¹ Kwabinduke mweya ku Kaisaria, rina rae Koronelio mukiri wa bhashirikani iyana mo bhikembe bya ku Italiya. ² Mweya wasimira nisubhaha Ongo ne numba yae eiti, wabhesanga unikang'e bhea bhisa bho bhingi, nihema Ongo e matu ati. ³ Otu ruma sabundukenga mutambi mwenda sa mu mwishi wasunga risira itikatika munkati er'isheiwa ngashani wa Ongo wakime mo mwae n'emwire Koronerio. ⁴ Nae wamusumye emeso, wasubhaha webha: inki e Nyerekuritu? wamwire e mahemo abhe ne bhisa bho byabhe byamey'ekwiyo bhuri nsub ukiyo hamakako na Ongo. ⁵ Ere bheya bhendi ku Yopa, bhabhikire Simoni ingu ubhikirwange Petero. ⁶ Wasamire hima na mweya uma rina rae ngi Simoni, mweya witunganyanya hbihu. Enumba yae iri kwihi ne kirindo waakw'ire mbi byamukora Ongo. ⁷ Warekiya engashani 'ngo abhesenga webhange nae wamenda, wabikira bafuku bae bhabhi ; na mushirikani uma wasubhaha Ongo munkati nambi abhesenga bhamukore ematu ati. ⁸ Warekiya wamature bho e bhinwa bhiti were bho mbu bhendi ku Yopa. ⁹ Mine kakoma bhabhunduke mo munse niya kwihi ne rubhungu, Petero wataya mor'echumbi r'e numba mwihema, rabhesenga kwihi na ntambi mutubha. ¹⁰ Worukira rwaka nguru, wasonda irisa ina bharekiya bhasondingi itunganya ebhiyo, E mutima wae wachikana. ¹¹ Wasunga e mbingu nti yamarinduka wasunga kikai kimusike ngi bhuri nchangi nkiri, ihichiwange mu nkuso sinye iya mor' oto. ¹² Ekumunda nti kurikire ensusanya siti s'esanyama se mindi inye. Ne sa nyama se bhusara nansi esikururukange, ne mironge ya mu mwanya. ¹³ E murenge wiya kukwae webha, simana Petero shura risa. ¹⁴ Ina Petero webha: anga Enyerekuritu: ntanga risanga nti byarengekana ari byema. ¹⁵ E murenge wa mwire resangendo sibhi: bhikai Ongo wamashuurura byo utu mebha tu mbu byema. ¹⁶ E kinwa kino chabererera ngendo ishatu: kuruma yangirirwa tu ekwiyo. ¹⁷ Petero warekiya uri munkati ne myanikiri e kumunda ne mutima wae. mor'iteerera ewasusanyiwa er'isheiwa ramasunga we, sunga bheya, bhatukange kuri Koronelio, kuruma n'erishisha e numba ya Simoni bhasimana habhusondori n'e numba. ¹⁸ Bhabhikira nishisha Simoni ingu ubhikirwange mbu Petero urikire kuko. ¹⁹ Na bhumbo Petero warekiya urikire mu myanikiri y'er'isheiwa ndi ramasunga we, e mutima wa mwire: sunga bheya bhashatu bhakusondange. ²⁰ Himpo tuka uhite w'emisanye nabho, anga bhobha, bhushwa ani ngi na kw'irenga bho. ²¹ Kuruma Petero wiyere bho imbo bakwiya kamuringa ituka kuri Koronerio webha: sunga ani ngi bhanu munisondange: mumeya bhushwa nki? ²² Nabho bhebha: Koronerio mukiri, mweya wiira n'isubhaha Ongo, urikire nitatwa mo ruanda ruti rwe bhayuda, wakuhanwanga na ngashani yakonderera, warebheke bheya kuri ongo, enda mo numba yae wakochi irukira e bhinwa byabhe. ²³ Himpo wakimisha bho nikoke bho mukakoma Petero wasimana nabho, na bakeke mo bhanachabho bharikanga ku Yopa benda mongo nae. ²⁴ Mukakoma bhakime ku Kaisaria. na Koronerio wabhese ntwakurindire bo, nt'wamakindi ituma eruanda rwae na bhira bhae. ²⁵ Petero warekiya wakime, Koronerio wamukumana, wahita mo mindi na kwihicha. ²⁶ Ina Petero wamusimanya webha simana, ani mweya ho. ²⁷ Na munkati nerishambara nae, wakime, wasunga kikembe kikiri chambi abhesenga bhari mo nteko. ²⁸ Werebho: bhanu mosi mbu nti rakocheka muyuda ibhinduke na rumpe uanda ari iyenda murumpe, ina Ongo wamanisheya, ntabhikiringi mweya uti mbu nt'warengekana ari mubhi. ²⁹ Bhushwa nacha nameya anga bhuhaka e ntambi yamabhikirwa ani; hano nashisha, kinwa nki chakumbikirenga bhanu? ³⁰ Koronerio webha: runotu otu rwanye itukire, nafund' irisa iya nentambi ino, na munkati ne santambi mwenda atuka nihemange ekumunda ne numba yani: mweya wasimana ekubhusondori nani urina myambaro yasana webha: ³¹ Koronerio, emahemo abhe amorukirwa ne bhisabho byabhe byamanikirwa mo makako a Ongo. ³² Ere bheya bhendi ku Yopa, bhabhikire Simoni ubhikirwange Petero, urikange mo numba ya Simoni utunganyanga bhihu, kwihi ne Kirindo: Nae wakiya wiya webha nabhe. ³³ Hiha nakwirenga bheya bhendi kuri ongo, umakora shu moriya, hano bhate bhati turi ha makako na Ongo tukochi iyorukira ebhiti byamasheiwa ongo na Nyerekuritu. ³⁴ Na Petero wabor' ebhunu wae webha: eira namakind' iteerera kai Ongo nt'iwarondora mweya. ³⁵ Ina mu kinsi owanda ingu wasubhaha nikora eira nt'wasimirwa nae. ³⁶ Ekinwacho chareranga we mo bhaisiraeri, watura e mwasi wekaramo na w'ebhuhoro wa Yesu Kirisitu rukombora webhati. ³⁷ Bhanu mosi ebhinwa mbi byakuturwanga mo Yudea iti byabhuchiye ku Gariraya, kuruma n'ebhurubike waturanga Yohana. ³⁸ Emyasi ya Yesu wa ku Nasareti wakiyanga Ongo wamutira rungo e Mutima mutaberi na maa, Himpo wenda nikora murimo wahunda n'iramya ebhati ebhanenwanga na mushumbu, bhushwa Ongo abhesenga uri hima nae. ³⁹ Bhate kariho ke bhinwa bhiti ebyakoranga we mo chuo ch'ebhaYuda, na ku Yerusaremu; iko bhamuya, bhamutarisha mo muti. ⁴⁰ Ongo wamufura motu rwashatu wamutunganya wasungwe. ⁴¹ Nti mo bheya bhati ina mbi kariho bhamakindi 'rondorwa na Ongo isondori, ngi bhate twarisanga ni omo hima nae kuruma erifuka rae ituka mo bhakwire. ⁴² Watwire er'irai iture bheya emwasi na kwihicha mbu iwe ngi waninkwanga bhate na Ongo. Wabhinduki mukeri wobhansa webhariho nambo ebhakwire. ⁴³ E bhatahwa bhati bhebhanga bhushwae mo rina rae kinsi ngu wamusimira wasasirwayo ebhubhi. ⁴⁴ Petero ukiri webhange ebhinwambyo Mutima washuururwa wahite ebhati ebhorukiranga ekinwa ncho. ⁴⁵ Nambi ebhetanga mor'otende, bhasimira, bhisarima ngebhatimbo bhiyanga na Petero, bhushwa muhango we Mutima ngo washuururwa wahita hotu mumbi abhesenga bhari kore mo bhubhi. ⁴⁶ Bhushwa bhorukira bho ntiye bhebhange mu mwebhe ni tata Ongo. ⁴⁷ Himpo Petero webha: inye ngi wamukocha ihangire mecha bhano bhatarubhikwingi; mubhano bhamakindi risiwa e Mutima washuururwa bhuri bhate? ⁴⁸ Webha bharubhikwe mo rina ra Yesu Kirisitu. Himpo bhamwire warike hima nabho matu mingi.