranaba wenda ku Tarso, mw' isondekanya Saulo. ²⁶ Na mor' imushee wiya nae ku Antiokia mu mwak' uma bhakumanana mo sankumanano s' erirameso na bhahana bhea bhingi na rabhesa ku Antiokia ngi raroso ebhemisa bhabhikirwa mbu bha Kirisitu. ²⁷ E matu ngo bhatahwa bhahita etuka ku Yerusaremu mwienda ku Antiokia. ²⁸ Uma mubho wabhikirwa mbu Agabo, wasimana na watura mo Mutima mushasha mbu kwamubhesange rwaka rukiri mo chuo ekiti rweya mo matu a Klaudio. ²⁹ Ne bhemisa bhasunga irebheka mu kinsi mweya itukana n'ekara kae mw' isake kuri bhanachabho ebhabhesenga bhari ku Yudea. ³⁰ Byehie mo bhakungu mo mine ya Baranaba na Sauri.