¹ Esanganda siti sa Isiraeri s' eya kuri Daudi, ku Hebroni, b' eba: sunga bate makua 'be na nyama 'be. ² Eraroso nakuba, Sauri warekiang' emubake witu, Ongo ngy' abesanga ong' wenyange. Isiraeri mishaishabo. Mukota wakw' ire: Ukurish' ebea bani Isiraeri n' ukubesa mukwakare wa Isiraeri. ³ Bumbo, ebakungu bati ba Isiraeri b' eya kuri Daudi ku Hebroni, n' emubake Daudi wakia ndani nabo ku Heburoni hamakako na Mukota. Bakubure Daudi ngaha wabese mubake wa Isiraeri. ⁴ Daudi wabesanga uri na mwaka makumi ashatu, warekia wabesa mubake makumi anye. ⁵ Ku Heburoni wasimange mwak' erinda na myeri mutuba, na ku Yerusaremu wasima myaka makumi shatu n' eshatu kuri Isiraeri ebati. ⁶ Emubake w' enda hima n' ebea bae ku Yerusaremu kakwana n' ebayebusi, bisa ncha chuo. B' eba na Daudi: utukimi kuno, bush' ebihumihumi nakuba n' ebirema basekukurucha! ng' er' ieba mbu Daudi uta kimi kuno. ⁷ Eina Daudi wating' ennkuso ya ku Sauni: ng' ekichangurwa Daudi. ⁸ Er' otu 'ndo Daudo w' eba: kinsi usehim' ebayebusi n' iya mo muhafu kinsi usehim' ebirema 'mbi n' ebihumihumi 'mbi ebarenda ba dadi. Ngy' asingwa b' eba: Ekihumihumi n' ekirema bata mukoch' ekime mo munumba. ⁹ Daudi w' itereka hankuso, ngy' abikiranga obungu rwa Daudi. Wimbamose nkaro 'siti, ekubutara na kumunde ya ku Miro. ¹⁰ Daudi w' enderan' esima n' ibesa mukwakare, na Mukota, e Ongo w' ebichiri, wabesa hima nae. ¹¹ Hiramu, mubake wa ku-Tiro, watuma beya kuri Daudi, na miti ya bisai, na bimbi na babengai bo makoi, bimbi Daudi numba. ¹² Daudi wateerera mbu Mukota wamusumya buri mubake ku-Isiraeri, na wabesanga usimanyang' bubake bwae bushw' ebea bae Isiraeri. ¹³ Daudi watinge tu bomina na bakari ba ku Yerusaremu, warekia wamatuka ku Hebburoni na bamuhute bana babume na ba bomina. ¹⁴ Sung' emina a 'mbi babutirwanga we ku yerusaremu: shamua, Shobabu, natani na Soromono; ¹⁵ Ibhari, Erishua, Nefegi na Yafia, ¹⁶ na Erishama, Eriadaa na Erifereti. ¹⁷ Ebafirisitini borukir' emwasi mbu bamakubure Daudi ngaha wabesi mubake wa Isiraeri; na batay' ebati kamusondekanya. Daudi w' erukir' emwasi wahita ekury' enkambi. ¹⁸ Ebafirisitini bahita n' insansa bana mo burambo bwa ku-Refaimu. ¹⁹ Daudi washisha: Mukota, w' eba: Nitarii ebafirisitini? Ukuria bo mo mine 'ani? Na Mukota wasubya: Taya, bushe nseriy' ebafirisitini mo mine 'abe. ²⁰ Daudi w' eya ku-Baari-Perasimu wahima bo: nko. kuruma w' eba: Mukota wamansansa ebarenda bani hamakako n' ani! buri mecha atiya. Ngy' asingwa babikir' erina rambo butaka Baari-Perasimu. ²¹ Basia nko etumoi t' wabo, Daudi n' ebea bae baria to. ²² Ebafirisitini bataya tu n' insansabana mo burambo bwa Refaimu. ²³ Daudi washisha Mukota. Na Mukota w' eba: Kiro taya, Timba bo kuruma, n' ukwehie bo busungusungu kury' emiti. ²⁴ Ukukiya umorukir' echanga ch' esankindo kumund' emiti, himpo nt' ukia tete, bushe nti Mukota ng' wendange habusondori n' abe kahim' ebbichiri bya bafirisitini. ²⁵ Daudi waronj' ebyamomw' ire Mukota, na wahim' ebafirisitini etukire ku Geba iya ku Geseri.