¹ Nasunga mw' ani sine nti ntamukoch' ikuruke kuri bhanu mu bhonso. ² Bhushwa namaburishie bhonso, inye nti ng' wasenikokomya, kubha nti 'ngu wamarishie ani e bhonso? ³ Nakutiranya bhuri bwakuronjanga 'ni cho kongo ntasungi bhonso mor' iya r' ani mu 'mbi bhamukomenwange 'nininka ngoa, mw' anga mitikotiko kuri bhanu esangoa sani sinu kuri bhanu bhati. ⁴ Mu minubho mikiri, mu mutima wa bhonso, hima na bhiro bhingi, ngi mwakubhutiranyie ng' ani nti kongo mubhesa mu bhonso, eina kongo muteerera enchimi nkiri iri n' ani kuri bhanu. ⁵ Kwamabhesa uma ng' warish' ebhonso, nty' ani ng'wandishie 'bhonso, nti bhanu bhati, ari mw' efund' irengeresh'e mwebhe, bhima mu bhanu. ⁶ Rakomenwa mu 'ngo mwea er' obansa rwaninkwae n' e bhingi. ⁷ Nti mukoch' imusasira n' emubhongabhonga , mw' esubhaha wamukime mu bhonso bwarenga, ⁸ Nabhuhana mw' emushea kengeko ka nchime 'kuri we. ⁹ Bhushwa nabhutiranyie hotu kongo nasibha, mw' ibwereka kubha musimira mu kinsi kikai. ¹⁰ Nakubha,mu 'ngu wasasira bhanu, nti namusasira hotu; n' echakusasir' ani, kubha nakusasira kikai, nti bhushwa banu, hamakako na Kirisitu, ¹¹ Kongo nyamuraire watasiererwingi mwengerero kuri bhate, bhushwa nti twaser' emyanikiri yae. ¹² E chasiya, narekiya n' eya ku Troa mo mwasi wakonda wa Kirisitu, nakiro 'mbu Nyerekuritu wandundurenga ko rubi, nti naruhukanga mo mutima, bhushwa ntinasunganga munakitu Tito; ¹³ Ngy' asingwa , mor' irana 'ni nabho, nende ku Makedonia. ¹⁴ Ongo watatwe, ng' utuninkange kir' otu er' ikocha kumunda na Kirisitu, n' ang' wansansa kuri bhate mo bhuari bhuti e rungo rw' erimusibha. ¹⁵ Twabhesa, kuri Ongo rungo rwa Kirisitu, munkati n' ebhar' oshukara na 'mbi bharimina. ¹⁶ Mo bima, bhumbwa bw' oku, bw' eninkan' oku; mo bhampe, bhumbwa bwa karamo, bw' eninkana karamo. Na 'nye ngwarumisha 'mbi bhikai? ¹⁷ Bhushwa nti twariribhanya ekinwa cha Ongo, ebhuronjange bhingi; eina nti hima n' eira, kuri Ongo, kisingwange tw' ebha kumunda na Kirisitu hamakako na Ongo.