¹ Nya buzaga, ka Mungu aka kabulila bandu bage? nanga! kulya nani, nili mu Israeli, nuguma ba bakabutwa nya Ibrahimu, mundu wu mulala gwa Benyamini. ² Mungu ataka sindikira hale bandu bage, kazi akamanya kulyokera butazi. ili kandi muliji kulya kukadetwa nyi nzarango hanya lya Eliya? ngako akashongera ba Israeli imbele lya Mungu. ³ Naha mwetu, bita balagu babe bashomola lutali zabe, nani nya sigala nyenene, banyagwete banaloza banyite. Bandyose mutima. ⁴ Ti, kute Mungu aka mushuza? ngwete mbiko ya bandi bihumbi bilinda a batake fukamira Baali. ⁵ Ko kunali mwa bino bishazi bya zene, hakili, byasigala, nga bulondozi bwu lukogo. ⁶ Ti koko, ili bili hanyanya lu lukogo, zilakili ngolezi. yaho lukogo lutangabe lukogo. ⁷ Kute kwaba? kazi kyo Israeli ashuba ke looza, ataka kibona, ti balya bakalondolwa bakakibona nya bandi bakabilwa kinyemerere. ⁸ Ngako baka bisaranga, Mungu aka baheza Mutima gu kuhunira, masu ti gi mihuta, matrire gi minduva, kili luno lusiku lwa zene. ⁹ Nya Daudi adesire, nyu lungetenge lwabo luba bere katego, nya kasira i biga bahirimwa, lube luhembo i mwabo. ¹⁰ Masu gabe gabikwe kizizi lyo batabone, ubagondanye mgogo gwabo siku zoshi. ¹¹ Kuko nya deta ka! basitala ly'ukuli bahiline? leka! ti hanyanya lya mahubigabo bana birongo baka kululwa, lya bonene babikwe bongwa. ¹² Kuko, ili buhubi bwabo bukola bugale bwi kihugo, nyu kwanguhirwa kwabo bukola bugale bwa bana biringo, ka kubwira kwabo kutali kwingi.? ¹³ Ti koke nya deta nya nyenu, mwe muli bandu ba bana birongo. ngako, nili ndumwa w bandu ba bana birongo, nyi ganira mukolwa gwani. ¹⁴ Ni hashe kubabika bongwa abagwete muko muguma nya nyani nyuku bakulula baguma babo. ¹⁵ Kulya ili byangaba kukabulwa kwabo kukadeta kwijibanya mwi kihungo, ka kwemerira kwabo kugaala biki ili batali buguma buzila kufa. ¹⁶ Kandi nga bihumbulwa bitazi bikyesiwe bindi byoshi bigaba bishuke, nga i sina lyangaba likyesiwe kili nya mashangatabi nyabo kuko. ¹⁷ Ti koke ili byangaba gandi mashangatabi gaka twiwa, nya nabe wulinga kati kabuzuwe Mzeituni wu mumuzitu wana shoshekwa yaho ha kati wanyaba muguma wa yako kati ki Mzeituni nyu bunono bwage. ¹⁸ Utakolagwa kwigana hanyanya lyi mitabi yage, nili kandi wang'itunda atali we yuye utwazile isina ti lili isina lyo likuhesire we yuye. ¹⁹ Kuko ugadeta mitabi yage ika twiwa lyo nyehe ni shogekwe. ²⁰ Kwija gakatwiwa kushimbana nyi kutemera kwabo, nya nyabe wimazire kwi bwemere bwabe uti tundaga, ti wobaye. ²¹ Kulya, iliangaba Mungu atakasiga mitabi a gakabumbwa kwa yako kati, nya nyabe ataga kusiga. ²² Lolekeza, kuko bwija nyu bukali bwa Mungu, mwa balya bakali bwa Mungu, mwa balya bakahirima, bukali, t'imwabe wehe buli bwija bwa Mungu unya bezire mwalibo, ili bitali kuko we yuye nabe banga kutwire. ²³ Na yabo geke, bataka bera yuko kutaba nyu bwemere, bagashoshweka, kulya Mungu agwete buhashe byuku bashogeka kandi. ²⁴ Kulya, ili wehe ukatwiwa bana kulyosa kwa yako kati kabuziwe mzeituni gu mu muzitu nga ko guli, wanashogwa, utanali wako kati, ti wana shogekwa mwa yugo mzeituni mwija, ka katumeneni yabo abali ba yugo mzeituni kuhasha nyukushogekwa mwa yugo mzeituni benene?. ²⁵ Kulya, bane wetu, ndasimiri mutamanye ino mbisho, lyo mutibone kuba nu bwenge, kulya kitolo kya ba Israeli bakahirina, nyuku nyema alinde bana birongo bingire. ²⁶ Kuko ba Israeli boshi bagakira, ngako bika sarangwa, mukuluzi agija kulyoka, Sayuni aga gaba Yakobo nya bubi bwage. ²⁷ Na kino kyo kilagane kyani nalibo, nimali balyoseza mabi gabo. ²⁸ Kuko kushimbana numwazi mwija bakola bagoma hanyanya lyenu, ti kushimbana nyu bulondozi bakola basimwa hanyanya lya ba data. ²⁹ Kulya bigabi bya Mungu bita gweti mbahazi ili kandi kubuziwa kwage. ³⁰ Ngako nenu butazi muka mutengusha Mungu, ti kukuno mwabo na lukogo kulya bakatenguha. ³¹ Yabo nabo geke kukuna batenguha ngako mwangahewa lukogo nyabo bahewe lukogo. ³² Kulya Mungu abashwesire boshi kuguma mwa yubo butengu lyo abakoge boshi. ³³ Ngako buli bukulu bwu bugale nyu bwenge nya kumanya kwa Mungu gatangalolwa, ili kandi njila zage zitake lozwa.! ³⁴ Kulya alinyande ukamanya mugererezo gwa nawetu? ali nande ukaba mushunguzi wage. ³⁵ Ali nande ukamuheza yehe kindu kitazi, naye agahembwa kandi?. ³⁶ Kulya bindu byoshi bilyosire imwage, bili mu buhashe bwage. Kandi bigalusire imwage. Bulangashane buli naliye myakula kube.