¹ Petro nya Yohana balike shona kuguma mukugenda ishengero mwi bishazi bikuhuna,byali bishazi mwenda. ² Hali mushosi muguma u wali nya malebela(Bifunga)kulyoka kubutwa kwage,bandu bali ke muheka kila na lusiku nyuku mubika hu luuzi lwi shengero i libuziwe bwija lyo ahune itulo mwa bandu buku ingila mwishengero. ³ Uye mushosi,anabona Petro nya Yohana bali kwingira mwishengero anya huna ahewe itulo. ⁴ Petro ana mukanyiza masu,kuguma nya Yohana,nya deta,utulole. ⁵ Ana balola nyuku salila ko aga hewa kindu nyalibo. ⁶ Ti Petro anya deta,nyehe nda gweti njuma,ili kandi milinga,ti kazi kyo ngwete kyo nga kuheza. kwi zina lya Yesu Kristo wi nazareti,imanga ugende. ⁷ Ana mugwata kuboko ku kushosi,ana mwinamugwamula,haho shando zage ni nungiro za magulu gage zana bikwa misi. ⁸ Anya lyoka duba animanga,anatondera kugenda,aningira mwishengero kuguma nalibo,nyu kugenda,nyuku balala-balala,nyukwigana Mungu. ⁹ Bandu boshi bana mubona agwete aga genda,nyukwigana Mungu. ¹⁰ Bana mu manya,ko yehe yushuba budetere nyu kuhuna itulo yaho hu luuzi lwija lwi shengero,banijula busomere bwa yibyo bindu. ¹¹ Ngako ali gwasire Petro nya Yohana,bandu boshi banyigushikanya hanyanya lyabo duba mulubunga u lwali buziwe lubunga lwa Sulemani,nyuku somerwa bwenene. ¹² Petro mukubona yuko,anyawira yabo bandu,mwe bashosi bi Israeli,hanyanya lyi biki mwa somerwa nya bino?hanyanya lyi biki mugwete muga tulolekeza?nga twagira uno ashomole mwi bushukwa bwetu? ¹³ Mungu wa Ibrahimu wa Isaka nya wa Yakobo,Mungu wa ba data,aheza mukozi wage itunda Yesu Kristo,uye muka lahira nyuku mubika imwa Pilato,anyali mali longeka ashwekulwe. ¹⁴ Ti mwehe muka gwata uye mushukwa,nyu wukuli,mwanahuna muhewe mwitani. ¹⁵ Mwana mwita uye mukuli wu bugumana,Mungu anya mufula mukati ka bafwire,na netu tuli basubura bage. ¹⁶ Nu kwindimbiri mwi zina lyage,izina lyage,izina lyage lya mubika misi uno mundu muwine nyuku manya,ni ndimbiri ili imwage yehe yaheza uno kano kalamu kakwizire imbele lyenu mweshi. ¹⁷ Nya kukuno,bene wetu,niji ko mukagira bino bundamanya,ngako bakulu benu bakagira. ¹⁸ Ti magambo galya akagira Mungu kulyoko butazi mwa kanwa ka balagu bage boshi,kudeta Kristo wage aga libuziwa,kuko mira abikwiza. ¹⁹ Mwishobeke naho,mugaluke,lyo mahubi genu ga hotalwe,lyo bishazi byukufuka kulyoka mwa malangaga nawetu bije. ²⁰ Atume Yesu Kristo u muka bikirwa kulyoka butazi. ²¹ Uye bikahune angililwe i kunguba kuhika bishazi bindu byoshi biga girwa bushazi biga girwa buhyahya,ibika ganulwa na bashukwa kulyokela butondero bwi kihugo. ²² Kulya ukuli Musa aka deta ko,nahamwetu Mungu wetu aga mwina mulila mulagu,mukati ka bene wenu,nga nyehe,mumuvirize yehe mwa magambo goshi agiji ke deta na mwehe. ²³ Na bigaba mundu yeshi utagiji muviriza uye mulagu agatereka nyuku sherera nya bandu bage. ²⁴ Eego,balagu boshi kulyoka Samweli nya yabo bakija hanyuma lyage,boshi a bakadeta,baka igiriza myazi ya zino siku. ²⁵ Mwehe mukola bana ba balagu nya bya yibyo bilagane,yibyo Mungu aka lagana na bishe wetu,nyuku wira Ibrahimu,birongo byoshi byu mukihugo baga goshanirwa mwi buta lyabe. ²⁶ Mungu,amali mufula mukazi wage Yesu,amutumire imwenu lyo mugashanirwe nyuku sola kila muguma wenu nya mabi gage.