¹ Yulo lusiku lwi sabato, iri lukaba mira lwa lenga, Maryamu wi magadala, nya Maryamu nina wa Yakobo nya Salomi, banyagendi gul'amarasi gira baga shige kwi kirundo kya Yesu. ² Nyiri hakaba ku lukula lu lusiku kw'iyinga, yabo bakazi bamwatonder'injira yu kugend'iyo munda yi shinda. ³ Iri bakaba bakiri mu njiri, banya buzani, "Lir'iwe libisirwe. Ha luzi lwi shinda, nya ndag'ulya uga tulyoseza lyo? "Ibikatuma bagadesanya kuko, kulya yir'iwe lyali binene bwenene mbu bina mule amasu, banya bona ko mira lya sandikirwa ha butambi. ⁵ Lyo bakingira mwi iyo shinda, banya shanga mo mutabana ember'ikanyu lyeru, anyabudetere mu kuboko kululu, lyo bakamu bona yumo banya kanguka. ⁶ Uye mutabana nya ba bwira kukuno, "Muta kanguke mashi! Mugwete mugaloza Yesu wi Nazareti, ye bitira ku musalaba atakiri hano afuka mira mulolekeze mwenene ho batamulambisire. ⁷ Mugendi bwira bigizibwa bage, kuguma nya Petro, ko mira shangwa i Galilaya. Nyi yo munda, yo muga mubonera, nga ko ali mali shangwa mubwira." ⁸ Yabo bakazi banya huluka mw'iyo shinda ku mulindi. Kulya bali mali ganganwa bwenene, baga nya juguma nyu kuboha. Nyabo nidaye mundu baka bwira hanyanya lyu boba. ⁹ Iri Yesu akaba mira fuka sheshezi kumukya lusiku lwi yinga anyatangi shangana Maryanu wi Magadala, ulya kahuvwa mo mihusi rinda. ¹⁰ Maryamu anyagendi bwira balya boshi baligwete bagota nya Yesu kaguma, banya likigwete baga mulilira. ¹¹ Iri bakuvwa'umwazi ko Yesu akola mugumana, nya ko Maryamu mira, mubona, batanya gutwaza. ¹² Hanyuma, bishazi babiri mwa bigizibwa ba Yesu baligwete baga genda mandalo, Yesu yenene anyaba yali kola gindi gindi. ¹³ Yabo bombi'ri ba manya ko yehe banyagendi bwira birabo kiryakaba kuko yabo birabo, batanyemera. ¹⁴ Habuzinda, Yesu anya shoshokera bigizibwa bag'ikumi nya muguma bashazi baligwete bagalya. Anyaba kanukira, mbu batali bisire ko Mungu bwemere, banya kayusiz'imitima yabo. Kulya bandi bali mali bona kw'akafuke mwa bafwire, ti bohe banya lahira mbu Yesu atafusiri mwa bafwire. ¹⁵ Yesu anyabwira bigizibwa bage, "Mugende mukati li kihugo kyoshi nyu kwigiriza kira mundu mwazi mwija. ¹⁶ Yabo bandu, iri batangemera, baga twirwa lubaja ko bahanwe. Ti kazi bagemera, baga dubikwa bohe, baga nya kululwa. ¹⁷ Nya bagemer'inyazi mija, bagijike kweresanya bino byereso. Bagiji ke hivwa mihusi (bazimu) mwa bandu kw'izina lyani. Bagiji nyake deta kwi zindi-zindi ndeto. ¹⁸ Nya kiri banga gwat'injoka bagaba baga bika maboko kwa balwazi, yabo balwazi banyake kira. ¹⁹ Nahano Yesu, iryakus'uku bwira bigizibwa bage kuko, anyalengezibwa kugenda mwi gulu, anyagendi budatala luhande lu lulyo lwa Mungu. ²⁰ Yabo bigizibwa bage, banya kugenda bagalenga kira myazi mija Nahano Yesu, aligwet'agabakola mo anyake beres'ukuli kwi binwa byabo. Nyu ku ke beresa mwi litangaza.