¹ Tusi mbu kuti erihema rino erarika mo bhate mo chuo ramabhihabhiha, turi na bhuri kimo mbingu murimo wa Ongo, bhuriki bw'ematu ati n'eati nti bh'waronjiwa na mine ya mwea. ² Turi n'ebhibhe, mumwanikire w'imbara e bhuriki bwitu bwa mo mbingu, ³ Amabhesa nti twakumanwa twambara na nti turi munkanga. ⁴ Bhushwa e matu ati arikire bhate mor' ihema ndo, tunubhange, bhushe tusondange, nty' etuka muro, ina iambara, kongo indi r' erikwa riminwe n' e karamo. ⁵ N' ewaturengekanya mu 'ncho, nti Ongo, ngwaretunink' ekikima ch'e Mutima. ⁶ E matu ati tusira mitikotiko, na tusi 'mbu mor' ibhesa kumund' emubhi uno, nti turi kore na Nyerekuritu. ⁷ Bhushwa twendange mor' esimira nti mor' ikae. ⁸ Tusira mitikotiko, na twashima 'shu etuka mo mubhi uno n' erika kwihi na Nyerekuritu. ⁹ Bhushe na 'ncho hotu tw' eninka maa mwemukokomesha, twamubhesa mo mubi, ari twamutuka muo. ¹⁰ Bhushwa twakomenwa bhate bhati esungwa hamakako n' er' obhansa rwa Kirisitu , kongo kinsi uma waninkwa etukana n' ebyakonda ari e byema byarekia we, nt' ukiri mo mubhi wae. ¹¹ Mor' esibha ebhoba bwa Nyerekuritu, tusondang' ebea batusimire; Ongo utusi, na niri n' esibha 'mbu mo mwanikire winu bhanu mutusi hotu. ¹² Nti tweriya tu bhate bhesine kuri bhanu; eina twabuninka kashangi ka kwitata bhushe bhate, kongo mukoch' isako mu 'mbi bhitatange mo by' eresungwa na nti bya kumund' e mutima. ¹³ Amabhesa nti naruka bwenge nti bhushe Ongo; amabhesa nti niri na bwenge nti bhushe bhanu. ¹⁴ Bhushwa enchime ya Ongo yatuninka muho, bhushe twasimira mbu amabhesa kuri uma watukwirenga, kai ebhati nti bhakwire; ¹⁵ Na nt' warekwire 'bhati , kongo ebhari ho bhatabhesingi ho mw' ibho bhesine, eina kuri 'ng' wakwanga n' efuka bhushe n' abho. ¹⁶ Nampo, etuk' enompena nti tusi mwea etukana n' emubhi, n' amabhese twaresibha Kirisitu etukana n' emubhi enompena nti tumusi tu mu 'mbo bhususe. ¹⁷ Kubha mwea uri kumunda na Yesu, iwe ntie mushasha. E bhikai bya kare nti byameta, Sung' ebhikai bhiti nti byamabhunduke bhishasha. ¹⁸ N' ebhiti mbyo byatuka kuri Ongo, ng' wareturonganya nae kuri Kirisitu, na ng' waretunink' emurimo w' er' ironganya. ¹⁹ Bhushwa Ongo wabhesanga nt' uri kumunda na Kirisitu, mw' ironganya echuo hima nae w' esine, mw' angi ansire bho e bhibhi byabho, na waria kumunda n' itu e kinwa ch' er' ironganya. ²⁰ Turonjange himpo murimo wa ntumwa sa Kirisitu, bhuri ongo iyetire bhate twabhubhongabhonga mo rina ra Kirisitu: mubhese nti muronganyiwa na Ongo! ²¹ Ingu nt' waresibha bhibhi, wamuronja wabhunduki bhibhi bhushe bhate, kongo twabhunduke kuri we eira ra Ongo.