¹ Paulo nya Sila banalenga mu Amfipoli nya Apolonia banahika,Thesalonike,Ahali Sinagogi lya Bayahudi. ² Paulo anyengira mo ngako ali komere anya ganula nyabo mwi binwa bi nzarango lusiku lwa kasiku zi shatu. ³ Anya beresa bwija nyuku balangula ko byali kumenenwe Kristo alibule,nyukufuka mwa bafu,nyuno Yesu ngwete ngs muwira mwehe myazi yage ye Kristo. ⁴ Bandi mukati kabo banemera,banashimbana nya Paulo nya Sila nya Bayunani abali kwabohire Mungu,bingi wenene,nya bakazi abali gwete bukulu batali banini. ⁵ Ti Bayahudi,bana bona bongwa,bana anga bandu abatagweti myanya mija,bana shanganinya mushambiro,banagira lunganga mwa kaya,banaloza Paulo nya Sila bana bagendera bandu bi nyumba ya Yasoni,banasima babadete imbele lya bandu bu mwa-kaya. ⁶ Batana babona,banakulula yanoni nya bandi benewetu baga gira lunganga,nyukudeta,bano bandu basola kihugo,bahika ino mundu nayo. ⁷ Nya Yasoni abegereza,nya bano boshi bagira bindu bilahirirwe nyi mikago ya Kaisari,nyuku deta ko hali gundi mwami,ubuziwe Yesu. ⁸ Yibyo binwa byana gongomya ndoko yoshi nya bakulu ba kaya. ⁹ Nyabo bamali Yasoni ndjuma nya birage bana basiga bigendere. ¹⁰ Mwa yibyo bishazi yabo bene wetu banatwala Paulo nya Sila bushigi i Beroya,nyabo muku hika iyo baningira mwi Sinagogi lya Bayahudi. ¹¹ Yabo Bayahudi baligwete misalilo mija kutaluka yabo bi Thesalonike kulya bangilila kilya kinwa nyuku kishimbilila,nyukulolekeza nzarango kila lusiku,balole ko yibyo binwa ko bili. ¹² Bandu bingi mwa libo,banyemera,nya bakazi bi Kiyunani a baligwete bukulu,nya bashosi a batali banini. ¹³ Ti Bayahudi bi Thesalonike bishazi bakuva mwazi ko gwa Mungu gwigiriziwa nya Paulo kili mwi Beroya,banagenda iyo nayo,bana bagongamya nyuku gona yugo mushambiro. ¹⁴ Haho bene wetu banatwala Paulo igendere habutambi lyi nyaji,ti Sila nya Timoteo banasigala iyo. ¹⁵ Ti balya bakahelekeza Paulo,bana mutwala kuhika i Thene,nyabo bamali hewa migako yuku twalila Sila nya Timoteo,ko batatinde kumushimba,banigendera. ¹⁶ Ngako Paulo alike balinda iyo i Athene nyukubona gwage gwana gaya bwenene mwinda lyage. ¹⁷ Kuko,mwi Sinagogi anya tondera kuganula nya Bayahudi nya bandu bali kobohire Mungu,nya yabo baka shanganana naye mukgulilo kila lusiku. ¹⁸ Bandu baguma bu bwenge babuziwe Baepikureo nya Bastoiko,banashanganana nyaye.bandi banyadeta,biki agwete alozi deta uno mudesi?bandi banadeta ashushire nga mundu wukwigiriza myazi ya bamungu Bahyahya,kulya ashubake kwigirizi myazi ya Yesu nyukufuka. ¹⁹ Bana mugwata,banamutwaha handu habuziwe Aeropago,banyadeta,ka!twangamanya buno wenge budesire kute ugwete ugedeta? ²⁰ Kulya wadeta bindu bingi bihyahya mwa matwiri getu,tugasima tumanye,kuko,bino bidesire kute. ²¹ Kulya bandu bi Athene nya bageni a bakebera iyo batali ke leza ti kudeta nyukuviriza myazi mihyahya. ²² Paulo anyimango mukati ka Aeropago,anyadeta,mwe bandu bi Athene,mu bindu byoshi nyabona ko mwehe muli bandu kugerereza bwenene bindu bishengero. ²³ Kulya bishazi nalike lenga iyo,niya nyukubona bindu byenu byukwi kumba,nyabona lutali u lusalazirwe bino binwa imwa Mungu utamanyikeni,nyehe nyamwigiriza myazi yage uye mwehe mwake kwikumba buzila kumuma nya ²⁴ Mungu uka bumba kihugo nyi bindu byoshi ibilimo,yehe,kulya ali nawetu wi kinguba nyi kihugo atake bera mwi shengero izikubakwa nya maboko. ²⁵ Atake kola nya maboko ga bandu nga ulozize kindu kyoshi kyoshi,kulya ye ake heza boshi bugumana nyu muka nyi bindu byoshi. ²⁶ Yuka gira kila kilongo kya mwana wu mundu kulyoka mu-muko muguma,babele mwa malanga gi-kihugo kyoshi anyusa kubabikira bishazi i byaka bika kulyokera butazi nyi bisika yi mikolwa yabo. ²⁷ Anya sima baloze Mungu,bikanye bamubone muku-huma huma,kulya atali hale nya kila muguma wetu. ²⁸ Kulya imwage tugwete kalamu,twakegenda,nyu kuba nyu muka gwetu,ngako muguma wenu,mutazi nyimbo,ukadeta,kulya tweshi tuli kashushanya kage. ²⁹ Kuho,kulya twehe tuli kashushana kage Mungu,tuttumeneni tusalile ko bu Mungu bushire miringa. ili ndjuma,ili iwe,bindu bika shangolwa nyu bwenge bwa mwana wu mundu. ³⁰ Mungu buzira kushimba lila bishazi akigira ngata biwini,ti hoshi bishobeke. ³¹ Kulya akabika lusiku lwaga twira kihugo lubaja,kwu-ukuli,kwuye mundu akalondola,naye aheza bandu boshi busubura bukuli bwa gano magambo muku mufula mukati ka bafu. ³² Bishazi bakuva mwazi gu kufuka kwa bafire,bandi banalyogola,bandi banadeta,tugakuviriza kandi mwa yibyo binwa. ³³ Kuko,Paulo anya lyaka anya basiga. ³⁴ Ti baguma babo banyashimba Paulo,banyemera,mwa yabo mwali Dionisio,Mwareopago,nya mukazi muguma izina lyage Damari nya bandu kuguma nya yabo.