¹ Yesu anyalyoka yaho, anyagenda mbandi zi bu Yahudi, Ika jabu ku lwiji Yordani. Bandu bingi bwenene banya mushokolera yaho anyashubi bigiriza nga ko ali komere. ² Bafarisayo baguma, banya mwijira, mbuba mutebe ti, "Ko mundu'herwe luhuma ko angahiva mukage?" ³ Yesu anyabashuja, "Biki yibyo Musa ndisire mwi maja?" ⁴ Nyabo, ti, "Musa akadeta ko mushosi anga saranga maruba gu kulahira mukage, azindi muhiva." ⁵ Yesu anyabashuja, "Ibikatuma Musa aga musarangira kuko hanyanya li mitima yenu mikayu. ⁶ Ti bishazi Mungu akabumba byoshi butazi, akabumba musosi nyu mukazi. ⁷ Kyo kitumir'umusosi agasg'ishe nya nina anyibike ku mukage. ⁸ Yabo bombi banyabe bakola magala maguma. ⁹ Ko kuko, kazi byo MUngu akabika kuguma, hata kib'umund'ugashubi bishambula. ¹⁰ Bishazi ali koka mu nyumba nya bigizibwa bage, kandi banya mu buza hanyanya lya kikyo kinwa. ¹¹ Yesu anyabushuza, "Mundu, iri angahira mukage anyang'ugundu mukazi, uye, ari mushule. ¹² Mukozi akolyok'imwiba nyu ku lobolwa nyu gundi musosi, uye nyay'ali mushule." ¹³ Bandu banyadetera Yesu bana banuke, gira ababike ko maboko, abigizibwa bage, iri babona kuko banya bakayira, Lyoke yaho! ¹⁴ Yesu, iri abona kuko, anyagalwa, anya babwira kukuno, "Muleke yabo bona banuke banyijire mutaba bahirize, kulya kazi bali nga yaba bona banuke, bohe bo ben'ubwami bwa Mungu. ¹⁵ Nyimubwizir'ukuli, iri mundu atangangirir'ubwa mi bwa Mungu nga mwana muto atangagira." ¹⁶ Kuko Yesu anyaga balya bana, anyababika ko maboko anyabashanira. ¹⁷ Iri Yesu akaba aga lyoka yaho, mundumugugma nyatibita ho ali, anya fukam'imbere lyage, anya mubuza, "E Mwigiriza mwija, ngire kute lyo nyingira mwa kalamu ki myaka nyi myakula?" ¹⁸ Yesu anyamubuza, "Kituma wadeta kondi mwija? Mwija'li kuguma naho, Mungu yenene. ¹⁹ Wiji ko migako idesire: Utitane, utabe mushule-utabe muzimba, utabe mushuni utatebane. Utund'isho nya nyoko." ²⁰ Uye mundu anyashuza, "E Mwigiriza, manyir'iyo mugako yoshi ku lyoker'ubwa nuke bwami." ²¹ Yesu anyamulola ku lukundo, "ugendi guza kazi byoshi byugwete uheze bakeni, kuko lyugaba ukoli bi kirwe iki hinda mw'igulu! Lyoke uzindi njimba." ²² Ulya mundu, iryuva kuko anyzizibala, anya lyoka yaho, kulya ali mugale bwenene. ²³ Yesu anyaleza leza masu mwa bahya bigizibwa bage, anyababwira, "Mugale kwingira mu bwani bwa Mungu bikayire bwenene." ²⁴ Yibyo binwa bya Yesu byanya someza bigizibwa bage, kyanyatuma agashubi babwira, "E bana bani bikayire bwenene kwingira mu bwani bwa Mungu. ²⁵ Umugale haugingira mu bwami bwa Mungu bihunire ngama kusheshera kwi kitule ki sindano." ²⁶ Bigizibwa lyo bakuvwa yibyo binwa, banyatanga lwa bwenene nyu ku buzanya bonone kwa bonone, "Indage wanga kikizibwa?" ²⁷ Yesu anya balolako, anyabashuza, "Yikyo kinwa mwa bandu kitangaziga, tikoke Mungu alihashire, kulya imwage yehe byoshi bihashi kene." ²⁸ Petro anyamubwira, "Loloza! twehe mira tugasiga byoshi, twanya kushimba." ²⁹ Yesu anyamushuza, "Nyamubwir'ukuli, iryangoba mundu akasig'inyumba hanyanya lyani nya hanyanya li myazi mija, kandiri bene wabo, iri baali babo nya ba nina wabo, kandiri b'ishe wabo, kandiri bana bage, kandir'indalo. ³⁰ Uye kwi bishazi akili hano mwi kihugo, aga byangirira kali igana. (Nyumba, nya bene wabo.) Nya bali bage, nya ba nina, nya bana, nyi ndalo. Kuguma nya malibuze. Nyi bishazi tondo agaluke kagaba kalamu ku myaka nyi myakula. ³¹ Ti bandu bingi bi mbere, bagijiba bi nyuma nya bakiri bi nyuma, bagijiba b'imbere." ³² Yesu anyashangwa mu njira yu kuteramir'i Yerusalemu bigizibwa bage bali mali somerwa, nya bandi bali bashimbire, bali kobohire, Yesu anya hengu kana balya bigizibwa bage ikumi nya babiri anya tondera kubamanyisa ibiga mukoleka ko. ³³ "Lolage! Tukola tugateramir'i Yerusalemu, nyi yo munda, umwana wu mundu agatangwa mwa bakulu ba bagingi, nya mu bigiriza bi maja baga mutwija lubaja lu kwitwa, bazindi mutanga mwa bapagani. ³⁴ Yaho bapagani bagamushekera, banya mutwire nya mate, bagamu shul'iki ngonyi bazindi mwita. Ti lusiku lwa kashatu ha nyuma lyu kufwa kwage, agafuka!" ³⁵ Hanyuma, Yakoba nya Yohana, bagala Zebedayo banyijira, banyamubwira, "E Mwigiriza, tulozi ze utugirire kazi byo tuga kuhuna." ³⁶ Anya babuza, "Biki yibyo mulozize nyi mugirire?" ³⁷ Nyabo, ti, "Bishazi ugaba mu bulangashane bwabe, utwemerere kubudatala kuguma nyawe, muguma mu lulyo lwabe nyu gundi mu lumusho lwabe." ³⁸ Yesu anyabashuza, "Yibyo mugwete muga mbuna mutali mari? Ka manga hasha kunywa kikombe kya malibuze kyo nganwera ko? Ka mwanaga nya batizibwa ku bubatizo bonga batizibwa mo.?" ³⁹ Nyabo,ti, "Tugahasha!" Yesu anyababwira, "Kilya kikombe kya malibuze kyo nganywera ko, nyenu mugakinwera ko. Nyu bubatizi bwa ko. ⁴⁰ Kubudataza bandu luhande lwani lu lulyo, kandiri luhande lu lumosho, atali nyu ga kugira. ti Mungu yenen'ugakugira. ⁴¹ Birabo bigizibw'ikumi, iri buva kazi ko bagala Zebedayo bakahuna Yesu, banyabona kubi bwenene! ⁴² Yesu anyababuza boshi kuguma, anyababwira, "Mwiji ko mwa kapagani batwali bagwete bagaka mbalirana, nya bakulu babo, bagwete baga bakolesa kwi misi. ⁴³ Tikoke mwehe atali ko bizab'imwenu! Iri mukati lyenu mundu angaloza abe mukulu, umenene abe mukozi wenu. ⁴⁴ Ny'iryanga loza kuba wimbere, abe muja wa boshi. ⁴⁵ Kiri nyu Mwana wa Mungu kwija kwaga, kutali mbu lyo akazi kolerwa. Akija gira akazi kolerana, akanyitanga itwe lya kulula bandu bingi. ⁴⁶ Yesu nya bigizibwa bage, banya hika mwa kaya Yeriko, iyakaba akola agalyoka mwa yaho kaya kuguma nya bigizibwa bage, bandu bingi bwenene banyagenda ba bashimbire. Nyu mu butamubi bwiyo njira muli budetere muhuta muguma. Gwali ke huna kun'inbindu, izina lyage Bartimayo(Kuli kudeta: Mwana wa Timayo). ⁴⁷ Uye Bartimayo, iruva ko Yesu wi Nazareti agale nga mukati liyo njira, anyater'izu bwenene ti, "E Yesu, Mwana wa mwami Daudi! Unyuvirwe lukago mashi!" ⁴⁸ Bandu bingi banya kanukir'uye Bartimayo mbw'ahulike, Ti anyagenderera kwamiri za kwizu linene, ti, "E Mwana wa Daudi unvire mbonga mashi!" ⁴⁹ Yesu anyimanga, anyadeta, "Mumubuze!" Liryo banya mubuza, banyamubwira, "Agwet'agakubuza, wimukaze, inyashagaluke!" ⁵⁰ Yugo muhuta gwanya kabulir'ikoti lyago, gwa nyija hali Yesu. ⁵¹ Yesu anya gubuza, "Biki'ulozize ngu girire?" Nyaye ti, "E Rabi, ndozize masu gani gabone." ⁵² Yesu anya mubwira, "Ufulukage, kuko ubusir'ubwemere bwabe imwa Mungu, mira wakira." Liryo uye Bartimayo masu gage ganya bona, anyagend'ashimbire Yesu mw'iyo njira.