¹ Yeso, akade lo wato, akateho oduwa, ndo akatshu lo ngelo kende. ² Ndo nyende, wakawela kanga hemo oshami lo kitanda. Yeso, akeni mbetawo kewo, akate kanga hemo: keketala, onami, pekato yaye yambodimanyiyama. ³ Loko, Ende nombe amotshi wakate leteyi kewo: one oto lotolana. ⁴ Ndo Yeso, akeye tokani tawo, akate: loote wana welenyu la tokani ta koolo letema wanyu? ⁵ Ne da, naa loleki kii, da mbuta: pekato yaye yambodimanyiyama, kana da mbuta: emala, ndo kendakenda? ⁶ Koko, kele nyeye da ona oto aleko laa ladiko da kete dikoka da dimanyiya pekato: emala, kekandate okoni, osa mbeto keye, ndo tshoka lo loodu laye. ⁷ Ndo akemala, ndo akatshu lo loodu lande. ⁸ Saa kekeni oloyi wato okone, wakandama la woma, ndo wakatombola Zambi, lakasha ato nye yoho ya dikoka. ⁹ Oma lanoo akatshu eyale efula, Yeso akeni oto okiti lo fashi ke dipishanawo, ndo lakelameka Matayo. akawote: ondjele. oko oto akemala, ndo akoyele. ¹⁰ Oko watshi Yeso lo mesa lo loodu, nyende, efula kelambodi welambo ndo ato wa loseno la koolo wakaye da ndjole lande ndo la Ambeki wande. ¹¹ Ase Farisayo wakeni okoko, ndo wakate Ambeki wande: loote wana mwadimu wanyu ndekaka lelambodi welambo ndo ato wa loseno la koolo? ¹² Keso Yeso akoke, akate: aha wane wele kii wele la lazima la munganga, koko ekoni. ¹³ Nyotshu, ndo nyoteye kene keta: lemi nangaka dimanyiya, ndo aha weshasha. ne da lemi kondja ndjele ase losembwe, koko akanga wa pekato. ¹⁴ Laso Ambeki wa Joani wakaye le Yeso, ndo mbote: loote wana sho ndo Wafarisayo sho keshaka, koko Ambeki waye hawokesha? ¹⁵ Yeso akakadimula: angenyi womi koka sana saa kele omi aleko lawo? shii djeko londjaye yele omi akembama, ndo laso wakokesha. ¹⁶ Oto hadje mindo lo dihondo doyoyo lo dihondo dedjedja; ne da akemba yetshi ya dihondo, ndo akata djekaleka. ¹⁷ Hawodjaka lokina wana weyoyo lo wane wedjedja; lokina akina pemboka, wana tawalaka, ndo akina sheshoka; koko vo mbidjaka wana weyoyo lo wane akina weyoyo, ndo wana ndo akina wakitshawo. ¹⁸ Oko wakandawateka eneeteketa,enda,owandji omotshi akakomi,akayasokola laadwe laatondo kende,ko mbuta,onami l'odimoto ambovo kakiye;koko yaka,ahende anya, Ko akoyala la loseno. ¹⁹ Yeso akemala,ko akoyele la ambeki wande. ²⁰ Ko enda, odimoto letshi la hemo ke tomba dikila miaka dikumi la hende aka sukana lookongo wa Yeso,akakime ohembo wande wa dihondo. ²¹ ne da akateketaka ndame:naka lemi kime dihondo dande,lakokono. ²² Yeso akakadimo,ndo mbuta:yala la ohetoheto,onami l'odimoto,mbetawo keye kembokokonoya.ko odimotwako akakono ko saa keko. ²³ Saa kekakomi Yeso l'olodu l'owandji,ndo akeni wane waka daka ponge ndo oloyi w'ato wakadjaka lofunge, ²⁴ Akawate:nyomoo;ne da onodimoto havwe,koko amboshama.ko wakosoke. ²⁵ Saa keka watshanyema,nde akooto,akoshi lonya l'onodimoto,ndo onako akemala. ²⁶ lokumu lakahandjo lo etshi ke kete keko tshee. ²⁷ Saa keka mo Yeso omaleko,dimi pende dakatawoyelaka,wakawana:otooke ketshi,ona Davidi! ²⁸ Saa kekanakomi l'olodu,dimi daka sukana lande,ko Yeso akawate:nyu mbetawoka da lemi koka tshe keso? he,owandji,wakawookadimula. ²⁹ Okone akakime lo washo wawo,ata:atshemi oko mbetawo kenyu. ³⁰ ko washo wawo wakadiho.Yeso aka washa shurti:nyonge la yambelo aha oto mbeya. ³¹ Koko,kakawatombe,wakahandjola lokumu lande lo wodja tshe. ³² Woho wakawatatshokaka,enda,wakela odenge waha teketa le Yeso. ³³ Odenge omalambitshanyema,ebobo akateketa.oloyi wato waka shangala wakate:kanga loshi otoyi ne dikambo datenamaka lo Ezariel. ³⁴ Koko afarisayo wakate:omalokudu k'owandji weedenge ke tondjande edenge. ³⁵ Yeso aketeta lo ngelo tshe ya wake ndo ya totshiki,akafundisha lo synagogi,sambisha oteketa wa dimena wa dolelo,ndo konoya hemo tshe ndo komo tshe. ³⁶ Akeni oloyi w'ato,akandama la kangi kewo,ne da waka lengee ndo nemba,oko ekoko wele kema la onami. ³⁷ Okone akate ambeki:dina daleko efula,koko ekambi waleko tshiki. ³⁸ nyolombe okone owandji wa dina atomiekambi lo dina dande.