¹ Iri akaba she-shezi kumukyo yabo bakulu ba bagingi banyagir'inama, bali kuguma nya bigiriza bi maja nya bashaja mira bafundi kinwa, banya shweka Yesu, banya mutwal'imwa Pilato, banyamusikiriza. ² Pilato, anyamubuza, "Ka wa mwami wa Bayahudi?" Yesu anya mushuza, "TI wenene mira wabu deta! ³ Liryo, balya bakulu ba bagingi banya sitaka Yesu hanyanya li binwa bingi. ⁴ Pilato anyashubi mubwira, "Wehe utadesiri kiri kinywa kwa yaga goshi bagwete baga kudetera! Ka ndabyo ugashuza?" ⁵ Yesu atanya mwakula, Pilato anya somerwa bwenene! ⁶ Kazi lusiku lwi Pasaka Pilato ali komere kuba shwekulila mundu muguma balozize mwa balya bashwesirwe. ⁷ Nyu mwi nyumba yi mbohe, mwali shwesirw'umundu muguma, izina lyage ye Baraba. Mwali shwesirwe nya bandi bahuni hanyanya lyu kwitana. ⁸ Liryo, bandu bingi banya teramira mundi Pilato ali. Banya muhuna mbu aba shwekulile mushweke muguma, kushimbana nyu busime bwage. ⁹ Anya babuza, "Ka mulozize nyi mushwekulile mwami wa Bayahidi?" ¹⁰ Nyi bikatuma gabuza kuka, kulya li kwiji ko bakulu ba bagingi ba kadeta Yesu imwa ge hanyanya lya katima. ¹¹ Balya bakulu ba bagingi hanya shimya bandu, ko bahune Baraba obe ye ba ba shwekulira. ¹² Pilato, anyashubi babuza, "Kukuno uno mundu ye mugwete mugadeta kw'ali mwami wa Bayahudi nyi mugirage kute?" ¹³ Boshi kuguma, banyashuza kwizu linene, "Umwitire ku musalaba." ¹⁴ Pilato, anya bashuza kandi, "Mabi maki go'akagira?" Banya kayiriz'ukwa miza, "Umwitire ku musalaba mashi!" ¹⁵ Nya kulya Pilato ali lozize ku basimisa, anya bashwekulila Baraba hanyuma nyahan'uluhuma ko Yesu ahimbulwe, anya mutanga bagendi mwitira ku musalaba. ¹⁶ Basirikani banya twala Yesu mwinda lyu luzito lwi nyumba yu mu gimbi mukulu, banya buza ndeko yabo yoshi bashambire. ¹⁷ Yabo basirikani, banya mbaza Yesu kanzu li kituku-tuku, banya mwabaza yo. ¹⁸ Hanyuma banyatondera kumulamusa, "Yuu! E mwami wa Bayahudi! Twakulamusa!" ¹⁹ Yabo basirikani, banyake mu kande band'u mulonge mwi twe. Banya ke mutwira nya mate, Banya kefu kama imbere lyage, kugira ko bagwete baga muhuna. ²⁰ Iri bakusa ku mushekera, banya mu hogola lily'ikanza li kituku-tuku, banya shubi mwambaz'imilondo yage bazindi mutwala ho bagagendi mwitira ku musalaba. ²¹ Yabo basirikani, banya shanganana nyu mundu muguma ugwet'ugalyoka mwi mbigiro, izina lyage ye Simoni banya mubetuza yugo yugo musalaba gwa Yesu (Simoni ali wa mwa kaya ka Bakrene, ye wa nyali, ishe wa halegiza ndere nya Rufu). ²² Yabo boshi banya twala Yesu akalike buzibwa Goligota, "Kwa kulya mugozi gw'ivuha l'itwe" ²³ Banyagira mbu bamu herez'amavu mafushire mo manemane kok'anyagalahira. ²⁴ Banya bambaza Yesu ku musalaba nyiri bakamu bamba, banyeshi imirondo yage, muku gigala, lyo bamanya byo kira muguma wabo agatwala. ²⁵ Bishazi baka bika Yesu ku musalaba byali bishazi bya sheshezi. ²⁶ Nya karatasi ki kumanyisa kazi byo Yesu agamanya ko, kali kwa ndisirwe kukuno, "Mwami wi bayahudi." ²⁷ Banyazi babiri nyabo bali bambirwe habutambi lya Yesu, muguma luhande lu kuboko ku hulyo, nyu gundi mu lu mosho, ²⁸ Kuko kwi binwa bika holeka, ibyali mali shangwa bya sarangwa mwi nzarango nyeru kukuno, "Aka gajirwa mw'aba kazi ba mabi." ²⁹ Bishazi bandu balike lenga yaho balike duka Yesu, baga nya shagaz'ibitwe byabo, baga nya mubwira, "Ewe! Katali wu kadeta mbu gaho mol'inyumba ya Mungu. Nya hanyuma li'siku zishatu, unyabe kandi wa gijuza? ³⁰ Wikizagye wenene, mu kwishomola kwa yugo musalaba uliko!" ³¹ Bakulu ba bagingi, nya bigiriza bi maja nyabo balike shekera Yesu mu kubuzania, "Yu huu! Uno mundu, kwi'ji aligwet'agakiza. Bandi, ti yenene ata hashiri kwi kiza! ³² Ka lagagi ye ulya Masiya mwami wa Baisraeli? Aho! Lek'ishomolage kwa yugo musalaba, gira twibonere! Nyetu, tukazindi mwemera." Balya banya zi abaka bambwa ha butambi lya Yesu, nyabo banya ke mushekera! ³³ Iri bikaba bikola bishazi ndatu ky'umushi, kizizi kya ni njula mukati kihugo kyoshi, halind'u kuhisa kwi bishazi mwenda. ³⁴ Nyiri bikahika bishazi mwenda Yesu anyamiza kw'izu linene Yesu anyamiza kw'izu linene kukuni, "Helohi! lama sabakitani?" Ko kudeta, "E Mungu wani, e Mungu wani! Biki byutuma zanjandirira?" ³⁵ Baguma mwa bali kwimazire yaho iri buvwa kuko, banyadeta, "Muvwe! Agwet'agabuza Elia." ³⁶ Muguma wabo anya tibita, anyaja bik'ikinyuka mwa mavu guliluka lishi, anya kitunga ku mulonge, anyagira mbu aganywese Yesu. Uye mundu, anyadeta, "Lekaga tulole iri Elia giji mushonola." ³⁷ Yesu anya miza kw'izu linene mutima gwanya lyoka. ³⁸ Mwi nyumba ya Mungu, mwali manisir'umulondo, ugwali gizir'ikisika. Liryo, yugo mulondo gwanya bereka mo kubiri, kulyoker'inyanya nyu kuhika hashi. ³⁹ Mukulu wa basirikani ali kwimazir'imbere lya Yesu. Iry'abonaga kayi ko Yesu afwa, anyadeta, "Ukuri, uno mundu ashuba Mwana wa Mungu!" ⁴⁰ Nya yaho hali bakazi baguma bali balikwi shungasire hale hanini bagwete baga langiza, mukati lyabo, mwali Maryamu Magadala, nya Salomi, nya Maryanu nina wa Yakobo, nya wa Yose. ⁴¹ Yabo bakazibo balike shimbulira Yesu bishazi alikir'i Galilaya. Bo banyali ke mukolera. Hali nya bandi bakazi bingi balike mushimba mu kugend'i Yerusalemu. ⁴² Lwali kola lusiku lu kwegerer'imbere lyu lusiku lwi sabato. Nyiri bikaba bikola bigingo. ⁴³ Kwa nyij'umundu wu mwa kaya ki Harimateya, izina lyage ze Yosefu, uye Yosefu, ali muna lushagwa wa mwa bakulu ba Bayahudi, anyali rindirire ko bwami bwa Mungu bugija. Uye Yosefu anya kany'umutima, anyagendag'imwa Pilato, anya muhuna kw'aha bw'ikirunda kya Yesu. ⁴⁴ Pilato, akuvwa ko Yesu mir'afwa anya ganganwa, anyatumir'umukulu wa basirikani, amubuze iri byangaba biri kuko. ⁴⁵ Nyiri akemera, Pilato anya hangula Yosefu ka agendi kwang'ikurunda. ⁴⁶ Uye Yosefu, anyate gendigul'umulondo. Hanyuma, anyazindi gendi shonol'ikirunda ku musalaba anya kizingira-zingira mu mulondo anya kilambika mwi shind'iko najwa mu lwala. Nyu huluzi lwiyo shinda nyaseneka ho kaburunge k'ikwe. ⁴⁷ Kwa yibyo bishazi Maryamu wi Magadala, nya Maryamu nina wa Yose, banyi bonera kazi ho kirunda kyala mbikwa.