¹ Mwa yizo siku, bandu bingi bwenene, banyashubi sholokera hali Yesu. yabo bandu bataligwete byo bagolya kyanyatuma Yesu agabuza bigizibwa bage. Anyabwira, ² "Bano bandu nya buvirw'imbonga kulya zikola siku zishatu zino tulihaguma nyabo, batanyaki gwet'ibiriwa. ³ Ndaloziziz bagende banya koli shalisire, kulya baguma babo bagalyokerera hale, halimang'umwena ga nga baho leza mu njira." ⁴ Bigizibwa bage bayamushuza, "Mwa guno muzitu hahe mund'angabon'ibiriwa byuku bigusa? ⁵ Yesu anya babuza, "mugwet'imikat'inga?" nyabo ba nyashuza "Tugwet'imikat'irinda" ⁶ Yabo bandu boshi, Yesu anyababwira, babudatale hashi, anyang'irya mikati kwir'irinda, anyeresa masu mukyanya anyahuna Mungu. anyagikojola kojola, anyagiheza bigizibwa bage bagabire bandu. Nya bigizibwa bage banya gyanga nyuku gabira bandu. ⁷ Baligwete nyi bishonga bigerwa. Yesu anyashubi hana mukong'imwa Mungu hanya lyazo, nyazo anya shubi deta ko bzigabire bandu. ⁸ Boshi bakalya nyu kwiguta, hanyuma bigizibwa banyatola bitolo b'imikati nyi bi samaki. iyo misigala yanyiji za ngega zirinda zi juire! ⁹ Bandu bakalya, bali nga bihumbi bine. Iri Yesu abasenguruka, ¹⁰ Anyashonera mu bwato, kuguma nya bigizibwa bage, banyagenda luhande lui Dalimanuta. ¹¹ Bafarisayo, banyijira Yesu, banya muleza, mu kumuhun'ikyereso ki mitangaza ky'ukulyok'imwa Mungu. ¹² Yesu anyakungumir'i mutima bwenene, anyadeta ku kuno, "Mwe bandu bakino kibusi, kituma biki mugwete mugaloz'ikyereso ki kitangaza? nyamubwir'ukuli, ko nfakyo nga mweres." ¹³ Iri Yesu adeta kuko, anyabasiga, anyshubi shonera mu bwato, anyajabuk'inyaja. ¹⁴ Bishaz bigizibwa ba Yesu balimu bwato, lali nyu mukati muguma, banyi bagir'ukutwal'igindi. ¹⁵ Yesu anya bakengula kukuno, "Mukazi nyi samaya Bafarisayo, nyi ya Herode." ¹⁶ Bigizibwa banyatondera kuga muzania, ti, "Ibitumire aga deta kuko, ka kuly'indayo mikati tugwete." ¹⁷ Yibyo bakadeta Yesu anya bimanya, kyanya tuma agababwira, "Hanyanya li biki mugwete mugabwirana, hanyanya lyuku gosh'imikati? ka mutazi manya kuko? ka mutazi soba nukirwa? ti mukanyizi imitima Yesu. ¹⁸ Mugwete kagungutima? Mugwete masu ti gatali gu kubona? Mugwete matwiri ti gatali gu kuvwa? Mutanyagweti geke lukenge? ¹⁹ Lyo nga gabilya mikati tano nyu kuheza bilya bihumbi bitano bya bandum muka gushikanya ngenga zinga izijwire bihande byaliyo? Banamushuzam ngenga zirinda. ²⁰ Anya shubi babuza, "Nya balya bandu bihumbi bine nyabo ka mutakikengeri kazi ko bakiguta kwirya mikati irinda naho? Mwa yabo mukatol'imisigala yi ngega zinga?" nyabo, ti, "Ikujuza ngega zirinda," ²¹ Yesu anyabuza, "Aho! ka kili kukuno mutazi sobanukwirwa? ²² Yesy nya bigizibwa bag'iri baka hika mwa kaya ki Betsaida abandu, banyabadeter'imundu utake bona (imbumi) banya mwinginga agihume kwiyo mbumi. ²³ Yesu anyagwatir'iyo mbumi bukuboko, anyagihengukan'inyuma lya kaya, anyagitwira mate kwa masu anyushubi gibika kwa maboko, anyagibuza, "Ka hali kind'ubuine." ²⁴ Irya mbumi ya nyina mula masu yanya deta, "Ngoli buime bandu, ti babonesire bga tuti tugwete tugagenga." ²⁵ Yesu anyashubi gihuma ku masu. Lero yanya langiza bwenene, yanya humuka, yanya bon'ibindu byoshi. ²⁶ Yesu anya mubwira, "Ugendag'imabe! utakilenge mu kaya." ²⁷ Yesu anyalyoka yaho nya bigizibwa bage anyagenda agalenga mu twaya twi mwimbande zi Kaisaria Filipi bashazi bakaba bakiri mu njira, anyababuza, "Aho bandu bagwete bagadeta ko ndi nyande.?" ²⁸ Banyamushuza, "Baguma, bagwete bagadeta ko we Yohana wukuvubika, nyabandi mbu we Elia, nya bandi mbuli muguma wa mu balevi (manabii) ²⁹ Yesu anyashubi babuza, "Mwehe, nyenu mugwete muga deta ko ndi nyande?" Petro anyashuza, "Wehe we ulya Masiya." ³⁰ Haaho, Yesu anyaba homereza ko hatagire mundu ye uga banyisa hanyanya lyage. ³¹ Yesu anyatinder'agiz'abigizibwa bage kukuno, Mwana wu mund'uwemenene kuli buzima kwi njira nyingi. Agalahirwa nya bashaja ba Bahayudi, nya bakulu ba bagingi, nya bigiza bimaja anyitwe ti koke ku lusiku lwa kashatu anyafuke. ³² Bishazi Yesu akabwira bigizibwa bage kuko, lero kwali kola ku bwera nyange. Kuko Petro anyamu hengukana. ³³ Ti koke Yesu anya kebegana, anyalola ku nigizibwa bage, anya kanufire Petro kukuno, " E shetani lyoka habutambi lyani! Kulya utagweti mutono kwi lya MMungu, ti kwa bandu. ³⁴ Yesu anyabuza yabo bandu boshi kuguma nya bigizibwa bage, anya babwira kukuno, "Iri mundu agaloza kunjimba, ilahire yenye, anya betule nyu muzigo gwage yenene azindi njimba. ³⁵ Mundu akaloza kukiz'ite lyage, yu galitera, ti kok'iyanga litera hanyanya lyani, nya hanyanya li myazi mija lyoke ahalikiza. ³⁶ Iri mundu angabona byu mwi kihuo byosi anyitere yenene bikage yibyo angaba unguka? ³⁷ Nyi biki byo anga tanga ly'ikiza? ti ndabyo! ³⁸ Bandu ba kino kibusi kibi, batatwazizi Mungu! Mundu wa bino bishazi iryangab'al'imbere lyabo anyafwagage nyi shoni hanyanya l'ibinwa lyani, uye, ye Mwana wu mundu agiji fwira kwi bishazi, agija mu bulangashane bw'ishe ali kuguma nya baganda bage batahule!"