¹ Ku Ikonia Pauro na Baranaba bhakime hima kumunda n'eriramero re bhayahudi, bhebha iya m'oero ndu eimba rikiri ra bayahudi na bhagiriki bhasimira. ² Ina mumbo bhayahudi entibhasimiranga bhasheresha n'ishabho mu mitima ya bhea nti bhasimira mw'ibhaambo bhasike. ³ Ina bharika matu mingi ku Ikonia, nti bhebhange anga mitikotiko nti bhiseke kuri Nyerekuritu, nti ng'ubhereshang'ekinwa ch'enchumo na nting'usingwange iyetira eriterek'emine bhishisharo na tushingishiro. ⁴ E bhea bhe robhungu bhasiana: bhima bhabhesa n'ebhayahudi, n'e bhampe n'esantumwa. ⁵ Imbu abhesenga bhusondange bho entibhasimira n'ebhayahudi mu rwanko hima n'ebakakare bhabho, bhendekanya mw'isonda enubya n'ehumba bho. ⁶ Pauro na Baranaba, bharekiya bhorukira, bhabheke mo sambungu saku Likonia, ku Listra na ku Derbe, n'ewendende. ⁷ Nanko bhatura e mwasi wakonda. ⁸ Ku Listra, mwey'uma Okata warika hansi, utasimananga etuka wabhutwa, wabhesenga nt'utangendanga. ⁹ Ntw'erukirirengi ebwebhange Pauro, na Pauro, wamusumy'emeso wasunga nt'uri n'esimira bhushe n'iramiwa, ¹⁰ Webha mu murengy'asuma: simana mo mindy'abhe, wasimana mw'iyomere n'ienda. ¹¹ Morisunga echakia Pauro, enkumanano yakua, yebha mo mwebhe we Kilikonia: bhaongo mu bhususe bwa nwea bhamahite kokwitu. ¹² Bhabhikira Baranaba mbu ngi Seu, na Pauro mbu ngi Herme, bhushe mbw'iwe nti ngw'ebhang'ekinwa. ¹³ E murangi wa Seu, ingw'abhesenga erirameso rae nti ririkire hekur'erobhungu, warisha nkambu sibhi sa mime hima natwembo twa ntondo ha ndubhi, ntuhunange, hima n'ebhea eninkana ohembo. ¹⁴ Esantumwa Baranaba na Pauro, bharekiya bhorukira, bhabheraa esengombe sabho, n'ikanyire munkati n'ebhea, ¹⁵ Nti bhakuange: oh bhanu bhea, inki chasingwa mwanikira mbu? bhate bhea bhabhususe bhuma ninu, na twabhurishie mwasy'uma wakonda, tubhuhanange mbu mutune mbi bhikai bye bhusabhusa bhush'ebhunduke Ongo ngu'uriho, ngwaronjanga e kwiyo, echuo, enyansa n'ebhiti mbi bhiri mubyo. ¹⁶ E Ongo ngu, mo bhiranga byetanga, wasiyang'esenganda esiti semise esense sabho. ¹⁷ Nakiro mbu abhesenga utangasie rishea ebhuri we, mw'ironja bwongo mwebhuhichie etuk'ekwiyo mbura n'ebhiranga by'e bhuinu, mw'bhuninka biyo mo bwingi wabyo n'erisiya emitima yinu na ngoa. ¹⁸ Mumbyo binwa bhahangis'enkumanano mukwemima bhataninki bho er'ohembo. ¹⁹ Nampo kwiya etuka ku Antiokia na ku Ikonia bayahudi bhahundisa enkumanano na kuruma n'ehumba Pauro, bhamukurur'ekokura n'erobhungu, bhanikira mbu wamaninke. ²⁰ Ina ebhemisa bharekiya bhamamutimba wasimana, wakime mo robhungu. Mo mukomakoma, wenda ku Derbe hima na Baranaba. ²¹ Bharekiya bhamahana ndo obhungu n'ironja kikanda cha bh'emisa, bhakuruka ku Listra, ku Ikonia na ku Antiokia, ²² Mw'esimik'e mitima y'ebhemisa, mw'ihanabho bhandire mo resimira n'eshisha bho mbu myereko mingi ngi mwakime bhate mo bhubhake bwa Ongo. ²³ Bharondora bhakungu mu kinsi irameso na kuruma erihema n'irek'ererisa, bhaterekabho kuri Nyerekuritu, ing'wasimiranga bho. ²⁴ Kuruma nampo bhatianyaa ku Pisidia, bhiya ku Pamfiria, ²⁵ Bhatur'ekinwa ku Perge, n'ehite ku Ataria. ²⁶ Mundo bhirereka mw'ienda ku Antiokia, inko kwaterekwangabho mo nsansi sa Ongo, mo murimo abhesenga wamakind'ikorabho. ²⁷ Mo riya rabho, bhabhikir'erirameso, n'etura ebhiti mbi byakiya Ongo wakora nabho, na'mbu bwobhorerw'esanganda e rubhi rw'eresimira. ²⁸ Bharika bhiranga hima n'ebhemisa.