¹ Yesu wabesanga uhemange mundikaro nima mbu. Wakianga wamakinda, umoma we santumwa sae wamushisha: Mukota, tuhane bate ihema, wakianga Yohana wahana e santumwa sae. ² Washisha bo mbu muntambi nchi isondange banu ihema mwembi buno: Tita witu oongo urie kwiyo, Eriina rabe rishurukare, ewame wabe uye, erishima rabe rironjiwe, buri e kwiyo, na kuno kwansi. ³ Tuninke kira utu e biyo witu ibi bwa rengekana. ⁴ Tusasire e bibi bitu, mwisha baate nabo tusasire mbi nabo bari ne minda yitu; Anga iturisha mu misona, embu tukito hoo mu bubi. ⁵ Washisha bo tu: Inye mubana ungu uri na mira wae wama muendere munkati na butu, wama mushisha, mirani,nsindike tumbosa tushatu, ⁶ Mwisha mira wani uma wameya mu mwani utukange mu rwendo rwae, na ani nisira kikai cha imuninka? ⁷ Naye wamusubie, wamushisha, anga ininubya mwisha e rumbi rwa makinda irindikwa ne baana bani ba menda toro na nihotu mu santange, takochi isimana tu nikuninke e tumbosa. ⁸ Na bushisha baanu, na kuba iwe watakutuka imuninka mwisha iwe mira wae, Ebu mwisha ne muho wae asesa ni imuninka bibiti bii bya muwe. ⁹ Nani, nabushisha baanu: Muheme na museninkwa; musonde na museshee; mukongete na muse rindurwa. ¹⁰ Mwisha kira mwea ngu ukongange waseninkwa, nangu usondange waseshe, nangu ukongotange waserindurwa. ¹¹ Inye munkati ninu mwana wae wama konga ishe kambosa wamuninke ikoi? Aba wamakonga kikwa, wamuninke nsoka? ¹² Aba wamamukonga iyi, wamuninke nkutu? ¹³ Kuba baanu mbii e bimbi banu musi ininka e bana binu bisambo bya konda, asembere ani iso baanu ôngo winu ungu urie kwiyu waseninka bibati imbi bamuhemange mutima mutaberi? ¹⁴ Emubake Yesu warikitanyanga e kihindi cha besenga mu karumbu. Akianga icho kihindi cha tuka, e karumbu, kemba, e kumanano ya sunga bishisharo. ¹⁵ Imbu bima mumbo wemba: wakito e kihindi kuri Berzeburi, mukakare we bihindi bwema. ¹⁶ Ne bampe, bamu shoshoroshange, basonda kurie kiterere ituka kokiyo(mumbingu). ¹⁷ Mwisha Yesu nae wasimba e wenge wabo, washisha bo, kira wame waseikito kumushi nae wisine wase bishwa bishwa, na kira numba yasikito kuri nimpe yase enduka. ¹⁸ Nakuba mushumbu wikito nae wisine, e wame wae wasesimana buni? Mwisha wanu mwebange mbu nirikitange e bihindi bwema kuri Berzeburi. ¹⁹ Nakuba ani, nirikitanyange e bashumbu kuri Berzeburi, e baana binu, barikitangange bo kuri nye? Mwisha imbi wasebese bakeri be rubansa . ²⁰ Imbu, kama ani nirikitange mushumbu mu katonya ka ôngo wasehiere kuri baanu. ²¹ Kuba mwea ngu wemaha, na uri ne bitumbu twae, urangange e numba yae, e butumba wae ntiwaruhuka. ²² Kuba kuringu uri ne maa mingi wameya ku kwaye wamanufundisa, ni imubaka e bikumbura byae bibiti bakesa binyihiree, nibanya kumbuyae. ²³ KIra mwea ngu turi nani e wengi mushumba wani, nangu watangarire nani, tuserekanyange. ²⁴ Muntambi incho e murenda wasekia wamatuka mu mwea, twenda ukiange ukukusira mecha, murisonda nkuu kwaseruhukee, akumba tuwasungao, tweba: nasekurukire tu mu numba yani impi atukirenga nani. ²⁵ Na, wamakuruka tu, wamasunga mo mwamahairwa, naitunganiwa. ²⁶ Na impo ntienda tu kusonda simpe sirinda insi sema imurenga wisine: na iya nikime nirika kumunda; ne hari ye hende ye mwea ungu ya sebe yema tu nguru irenga ya roso. ²⁷ Akianga Yesu tuwebange embi mwambo, mumina uma, munkati ne kumanano wakuwa mumurenge, wamushisha; rakasanirwa ebura mbu wakutuka mu oongo! Ne mambere ngi abutanga oongo. ²⁸ Na wasubya: Rarengekana bakasanirwa mbi barikirange e kinwa cha ôngo ne ribibika cho. ²⁹ Muntambi ekumano babesanga ntibakumananange kurie, watangira iyeba: Ebuta ino buta yema, basondange kiterere na batakochi ishe e kiterere, inchi kiterere cha musheheri Yona. ³⁰ Mwisha kuba Yona wabesanga kiterere kuri e bea ba Kuninawi, ngee bumbo mwana we byeya wasebunduke yo we mubuto ino. ³¹ Markia we bubisha wasesimana yo murutu ndu rwa hende, ima ne buto shi, nikererebo e rumbansa; mwisha wakuya ituka kende e chuo warikire e wenge wa Soromono, ne mukakare irenga Soromono uri ano. ³² Ebea ba ku Ninawi basesimana e rutu rwa hende ima ne babuto ndu, nabo basekerere bo erubansa mwisha bakusia ebibi ne ritura e kinwa cha ôngo kwa Yona, nasunga, mukakare kuri Yona uri ano. ³³ Kusira mwea wamushisha eritara ne ririyaro impi abisama amba kumunda ne mutundu, rarengekana iriyaro ambasirwa ne ruu, mwisha mbi basekime basunge chaka. ³⁴ Itara ra mumbi ntieriso, impo eriso rambe kumba racha emumbi wambe uti nao tuwambese nao na chaka. ³⁵ Sunga impo, incho chaka nkiri kumunda nambe chatambunduke tu kindi. ³⁶ Kuba e mumbi wambe uti uri na chaka, kuba asira chunda cha kindi kumunda, emumbi wawe wasembese na chaka kukuti, kuba eritara ramakuninka chaka mwisha ne ringerimwa raro. ³⁷ Muntambi nchi nti Yesu webange, Mufarisayo uma wamukonga wende kurisire mu mwae, wakime warika impi ariebibiyo. ³⁸ Ungo Mufarisayo wamusunga, washangara, mwisha wamusunga urisange ntiti wakushua mine. ³⁹ Mukota wa mushisha: banu, bafarisayo, banu musi hoo ishua kumushi ne rusara ne ntengi, sinu kumunda ninu kusisere buchombya na bumbi. ⁴⁰ Ebanu e bitengi; ungu wakiria e butara ntiwe tu ii, wamukiria ne kumuna? ⁴¹ Hewo tukito e bisambo bye bikai imbi biri kumunda, na sunga, bikai bibiti bya koma kuri banu. ⁴² Hewo muherwa banu Wafarisayo, mwisha banu mutuange kori se munanao ne karikoko na kira nyenyi, ina musia e rumbansa, ne mashima ne a ôngo; Rabesanga rakonga banu ironja e binwa byo roso na anga isiya byo bya metambi. ⁴³ Muherwa banu bafarisayo, mwisha banu mushima e bitumbi bi bya busondori ye masinagoki, ne rikeerwa mu soko. ⁴⁴ Muherwa banu, mwisha mususanya ne sasinda satangasumbwa, ne bea bibetange iyuu nata na ntitibasi. ⁴⁵ Uma munkati nabo bemwamba, wamushisha bo, muhani,murieba bo oongo umatukamba bate. ⁴⁶ Na Yesu wasubya; muherwa banu tu, mwisha muriya tu miriyo ye wahe nguru iyu ne bea, na banu bisine mutangatinge ne miriyo cho na kuba natutonya tunu anga ne kima. ⁴⁷ Muherwa banu mwisha banu mutimange e sasinda se basheheri, na baso bani ii bakushura bo. ⁴⁸ Nge bumbo banu muturange ne ririsiya mikorere ye baso banu, mwisha imbo bakushura bo, na banu mutimange e sasinda sabo. ⁴⁹ Na mwisha ne wenge wa ôngo webambu, na seburebeka e basheeri ne santumwa sa ôngo, ne bampe babo baseshura bo ne rinumbwa bo. ⁵⁰ Mwisha echama iti nchi ye basheeri inchi ya ritambange itukire kare ibese iyu ne buta ino. ⁵¹ Itukire e chama ya Aberi yarita bo ne chama ya Zakaria ungu wa kwirenga mu mimbari ye numba ya ôngo, na bumbo nibushishange banu, nge wasebeseyo mu buto ino. ⁵² Maherwa banu bakeri be binwa, mwisha mukurimunya erufunguro rwe wenge: banu kisine, na ntimu kukime na mukurindikire imbi bakesa basondange ikime. ⁵³ Na wakianga wamemba ebinwa bo kuri bo, ebaandiki ne Mafarisayo, babucha imutindika, ni imushosha ne imushisha binwa bingi. ⁵⁴ Bamutea kinwa kituke mu bunu wae chema kuba banu songere.