1 Tubhuche tu kw' itata bhate bhesine? ari twaraa, bhuri bhima, mu rwandiko rwitata bho rwatuka kuri bhanu, ari ihema ro kuri bhanu? 2 Bhanu ng' erwandiko rwitu, rwatiranyiwa kumund' emitima y' itu, isibhirwe n' esisiriswa n' ebhea bhati. 3 Bhanu rwandiko rwa Kirisitu rwesungwa, rwatiranyiwa n' emurimo witu, nti hima na bwino, eina hima n' e mutima w' e Ongo 'ng' uri ho, nti mu bhisai bya makoi, eina mu bhisai bya nyama, mo mitima. 4 E mwenyihiro 'ngo, turo nao kuri Kirisitu etuka kuri Ongo. 5 Nt' iebha mbu tukwengi bhate bhesine kara kironja kikai ch' etuka kuri bhate bhesine, Ekara kitu, nt' imbo kasaire kuri Ongo. 6 Waretubhundura ibhesa na kara kibhesa bhakori bha ndani nshasha, nti ya mitiro, eina ya Mutima, bhushwa erwandiko r' ushuranga eina e mutima urishanga karamo. 7 Na kubha e murimo w' er' oku, ing' watiranyiwa mo bhisai by' emakoi, byatatwanga, iya moero ebhana bh' ebhaisiraeri bhabhesanga bhatangakoch'esumya e meso mo mbaso ya Musa, bhushwa n' ebwime bw' embaso yae, nakiro eribhesa ebwime mbo bw' ieta, 8 Met' anga e murimo w'e Mutima ufundw' itatwa nguru! 9 Amabhes' e murimo w' erobhansa watatwanga, e murimo w' er' eira warenga bhukiri mor' itatwa. 10 Na mor' irengana ndo, ing' wamutatwange nt' waribhesaro, bhushwa na 'ndi itatwa ramurenga. 11 Himpo kwe, kubha ew' er' iyeta watatwanga, ing' wasimana watatwa irenga. 12 Mor' ibhesa na 'ngo mwenyihiro, twabhunduke nti tusira mitikotiko. 13 Na tutangaronja bhuri Musa, ng' wabhesanga ubhumbengi embaso yae, kongo ebhana b' ebhaisiraeri bhatasumyingi emeso hende n' ech' er' ieta. 14 Eina bhasum' iyorukira. Bhushwa iya runotu erekw' ebhumbe rikiri ho mo ntambi isisirisange bho 'rihano raroso, na bhatangasimana, bhushwa kuri Kirisitu ngi twatunjiwa ro. 15 Iya run' otu, umasisirisa Musa, mo mitima yabho mwarirekerwa ch' ebhumbe yo, 16 Eina emitima yamabhunduka kuri Nyerekuritu, ekibumbiro nti chatuka. 17 Nampo, Nyerekuritu, ng' e Mutima, n' e hari e Mutima wa Nyerekuritu, himpo ngy' ari eshu. 18 Bhate bhati mbi embaso sisungwange sashea er' itatwa ra Nyerekuritu, twarebhundurwa mw' ishea mbo bhususe bhuma bhuma, itatwa mw' itatwa , kuri e Mutima kuri Nyerekuritu.