¹ Kisha watimbanga mu mbungu na ubungu, itura e myasi yebwami bwa ôngo, na biimbi ikumi na babi akosi bari naye, ² Na bamina bima baramanga mishumbu yema na makoni, Maria wabikirwanga Magaderene, kuriwe mishumbu sirinda bamatuka; ³ Na Yoana mukari wa kura murangi wa behe wa Herode, na susana, na bampe biingi bakumukore mu behe byabo. ⁴ Nkumanano rabakakare bakumana hae, na beya bakira rubungu bakwehiya kubusondori nae, wakwemba nabo mumishunga: ⁵ Muheki wa byuma, wakutuka ieka byuma byae. Muntambi wakweka, simpe sakwenduke kwihi nansi, sanyatwa, emironge yarisa to. ⁶ Simpe sakire mu mwamba, washuka, kisha sarukwa mecha. ⁷ Simpe sendu munkati neemenke, ne menke yashuka nato, sahekengwa ne kenke. ⁸ Simpe sakire mu rooto rwahunda, sashuka ishu, sabuta byumba ata miya nima. Muntambi wembanga ebinwa mbi, watunja murenge, niemba: uungu uri ne mate yerirukira, warukire. ⁹ Ebatucha baye bamushisha,niemba: emushinga wemba buni? ¹⁰ Wasubiye: banu munikwa isiba enama ye bwami bya ôngo, Rakini kiri baampe mushinga, mwishe bamasunga, ntibasungi, na bamarukira, ntibatasimbi. ¹¹ Na maana ye mushingi uno ngeuano: Ebyumba kinwa cha ôngo. ¹² Na biimbi kwihi nense, nge barukirange, kisha nyamurairi weiya katunja ikinwa munkati ne mitima yabo, mwisha batarukiri nitokorewa. ¹³ Na biimbi bari ne mwamba nge biimbi entambi barukira kinwa, nti baripokere na ngoa, na biimbi basira miri, basadiki muntambi nkeke, kisha ntibitunja ibo kisine. ¹⁴ Nasakukire mu menke, nge biimbi barukira, niemba nabo, bakerwa ni inumba, na butumba, na bushima itunja byabo, na baate butanga byuma. ¹⁵ Rakini samu keto kyahunda, nge biimbi bari ne mitima ya koma, barukira kinwa, niibika cho mu mutima, kisha ntibabuta byuma byakonda. ¹⁶ Kusira mweya wamusacha itara naye ni iribiyayo na nyungu, ama ibikayo kumunda na ntange, Rakini wabikayo kwiyo, ata iibo basunge echaka. ¹⁷ Mwisha kusira kinwa chabikirwanga munama, kiinchi kitamusungwa, wara kinwa chaminwa, wara chaseoborwa niisaa mubutara. ¹⁸ Musunge buumbu burukirange banu; Mwisha uungu uri na kikai basemurumishiye, na uungu usira kiaki, basemunyaka ata kiinki kiri naye. ¹⁹ Rakini ninaye na banachabo beiya kukwaye, rakini ntibari musunga, mwisha beya biingi. ²⁰ Bamushisha nsoko na basike binu basimana kumbuka, basondange ikusunga. ²¹ Rakini wasako, ni ibashisha: Koyo wani na basike bitu, nge biimbi barukirange kinwa cha ôngo nerikora cho. ²² Abesanga otu ruma wakime mu mutumbu, hima ne ntucha saye, wabashisha: Tusoke mu mwiri ne nyasa. Batuka kumushi. ²³ Rakini entambi babesanga, wikinde toro. Kwabe kampungu kakiri munyasa; Ekitange kyabucha irisa mecha, babesa mu hatari. ²⁴ Beenda kukwaye niimusimo, beemba: Mukota, mukota, twashirira. Wasimuka, wafine iyuhu, neemecha ya hehera. ²⁵ Wabashisha: munyihiro winu urikuni? basubaha, nishangara bisine na bisine, nishishana: Uno inye kee? Mwisha ufinengi eriyuhu ne nyasa, ne biti bya hehera? ²⁶ Beiya mu chuo cha wagerase yakayena naku Gariraya. ²⁷ Muntambi Yesu wahitanga murooto, mweya uma warubungu , uri nabashumbu beema, wakumana naye; Ntiwambaranga ngombe matu mingi, wara ntiwarikanga mu numba, rakini musisinda. ²⁸ Entambi wasunganga Yesu, wakuwa, wakire kubusondori naye, neriemba mumurenge mukiri, niri nabe inki, Yesu musike wa ôngo uungu urikwiyo? Nikukongange, angi ininubya. ²⁹ Mwisha kweemba ebashumbu beema batuke mu mweya uungo. Mwisha kira matu abesanga bamutinge: Na iwe akosi waminwa, iminwa miri na nkondo, wakera emirinjo, warikita emashumbu mupaka mumburara. ³⁰ Yesu wamushisha: Eriina rabe inye? Jeshi; mwisha ebashumbu beema biingi bamukimiriienga. ³¹ Bamukonga bendi mu kikuka. ³² Akosi kuri himpo hiimba esampunu, ntisirisange mukikuka, bamukonga bakimi mutuhua, waninka bo ruhusa. ³³ Ne mashumbu yema watuka mweya uungo, bakime mutuhuwa, ne riimbandora hita mpaka kumbo ya nyasa, bakwa. ³⁴ Entambi ebarangi basunganga bo babeka, biendere itura mwasi murubungu na mumachwa. ³⁵ Beenda kasunga e binwa byakusaa, beiya kuri Yesu, ntiwamambara changi, na uungu uri na mutima wahunda, wasubaha. ³⁶ Na batura e mwasi buumbu e mweya wemashumbu wakuramishwa. ³⁷ Arafu e beya bibati besambungu, sirikumushi naku Wagerase, bamuhema watuke kukwabo, mwisha bakutungwa na booba mwingi, wakime mukitange, wakuruka. ³⁸ Ne mweya uungu bashumbu beema entambi batukanga kuri we, wakonga abesi hiima naye, rakini Yesu wamusunga, niemba, ³⁹ Kuruka kunumba yabe, enda kahubiri binwa bikiri biimbi ôngo wamakukore. Wenda rwaye, wahubiri murubungu ruti binwa mbi bikiri biimbi Yesu wamamurere. ⁴⁰ Basi Yesu wakurukanga, erihimba ra beya bamupokere, mwisha ebati akosi bamurindirengi. ⁴¹ Na musunge, mweya uma eriina raye ngi Yairo, weiya kukwaye, naye akosi mukakare wa mimbari; wasika mumiindi ya Yesu, wamukonga wakimi mu numba yaye ⁴² Mwisha akosi uri na kikumi, chaye kima, uungu abesanga uri na miaka ikumi na ibi, naye akosi uri kakwa. Muri enda kukwaye e beya akosi bamutuchange. ⁴³ Na mumina uma, uungu utunjange nchama miaka ikumi na ibi, na akosi wamakinda bikai byaye biti busha ne bashakiri, wara nti wariramishwa ata na mweya uma. ⁴⁴ Weiya kuruma naye, watinge eribindo ra changi yae, mara nima erikuto chamba raye rasira. ⁴⁵ Yesu wemba: Inyenge wakutinge? Mumatu iati batunanga, Petero na kira ntambi iti babesanga naye, mukota, eriimba rakutimba na ikuhekenya, na oongo weba: Inye nge wakukutinge? ⁴⁶ Yesu wemba: Mweya wakuntinge, mwisha nakusimba e maa yani amatuka. ⁴⁷ Muntambi iya e mumina wasunga kuba ntiwabiswa, weiya na ntiurubange, wahita kwansi mumindi, wabucha imuture mwasi kubsondori nee beya bibati, mwishanki wakutinge, na buumbu wakurama hiimpo. ⁴⁸ Wamushisha: Mwisi, ria e mutima wabe hima, erisimira rabe rama kuramya, enda rabe na buhoro. ⁴⁹ Muntambi akosi webange e binwa mbi, uma weiya ituka kwa mukakare wamimbari, wamushisha: Mwisi wabe wakindanya ikwa, angi isumbua mwarimu. ⁵⁰ Rakini Yesu, entambi wakurukira, wamusubiya niiemba: Angi isubaha, risiya ho naye userema. ⁵¹ Na muntambi weianga mu numba, nti waruhusunga mweya wakime naye mu numba, ira Petero na Yakob, na Yoana, na ishe na nina wemusike ungo. ⁵² Na beya biingi barirengi ni imuoborese: Rakini wemba: Angi irire, mwisha nti wakwa, rakini wikinde toro. ⁵³ Bamuseya nguru, bwisha basibanga mbu wamakwa. ⁵⁴ Watunja e bati kubutara, watinge mwine waye, wabikira ôngo, niiemba musike simana! ⁵⁵ Emutima waye wakuruka, wasimana mara nima, wabashisha banuninke biyo. ⁵⁶ Babuti baye washangara nguru, wabashisha basiture ata mweya, ekinwanki kyameeta.