¹ E kinwa nchi ch'eira: kuti mweya warae mw'ikora mukungu we numba ya Ongo, nt'usondange murimo wakonda. ² Ina risondange e mukungu we numba ya Ongo nti wakomenwa w'iyekerwa, wabhume wa mumina uma, watunganana mo micho yae, mukoki ea bhea, usi 'hana mo bhinwa bya Ongo. ³ Rakomenwa nti watabhi mutamiri, nti wasua, ina mwea w'isasira, wabhuhoro nti wishima kinsi kikai. ⁴ Rakomenwa nti waranga e numba, e bhana bhae munkati ne risubhaha e riira. ⁵ Bhuhwa e mwea eutamusimamire e numba yae, bhuni ng'wamuranga we e nyumba ya Ongo. ⁶ Ntirakomenwa wabhesi mushasha mor'isimira rae. Mw'iubhuha wametundurika n'iekira mo bhansa rwa mushumbu. ⁷ Rakomenwa nti wabhese na mikorere yahunda mo bhampe, kongo watatingirwingi mo kakunda ka nyamurairi. ⁸ E Diakoni nae hotu wahwibhese mwea weira, nti mubhushubhushu, nti mutamiri na w'isondekanya mwengerero mu bhikai byema. ⁹ Nti wabhe mweya w'ebhika enama y'er'isimira mu mwanikiri washuururwa. ¹⁰ Nabho bhakomenwa ierekwa kuruma na 'mpo bhakore e murimo wa Ongo nti bhamasungwa bhasira bhibhi. ¹¹ Ne bhomona bhabho, bhakomenwa ibhe bhuubho, bh'eira, nti bhea bha bhinwa byema, bya nkene, ina bhea bhatunganana mu kinsi kikai. ¹² E bhadiakoni, bhakomenwa ibhese na mumina uma n'esimanir'e bhana bhabho n'emanumba 'bho ishu. ¹³ Bhushwa ebhakorange e murimo wa Ongo 'shu, bhabheyo n'itunda nibhe na kirinso mor' isimira na Yesu Kirisitu. ¹⁴ Na nabhutiranyie bhino hima na mwinyihiro, w'iya kuri bhanu. ¹⁵ Ina usibhanga mbu na masia usibhe bhuni bhusenda bhanu mo numba ya Ongo, nge r'irameso ra Ongo uriko nkuso na ntangiro y'er'eira. ¹⁶ Anga ndengwandengwa, e nama y'er' eshuururwa nkiri, Ingu ewakwishea mo mubhi itukana ne mutima wakoma, mw'esungwa ne sangashani, mwihana e sanganda e bhasimirwa mo chuo bharitarishiwa mu bwime.