¹ Ngy' asingwa mor' ibhesa n' emurimo uno etukana n' ebhonso bwaronjierwanga bhate, tutamuruha. ² Twatin' ebhikai by' esankene 'mbi bhikorwange mu nama, tusira mwenjo wa mpuse, na nti twabhundurany' ekinwa cha Ongo na bhushukishuki. Eina mor' eture r' eira, t' weninkanange mukinsi muhake wa mwea hamakako na Ongo. ³ Kubha emwasi wakonda witu ukiri wabhiswa, wabhiswa mu 'mbi ebhariminange, ⁴ Mo bhea bh' e bhubhi e ongo wa kino kiranga wareria mwerimya mo bwengy' abo, kongo bhatasungi ebhusakang' echaka ch' emwasi wakonda w' er' itatwa ra Kirisitu ng' e nsusanya ya Ongo. ⁵ Tutangatura mwasi witu bhate bhesine; mwasi wa Yesu Kirisitu ng' uturange bhate, na twetikongi 'mbu bhate bhakori bhinu bhushe Yesu. ⁶ Bhushwa Ongo, war' ebha: E chaka kisesakayo kumunda n' emwerimya! Waresach' echaka kumund' emitima y' itu, mw' ishea eresibhirir' eritatwa ra Ongo mo mbaso ya Kirisitu. ⁷ Twaria ebhusoki 'mbo mu nsara s' oto, kongo ebhunkangwe bhukiri bwabhesa bwa Ongo, na nti kuri bhate. ⁸ Twamabhesa mu kinsi bhususe bwa minubho, eina nti twakuruke kuruma; munkati n'e minubho, eina nti mw'eruka mwenyihiro. ⁹ Tunubhiwange, eina nti twasierwa; twahumbwa, eina nti twarimina; ¹⁰ Bhariya ematuati hima n' itu mo mubhi witu er' oku rwa Yesu, kongo e bhuingo bwa Yesu hotu bwasheiwa mo mubhi witu. ¹¹ Bhushwa, bhate 'mbi turi ho, twaresibhurwa mor' oku angi reke bhushwa na Yesu, kongo ekaramo ka Yesu kasungwa hotu mo mubhi witu w' er' ikwa. ¹² Bhumbo eroku rukorange kumunda n' itu, n' e karamo kakorange kumunda n' itu. ¹³ Na 'mbu bhukwengi bhate mutima uma w' er' esimira ing' webwange mukino kinwa ch' emitiro: Naresimira ngy' asingwa rebha! na bhate hotu twasimira, na bhushe nancho ngy' asingwa twebha, ¹⁴ Mor' esibha mbu ing' wafuranga Nyerekuritu Yesu wasetufurayo na bhate hotu hima na Yesu,na usetusheayo hima n' inu hamakako nae. ¹⁵ Bhushwa ebhiti 'mbi byeyange bhushe n' inu kongo ebwime, mor' ibhesa bho bwingi, bhuruye er' itatwa ra Ongo, mo bwime bwae mu bhingi. ¹⁶ Ngy' asingwa tutateteri. Na kiro emwea witu w' ekubhutara wabhihabhiha, emwea witu w' ekumunda ubhundukengi mushasha otu mw' otu. ¹⁷ Bhushwa e minubho yohoha yitu y' e kashangi kano itubhutengi, irenga kinsi ngerero, ya bhuritohe bw' itatwa r' ematu ati n' e ati. ¹⁸ Bhushe twakae, nti mu bhikai bhisungwange, eina mu 'mbi bhitangasungwa; bhushwa ebhikai 'mbi bhisungwange ibyo byieta, na nti byeresungwa ibyo byematu ati n' eati.