¹ Hali koli sigere siku zibiri mbere lyu lusiku lukulu lui Pasaka, nyi zi mikate mizira sama. Bakulu ba bagingi kuguma nya bigiza bi maja, baligwete bagaloza njira yo baga gwata mo Yesu ku bwenge lyo ba mwita. ² Tikoke, banyadeta, "Yuko kumwita, kutabagage lusiku lukulu lui Pasaka lyo kuganga lutalyoka mukati lya bandu." ³ Bishazi Yesu ali kola mwa kaya ki Betania, any'ingir'imwa Simoni, mundu wu bukomu. Irya kaba koli budetere ahali biribwa. Mukazi muguma nyingira mwi yo nyumba alidite isupa liwe liwe mwai malasi ga kengwa nyi Nardo, ganya li gi kishingo kikajire bwenene ganyali bisirwe mwi njebe ikabajwa mw'iwa lija. Uye mukazi anyakega fukumulila Yesu mw'itwe. ⁴ Bandu baguma bali yaho, iri babona kuko, banyagalwa bwenene, ti, "Biki byatuma agagona gano malasi ganyaligi kishingo kingi kukuno? ⁵ Ti tushuba tuga gaguza kwi dinari magana gashatu zinya habwe bakene" Yabo bandu, banyatondera kumu kamukira bwenene! ⁶ Yesu anya batwira kukuno, "Biki bitumure mugwete muga shuz'uno mukazi? Mu mu leke masi! Kulya bino angirira, mbinzimisize bwenene! ⁷ Kulya mugaba nya bakene kuguma nya mwe siku zoshi, mwanga nyabatabala kuzi bishazi mulozize. ⁸ Bishazi abulagira gano malasi kwa magala gani, agira kwa shibo lozize, ashigu moyo gwani malasi imbere li bishazi, ku kulindur'ulusiku lo nga kabulira mo. ⁹ Nya mubwir'ukuli: Hanyanya lyuku kumbula uno mukazi, lin'igambo akangirira, liga kazi nyaye agaji ke kangerwa." ¹⁰ Yuda Iskariote, muguma wa balya bigirizibwa bage ikumi nya babiri, anyagendera bakulu ba bagingi, ly'agendi tanga Yesu imwabo. ¹¹ Yabo bakulu, iri buvwa yugo mwazi banya sima bwenene banya mulaganya ko bagamuhez'ifwaranga. Kuko anyatonder'ukuloza bishazi bija ngatangira mo Yesu. ¹² Lusiku lu'kutonder'isiku ngulu zi mikate mizira sama, lwanyahika. (Lo lusiku lwi byanabuzi bi Pasaka byenezire bibagwe) Bigizibwa ba Yesu banya mubuza, "Hah'ulozize tugendi ku kukoler'i biribwa bi Pasaka." ¹³ Yesu anyatuma babiri mwabo, iri anyababwira, "Mugendage mwa kaya, Mugashanganana mo nyu mushosi muguma abetwir'a kabindi ka meji munyamushimbe. ¹⁴ Nya kazi nyumba agi ngira mo, munyabwire mwen'iyo nyumba, ti: Mwigiriza abuza, mbu hake bukuli, buli, bo ngalira mw'ibiribwa bi Pasakakuguma nya bigizibwa bani. ¹⁵ Haho, agamutwala mwi nyumba'iri hanyanya ligindi, anya mwereso mu bululi bihamu. Mugashang'ibindu byoshi bikola mo. Nyi bindi byoshi byumene muga bishaga mo. Mumo muga tukoler'ibiribwa bi Pasaka." ¹⁶ Yabo bigizibwa bombi banyagendi kwingira mwa kaya, banyashanga byoshi biri ngako Yesu ababwira, banyatonder'ukugererez'ibiribwa bi Pasaka. ¹⁷ Iri baka kabigingwe,Yesu anyahika yaho, ali kuguma nya bigizibwa bage ikumi nya babiri. ¹⁸ Nyiri bakaba bakoli budetere nyu kuly'ibiribwa, anya babwira, "Nyamubwir'ukuli, kirya ngaba tugwete tugashangira bino biribwa, muguma wenu agandanga mwa bagoma." ¹⁹ Bigizibwa bage banyatondera kufwa bute bwenene! banyatonder'ukumubuza muguma muguma, "Ka niehe?" ²⁰ Yesu anyabuza, "Uye mundu ali muguma wa mu bigizibwa bani ikumi nya babiri, anyali ye uga tweze kuguma. ²¹ Mwana wa mundu agagendi kwitwa nga ko byandi sirwe mwi nzarango nyeru hanyanya lyage. Ko nya kuko, uye, ugamutanga mwa bagoma, ali ya yewe imwage! Uye mundu, byanga muberere bwija, nga'tanga busirwe!" ²² Yesu nya bigizibwa bage, iryakaba bakola mulya anyang'umukate, anyatanga mukongw'imwa Mungu, anyagu ganubula, anya baheza go anya babwira kukuno, "Mwange guno! Kulya gali magala gani." ²³ Anyanga nyu rusozo hwi divanyi, anyatanga kongw'imwa Mungu, anya baheza lo. Kazi muguma wabo, anyalu nywera ko. ²⁴ Yesu anyababwira, "Mo divwayi gulagagi muko gwani guga goneka hanyanya lya bandu bingi. Mukukiz'iragi lihya hya. ²⁵ Nya mubwir'ukuli, ko ndanga kishubiri nywa idivwayi, halind'ukuhisa mu bwami bwa Mungu." ²⁶ Yaho banyimb'ulwimbo lu kwigana Mungu. Iri balyoka yaho banyagenda ku mugazi gwi mizeituni. ²⁷ Yesu anyababwira bigizibwa bage,ti, "Mweshimuga nja ndirira, kulya bisirazirwe mwi nzarango nyeru kukuno: Ngita mungere wi bi buzi. Yibyo bibuzi bigashambuka. ²⁸ Ti koke ngafuka mwa bafwire nyinya mutang'i Galilaya." ²⁹ Petro anyamubwira, "Kiry'abandi boshi bangakujandira, nyehe ndaku jandirire!" ³⁰ Yesu anyamushuza, "Nya kubwir'ukuli, mwa buno bushigi bwa zene, luhazi lutazi bika ubugira, kabiri uga b'iri mira wanyiyo gokola ubugira kashatu." ³¹ Petro anya kitwa, "Nanga! Kiri kwangaba kwitirwa kuguma nyehe ndaku lahire! Balya birabo bigizibwa nyabo banyadeta kuko. ³² Yesu nya bigizibwa bage banya genda mukati li ndalo ibuzibwe Getsemane. Hahi anya ba bwira, "Sigalage hano! Nyehe, nga genda halira, ngendi hunira ho Mungu." ³³ Yesu anyatwala Petro, nya Yakobo, nya Yohana anyagenda nyabo, anyatondera kuba nyi kyaba anyashenguka. ³⁴ Anya ba bwira, "Ngunire bwenene hasi nyu kufwa! Musigale hano mutanya gwejer'iro." ³⁵ Yesu anya shegenera hambere hinini anyi kabula hashi, anyatondera kuhuna Mungu, iri byangazoga bya yikyo kishazi bimulengage. ³⁶ Anya deta kukuno, "Aba! E Data byoshi biri mu kusimire. Luno rusozo lwa malibuze mashi ulu ndyoseze! Ti kok'ugire byulozize! bibe byo biga koleka. Ti bitali byo ndozize!" ³⁷ Yesu, iri angakuka, ashangana bigizibwa bage bahunir'iro, anyabwira Petro, "Simoni ka wahunira? Ka wabirwa nyu kutagwejera, kiri kishazi kiguma? ³⁸ Mutahunire ti muhume Mungu lyo mutahirime mukati lya malibuze, Mutima gulozize, ti magala gohe gali mu bukoho lwe. ³⁹ Yesu anyashubi gendi huna Mungu, nyu kudeta bibyo-bibyo binwa. ⁴⁰ Irya'shubi galukira halya bigizibwa bage bali, anyashanga kandi mira bahunir'iro, kulya iro lyali kola lingi mwa masugabo, bata nya manyakute bagamu shuza. ⁴¹ Nyi'ri Yesu ashubi bagalukira bwa kashatu, anyaba bwira, "Ka muki gwete muga luhukira mw'iro? Mashi muleke kuko! Ibishazi mira maboko ga bana byaha. ⁴² Byukage, tugende! Lole! Ulya wu kundanga, yulira kola hasi!" ⁴³ Iri Yesu akaba kigwete agadeta, liryo Yuda anya mu hulikira ko muguma wa bigizibwa bage ikumi nya babiri uye Yuda, kija nya banbu bingi, banyali fumbete ingati nya mahiri. Yabo boshi, balitumirwe nya bakulu ba bagingi, nya bigiriza bi maja, nya bashaja ba Bayahudi. ⁴⁴ Yuda ali mali shangwa'bamanyis'ikyereso kyo agaba songora mo Yesu, nyuku ba bwira, "Kazi ye nga nyunyuguta, ye yehe. Mumugwatage, munyagende mu mugwatirire!" ⁴⁵ Kuko, Yuda nya shegenera munda Yesu, anya mu bwira, "E Rabi! Anya mu nyunyuguta. ⁴⁷ Mwa yabo bandu, muguma nya shogol'ingati yage. Anya gishogeka mukozi wu mukulu wa bagingi yanya mu tw'ukutwiri. ⁴⁸ Yesu anya ba bwira, "Kituma biki mwa nyijira ny'ingo ti nya mahiri nga bandu bijiri gwata umu nyazi. ⁴⁹ Ti kira lusiku, tushubigwete tugashiba nwa mwi nyumba ya Mungu, muta nyangwata! Kwiji kuko, kaz'ibyali mali shangwa byasarangwa mwi nzarango nyeru, byumenene bikoleke. ⁵⁰ Yesu, iry'adeta kuko, bigizibwa bage boshi banya shaga, banya musiga. ⁵¹ Musore muguma, gwanya shimba Yesu gunyember'ulubega lwa kalikopo naho. Nyi bishazi balya bandu baka gu gwata, ⁵² Gwanya basi gira lo gwanya shaga bwashi. ⁵³ Yabo bandu, banyatwala Yesu mu mukulu wa bagingi. Hali mali shangwa bandi bagingi nya bigiriza bi maja nya bashaja ba Bayahudi. ⁵⁴ Petro anya shimbulira Yesu alin'ingira mu hubuga lwa hamu mukulu wa' ligingi. Anya budatala kiguma nya balazi, nyu ku kalu k'umuliro. ⁵⁵ Yabo bakulu ba bagingi, kuguma nya bandi bakulu boshi ba Bayahudi, bali gwete bagaloz'itumasitwo-baga det'ibinwa bwu kwitisa mo Yesu batanya bitali biguma. ⁵⁶ Bandu ingi baka mudeter'ubushumi, ti byo bali kedeta bitali bguma. ⁵⁷ Balya bandu banyi manga nyu kudet'ubushumi hanyanya lyage. Banya deta, ⁵⁸ "Tukiyuvirwa agadeta, "Mbu anga homol'ino nyumba ya Mungu, ikubakwa nya maboko ga bandu, nya hanyuma l'isikuzi shatu nya maboko gabo." ⁵⁹ Kiryangaba yuto tu nwa tukabanganiza Yesu kuko, ti bushumu bwabo butanyaba buguma. ⁶⁰ Hanyuma, ulya mukulu wa bagingi anyimanga mukati, anyabuza Yesu, anyadeta, "Ka ndakyo kinwa wanga tushuza?" ⁶¹ Hanyum'anya hulika, atakakula kiri kinwa. Ulya mugingi mukulu anyashubi mubuza, "Ka we ulya Masiya, Mwana wa Mungu wu bulagashane?" ⁶² Yesu anyashuza, "Nye yehe! muganyabon'u Mwana wu mundu abudeter'uhande lu lulyo lwa Mungu wu buhashe boshi! mugamubona'gija mu lukungu lu mw'igulu." ⁶³ Bishaz'ulya mugingi mukulu akuvwa yibyo binwa anya datul'imirondo yage nyu kudeta, "Tuta kiozizi kandi bushuhuda boshi hanyanya lyuno mundu. ⁶⁴ Ti mwenene mira mwinyuvirwa kazi kw'adeta ibitali nga byo imbere lya Mungu!Kutage mubwine." Yabo boshi banya tw'ulubaja ko Yesu menen'itwe. ⁶⁵ Mwa balya bakulu, baguma banyatondera kutwira Yesu mate, banya mubwika malanga, nyu kuke mutimb'ibifune, nyuku mubuza, "Tubwirag'ushubigwet'uga (kushulika?" Nya basirikani balalizi nyabo banyagwata Yesu nyu ku mu band'imbi. ⁶⁶ Petro ali kiri mu luzito lu bwami, mwi dako li nyumba, hanyija mukazi muguma wa mu bakozi bu mugingi mukulu. ⁶⁷ Iry'abona Petro agwet'aga haluk'umuliro anya mulolekeza, anya mubwira, "Nya nyabe ushuba kuguma nyuye Yesu mu Nazareti" ⁶⁸ Petro anya lahira, ti, "Yibyo ugwet'uga deta nda bima nyiri." Liryo, anya lyoka yaho, anya genda haluso ry'uluzito. Uluhazi lwanyabika. ⁶⁹ Ylya mukazi, anya shubi bona Petro ha luso anyabwir'abali yaho. Ti, "Uno mundu ali moguma wabo!" ⁷⁰ Petro anya shubi lahira. Hanyuma hinini, balya bandu banyabwira kandi Petro ukuli wehe uli muguma wabo, kulya nyab'uli mundu wi Galilaya. ⁷¹ Kuko Petro anyadeta, "Iri nyadet'ubusumi, ndakwe! Uno mundu mugwete mugambwira nda mumanyiri!" ⁷² Haho, haho, luhazi lwanya bika bwa kabiri, Petro anya kengera bilya binwa Yesu ali mali shangwa mubwura. Ti, "Luhazi lutazi bika kabiri , ugaba mira wanyi yogo kola, ubigira kashatu." Petro anya tulikira mwa malira.