¹ Utu rwa sikukuuu ya tumbosa itu tusira masaka, abesenga sikukuru ichi ya bikirwa Pasaka. ² Bakakare be numba ya ôngo ne baandiki basonda nsee ye imushura Yesu, mwisha basubahanga e beya. ³ Impo mushumbu wakime kuri Yuda, wabikirwa mu rina ra Eskariote,nae wabesenga munkati ne ntumwa ikumi na babi. ⁴ Na Yuda waromboka binu, wenda kebana ne bakakare be sa ndushu, ne bakakare be bashirikani bebane muini nsee ichi ya mukocha mbo imutinge Yesu warierwe mu mine yabo. ⁵ Benda ntibakokoma barama ima imbu wasekia bo imuninka esabai. Kuruma ne risimirana rabo, wasonda nsee impi amumutingire bo, impi abisama nti ari beya bingi. ⁷ Erutu ndu rwe tumbosa tusira masaka, rwe Pasaka, rweya. ⁸ E mubake Yesu warondora Petero na Yohana benda, wemba, mundi, kututunganyie biyo mbi ba serisa bate mu Pasaka, naturise mongo. ⁹ Na bemba, ungo usondange turwaje e byo kuni? (ao itekere byo kuni? ¹⁰ Na wasubie bo: musunge, asekia mukime munkati ne rubungu, musekumana na abume wariya ireya ra mecha ambasirwa ne muntwe; mumutuche munumba nchi ya kimire muwe. ¹¹ Na mushishe mine numba, e muhani wa kushisha, e ndaro ye bendendi iri bani? ichi ya serisire ani e kisenga che Pasaka hima ne sa ntumwa sani? ¹² Ne mweya ngo washeya bo e ndani nkiri ya kwiyu, na charengekana nguru, na kuko mubike byo shushu e biyo bye kisenga(Pasaka). ¹³ Na wenda ko, na basunga bu wakesa webange ee, na watunganya e kisenga kisira bukekeme(Pasaka). ¹⁴ Ne santambi seja, na warika hima ne sa ntumwa sae ikumi na sbi. ¹⁵ Na washisha bo, mubusha ringi namashima irisa ninu e Pasaka che tumbosa itu tusira bukekeme, hima ninu mubusondori we ikwa rani. ¹⁶ Mwisha nabushisha ani, tarisirituyo ninu rumpe utu hima na bu wasekiya neya mu wame wa tita ôngo. ¹⁷ Na waangirira e rusara washe ro kuyu watata ôngo, wemba, mutinge kino, na mubanyie munkati ninu. ¹⁸ Mwisha na bushisha banu, itukire inompina, takuomo tuyo mubwima bye misabibu itukire runotu babu wasekiyayo e wame wa ôngo weya. ¹⁹ Na hende watinge e kambosa, wakianga wamakasanyeo mukisa, wakerao, na waninka bo, na wabashisha: unonge mubii wani, ungu nabuninkao, mukie buno murikandira. ²⁰ Watinge tu e rusara rwe nchama, kuruma ne ririsa, na waninka bo, wemba: runo usara rwe nchama rwatukumanyanya ani ninu, na yase kubukayo mwisha ninu. ²¹ Na musunge, e mwine wae ungu wasenishemba twarire nae hima muntengi nima. ²² Ne mwana we beya wiendere rae ibu washishiwanga bo. Na waherwa e mwaya ngu wachurishiwanga naye. ²³ Na batangira ishisha bibati, inyengu munkati nitu wasekora e kinwa kino. ²⁴ Na asimana munkati nabo kinwa che kwishishirisha: inye munkati nitu wasebese mukakare? ²⁵ Yesu washisha bo; E bakakare be chuo basimana abasirwa na cho, nambi basimanire bo babikirwange mbu barongani. ²⁶ Inye wasebese buri banu, ungu iwe wasebese mukakare munkati ninu, iwe nge witingenga buri mwanunke, nangu waroso wabesengo buri iwe nge mukori wabo. ²⁷ Inye nge mukakare, ungu urisange ha mesa, aba ungu ukorerenge bo, aba ngu warika mwisha eririsa ha mesa nani, narika munkati ninu buri mukoreri. ²⁸ Banu, muri buri imbi bafundwanga irika nani hima munkati ni misona yani. ²⁹ Ashibwa na bubike banu e wame winu, buri wakianga tita wani wani wanibikire bo. ³⁰ Mukoche irisa na iomo mu mwesa yani mu wame wani, na irika ambasirwa ne bitumbi wame, na ikera e sambasa se nganda ikumi na sibi sa ku Israeri. ³¹ Mukota wemba: Simoni, Simoni, sunga mushumbu usonda ibufufura buri mumpunge(ngano). ³² Hima na mahemo ungo, mwisha e isimira rabe ratateteri, na ôngo asekia ubunduka, usubukianga banakinu. ³³ Mukota, washisha bo muheme, ani nirihano mwine rienda babe e kumuyororo na mpi asekwire oongo. ³⁴ Na Yesu wemba: Petero, nakushisha mbu, ee nkoko yasekia yatamabikira runotu meta ashatu usebese tu umanituna meta ashatu umbu oongo ntunisi. ³⁵ Wamushisha tu: kumba na butamanga nti banu musira kakumbu, na musira kuu, musira tunyantiriro, mubesenga ntimurikirirwa nkii? Bamusubie mbu kusira. ³⁶ Na washisha bo: nge bumbo, inompina ungu une kakumbu watinge ko na ungu urine kuu naye watinge yo, nangu usira e bupanga wachurishe e nchangi yae na wachure bupanga(kihara). ³⁷ Mwisha, nabushisha banu, e kinwa nchi chatirwanga chebanga mwisha ani: ungu wabesenga wareasirwa hima ne bambu bambu, mwisha kuri ende yambi baasirwange hima nani. ³⁸ Wemba, mukota, sunga e mapanga abi, na washisha bo: incho charengeka. ³⁹ Wakianga wamatuka mpo, wende ungo nge abesenga mwicho wae, wenda mu rou rwa kumizeituni, ne wa ntumwa sae nato sa mutucha. ⁴⁰ Na wakianga wameya mpo, washisha bo, muheme, mwisha mumukime mumayaribu. ⁴¹ Na kuruma wikito kwihi na wenda kore nabo ashibwe washee ntambi ye ihema, na wakome mari, wahema, ⁴² Wemba, tita, kutinjima e rusara runo rwe minubo rwa nietere kore! ntiishima rani nge riro njewe, habanga nti ishima rabe. ⁴³ Kuruma e maraika watuka kwiyo(mumbingu) wahita, wamuninka maa. ⁴⁴ Na wabesanga unine wahe yuru wabunduke tu uhemange chuka,ne satubano sae sabesenga sihitange buri nchama, ni roka kwansi. ⁴⁵ Wakianga wamatuka muihema wasimana, wenda kwihi ne sa ntumwa sae, wa kumana bo ntimamenda toro wabunduke na boonso. ⁴⁶ Washisha bo: murikere toro? tusimane na muheme, mwisha mumukimirirwa na mayaribu. ⁴⁷ Na wabesanga nti ukiri webange, wasunga, kikanda cheya, nangu wabikirwa Yuda, uma mu sa ntumwa sae, kumi na babi, wasimana kubusondori nae, wamukoke Yesu, na wa murumba, ⁴⁸ Na Yesu wamushisha, Yuda, ntiinirumba ndo oongo uchurisha e mwana we beya? ⁴⁹ Nambi babesenga na Yesu, basunga mbi bisondange iya, wemba, mukota, tukaso bo mapanga? ⁵⁰ Na uma mubo wakaso bupanga ntumwa nima ya bakakare be makuhani wakera e kote kwe kwa bume. ⁵¹ Ina Yesu, watinge kinwa, wemba: reke, angaikia bo, watinge e kote kwango mweya, wamurandia tuko. ⁵² Yesu washisha e bakakare be makuhani, ne bakakre be numba ya ôngo, ne bakungu, ibi beyanga kumukwanya: mukuya, buri ani mwimbi, mwiya na mapanga ne tushushu. ⁵³ Na besenga ninu hima kira utu kumunda ne numba ya ôngo, nti munanonga e mine inu mwisha nani, ina muntambi ino, mubese ne maa ema(e bubi). ⁵⁴ Wakianga bamatinge Yesu, bamuria, bamuisha mu numba ye mukakare we makuhani, Petero wamutucha nturi kore nae. ⁵⁵ Babesenga basacha mutura wa kasha munkati ne butara, na barika mpo, Petero nae warika munkati nabo. ⁵⁶ Na mukori wa mumina wa numba ya ôngo, wamusunga mu chaka che kasha nti urimukanti nabo, wamusumwa meso, wemba, e abume uno nae uuma mubo. ⁵⁷ Watuna wemba, oongo mumina, ani nti nimusi. ⁵⁸ Na kuruma na ntambi nkeke, umpe weya, nae wamusunga, wemba, na oongo uuma mubo, na Petero wemba, oongo abume, ani ntinimusi. ⁵⁹ Na kuruma na ntambi nima, umpe mweya wisimwa, wemba, yiira e abume uno uuma mubo, uno nae wakesa uri nae mwisha iwe nae mugariraya. ⁶⁰ Petero wabusubie, oongo abume ani ntinusi bwebange oongo e mweya ungo ntinimusi, na muntambi nkeke, nawabesenga ukiri webanga, e nkoko yabikira. ⁶¹ Mukota, wikebera, wamutarishie Petero wakandira e kinwa cha mushishanga mukota, e kubusondori ne nkoko ibikira runotu, usebese nti umanituna meta ashatu. ⁶² Wakianga wamasunga bo wasaa kubutara, nti urenge bwisha ne hahe wingi. ⁶³ Ne beya mbi batingenga Yesu, babesenga bamuturenge ntee ne rimukama. ⁶⁴ Bamubube e meso, na bamushishirisha, bemba, ishishe mbu inye wakukaso? ⁶⁵ Ne iyebemba binwa bingi bingi mwisha nae bwa imukamba. ⁶⁶ Na abesenga mukumakoma nguru, bakumanena e bakungu be ndushu, ne bakakare be bashirikani, ne baandiki, bakumanena ne rimurisha Yesu mu rushu rwabo. ⁶⁷ Bemba, oongo i mukota Yesu, tushishe. Yesu ane wasubie bo amubesenge ani inabushi kuba mutakoche inirisia, ⁶⁸ Na kumba na makushisha, mutakoche inirisia. ⁶⁹ Itukire inompina e mwana we beya warika mu mabawe kwa bume mu maa a tita ôngo. ⁷⁰ Bibati wemba, oongo nge mwana wa ôngo? nae wasubie e bo, mumemba, ani nge uno. ⁷¹ Bemba, tusondange tu e riira rini? Mwisha twamirikirire mu buunu wae wisine.