¹ Daudi wakumanya tu ebarai bati ba Isiraeri, mu mwanso wa bea bihumbi makumi ashatu. ² Na Daudi, hima n' ebea bati babesanga hima nae, babuch' ienda etuka ku-baara ya Yuda, mwitarish' eke soka Ongo, hamakako nako ngy' abikirairwang' erina ra Mukota min' ebichiri ing' warika munkaty' esangashani hambasirw' ekeso. ³ Baterek' ekeso ka Ongo hambasiro na katibita ka bita kashasha n' eria ko etuka mo numba ya Abinadabu hambasirw' er' ou; Ussa na Ahio, basike ba Abinadabu babesa benjange ekatibita kashasha. ⁴ Bariya ko etuka mo numba ya Abinadabu hambasirw' er' ou: Ussa nt' wendange wendend' ekeso ka Ongo, na Ahio nt' wasondor' ekeso. ⁵ Daudi n' enumba iti ya Isiraeri nti baminange hamakako na Mukota mu kinsi bususe bwa kifuya cha muti, tuhanda, tunyamurera, tuferere ngoma, moshengana minyoro. ⁶ Barekia b' eya mo buari bwa ku Nakani, Usu wasimany' emombo kury' ekeso ka Ongo n' etinge mu ko, bush' enkambu yabesang' eambyangeko. ⁷ Ebusubuky' a Mukota bwasaka buri Ussa na Ongo wamuhumba hiha-hiha bushe 'bubi bwae: Ussa wakwire mpo,kwihi ekeso ko Ongo. ⁸ Daudi wasubuka mo chamakia Mukota wahumbe Ussa kihumbo sha 'mbo basuse. Nampo habikirwa iya run' otu Peres-Ussa. ⁹ Daudi wasubaha Mukota er' otundo na w' eba: Buni busekim' ekeso ka Mukota mo mwani? ¹⁰ Nt' wahun' ekuto ekeso ka Mukota mo mwae mor' obungu rwa Daudi na wenda na ko monumba ya Obed-Edom wa ku Gati. ¹¹ Ekeso ka Mukota kariko myeri shatu mo numba ya Obea-Edom wa ku-Gethi, na Mukota wakasane Obedi-Edom n' enumba e iti. ¹² Beya k' ere mubake: E Mukota wamakasan' enumba ya Obed- Edomu n' ebbiti byae, bush' ekeso ka Ongo. Na daudi wating' ense, watarish' ekeso ka Ongo etuka mo numb' a Oberi-Edom iya mor' obungu rwa Daudi munkati na ngoa. ¹³ Ebari' ekeso ka Mukota barekia bamaronja nkaramika mutuba bakia kinsinso cha nkambu na chana chanone. ¹⁴ Daudi wamina mo maa 'e ati hamakako na Mukota na nt' wamina mukoba wa busy' asuma. ¹⁵ Daudi n' enumba iti ya Isiraeri batarish' ekeso ka Mukota mumirenge ya ngoa na mo mirenge y' etuhanda. ¹⁶ Abesa ng' ebukimengy ekeso ka Mukota mor' obungu rwa Daudi Mikari, mwisy' a Sauri, nt' ukairire ngi mo rubi rukeke, wasung' emubake uminange n' iyomere hamakako na Mukota, wamunena kumund' emutima 'e. ¹⁷ Barekia bamish' ekeso ka Mukota, baterekaka haserikako munkaty' enumba yimbenga Daudi na Daudi wasibura hamakako a Mukota nyamishwa n' ohembo rw' ikokome Mukota. ¹⁸ Daudi warekia wamakindany' itunj' ebituana, n' er' ohembo rw' er' ikokomesha Mukota, wakasanyie 'bea mor' ina ra Mukota mine bichiri. ¹⁹ Kuruma wabanyie 'bea bati, mo bihumbi biti bya Isiraeri, wabume, momina, kinsi uma kambonsa, mununku wa nyama na kambonsa kambonsa ka sabibu, n' ebea bati bakuruka, kinsi uma mo mwae. ²¹ Daudi wasako Mikari: Atuka hamakako na Mukota ing' wandondoranga kuri 'so na mo numba 'e iti mw' enitereka mukwakare mo bea b Mukota, hambasiro na Isiraeri, hamakako na Mukota nggy' akuminanga 'ni. ²² Nakomenw' esungwa tu mutetera rarenga kuri ondo, na kw' ehicha mo meso ani; nakiro mbo nsebesa n' otundo hamakako n' ebakori batikongi ongo. ²³ Na Mukari, mwisy' a Sauri nt' wabesa na mwana iyo mor' otu rw' er' oku rwae.