¹ Hanyuma Yesu nya bigizibwa bage banya jabuk'inyaja, banya hika mwi kihugo kya Bagerasi. ² Iri Yesu ashonoka mu bwato anyashanganana nyu musire muguma ulyosire mwa maherero i makaburi, ³ Mwa yago maherero mwa nyalike kota, ndaye mundu wali hashire ku mushweka, kiri migozi. ⁴ Kulya balike lozigira mbu bamushweke nyi minyo roro, nyi mirinda batanya hashe, yilyo byoshi arike bitwa, ndaye waligwete misi yu ku mu hasha. ⁵ Bishazi byoshi, bushigi nyu mushi alike soka soka mwa yago maherero (makabwi) kiri nyu mwi migazi aligwet'agamiriza nyu kwitema tema nya mawe. ⁶ Uye musire, irya langiza Yesu kwa hare, anya tibitira mund'ali, anya fukam'imbere lyage. ⁷ Urya musire anyamiza, ti, "E Yesu Mwana wa Mungu, uli hanyanya lya byoshi, bikagi, ondozize. Ko mashi Mwana wa Mungu, utandibuze." ⁸ Yesu anyadeta, "E muhusi lyoka muyu mundu!" ⁹ Yesu anyamubuza, "Izina lyabe we nyande? anyamushuza, izina lyani nye Legioni kulia tuli bingi." ¹⁰ Yabo bazimu banya mwinginga bwenene atabahire mwa yikyo kihugo. ¹¹ Nyu mwijo migazi, mwali lukuli lwi ngulube. ¹² Yabo bazimu, banya mubwura, banyadeta, tubike mukati lya zino ngulube, twingire mwabo. ¹³ Anyemera yabo bazimu. Iyo mihusi yanya ryoka yanyingira mukati lya yizo ngulube; nya yu lo lukuli loshi lya yizo ngulube lunyagendi kwi lasha mwa nyaja. ¹⁴ Abangere bazo banya tibitir'ikaya, kiri nya mwa mandalo, bangendi bwira bene nyi ngulube kwo byaba. ¹⁵ Iri bakahika hali Yesu, banyashang'ulya mundu mira alyosiwa mwiyo mihusi (bazimu) anya kola kwembir'iri milondo, anya budetere, anya kola mugumana. Balya band'iri babona kuko banya gwatwa nyi kyoba. ¹⁶ Balya bakibonera kazi byakoleka kuye musire nyu kwa yizo ngulube, banya babwira byo. ¹⁷ Yabo bandu, banyinginga Yesu mbu ashanhwe mwi kihugo kyabo. ¹⁸ Iriakaba akola agashonera mu bwato, uye mund'ushibi sirehire, anya mwinginga ko bagende boshi kuguma. ¹⁹ Ti Yesu atakamwemerera, anya mubwir'agend'imwage. Ugendi bwira bene wenu bindu bikuhuna wetu akugirira nyu ko akukiza. ²⁰ Anyigendera, anyatondera kwigiriza mukati li Dekapoli, bindu bikulu Yesu amugirira. Bandu boshi banyatangala. ²¹ Yesu anyashubi kwingira mu bwato. Iryakaba mir'ajabuk'inyaja, bandu bingi bwenene banyasholokera ho alikwibuga. ²² Hanyijag'umundu muguma izina lyage ye yairo, wu mwi nyumba yi mishanga nano ya Bayahudi, uye yairo iryabana Yesu anyafukam'imbere lyage. ²³ Anya mwinginga bwenene, ti, "Munyere wani akola bu fwa. Wij'umubike, ko maboko aga kira nyukuba mugumana!" ²⁴ Kuko Yesu nya yairo banyagendanwa, nya bandu bingi banyamushima, bagwete baganya musinda sinda. ²⁵ Nyu mukati lyabo, mwali mukazi, uwali mahisa miaka ikumi ny'ibiri, ali nyu bulwazi bu kulyoka muko. ²⁶ Uye mukazi akalibula bwenene! aligwete agabu kwa nya bafumu bingi-bingi, alimali kusa bindu atanyakira, ubulwazi bwanakaya kuhima waligwete butazi. ²⁷ Iry'uye mukazi wva miazi ya Yesu, akij'inyuma, nyu kwingira mukati li ndelo ya bandu binyuma, nyu kuhuma ku mulondo gwage. ²⁸ Kulya aligwet'agisaliza, ti, "Iri nyanga huma na ho ku mulondo gwage, ngakira." ²⁹ Kuko, iri akaguhuma ko gulia muko gwanya kala. Uye mukazi anyuva kwa magala gage kwa kira loshi. ³⁰ Yesu anyiyuva ko misi yamulyoka mo, kyanyatuma aga kebegana, "Anyabuza bandu, inde wambuma kwi byambalwa?" ³¹ Abigizibwa bage banya mushuza, "E mashi mwigiriza ti wenene ubuine ko bandu bagwete bagisinda-sinda ku we. Kutage utubuzize kwinde wa mbuma ko?" ³² Kulya kuko, Yesu anyabaleza-leza mwa masu abone kazi wa muhuma ko. ³³ Uye mukazi alikwiji kwa kira, kyanyatuma agiji fukam'imbere lya Yesu, agwete, aganya juguma nyu koboha. Anyiji kwi kabula kwa magulu gage nyuku mubwira byoshi by'ukuri. ³⁴ Yesu anya mubwira, "Munyere wani bwemere bwa mutula, bulwazi bwabe bwa kira." ³⁵ Iri Yesu akaba akigwete agadeta, hanyija bantu kulyoka muye mukulu yairo, banyamubwira, "E waliha! Munyere wabe mir'afwa, utaki luhye mwigiriza!" ³⁶ Bishazi bakiji bwira yairo kuko, Yesu atanya twaza, anya mubwira, "Utobohe! ubigi Mungu ko bwemere naho." ³⁷ Nya Yesu anya bwira yabo bandu ka hatabe ye baga gendanwa nyaye, atali Petro, Yakobo, nya Hohana mwene wabo Yakobo. ³⁸ Iri baka hika hamuye mukulu yairo banyasha nga bandu bakola gwete bagalira. ³⁹ Yesu anyingira mu nyumba, anyababwira, "Biki yibyo mugwete muga lilira? Uyu mwana atafwiri. Ti ahunire." ⁴⁰ Yabo bandu, banyamushekera, Yesu nyaye anya bahulus'imbuga boshi, anyanga bazereb'uye mwana nya bigizibwa bage bashatu, anyigira mukati li kyumb'uye mwan'ali mo. ⁴¹ Anya mugwatira ku kuboko, anya mubwira, "Talita kumu! E Munyere byuka." ⁴² Liryo, uye munyere anyabyuka, anyatondera kugenda. Balya band'iri babona kuko, banya somerwa bwenene! (nyuye munyere ali ko ligwete miaka ikumi ny'ibiri) bandu banya tangala bwenene kubona yibyo Yes akagira. ⁴³ Bisha Yesu aka byus'uye munyere, anyaba konereza ko hatagire mundu ye bagabibwira. Azindi babwira ko uye munyere ahebwe byagalia.