¹ Ko, akele Ambeki wande dikumi lahende, akawasha akoka wa mbitshanya nyuma ya koolo, ndo konola hemo tshee ndo walemavu. ² Nyende kombo ya Atomami dikumi lahende. latondo, Simona lelewo Petro, ndo Andele, onangende; Yakobo, ona Zebede, ndo Joani, onangende; ³ Filipe, ndo Baetelemiya; Thoma, ndo Matayo, olambodi welambo; Yakobo, ona Alufe, ndo Thadewo; ⁴ Simona ose Kanana, ndo Yuda Isikariyote, kanga lakafunge Yeso. ⁵ wane wele dikumi lahende wane wakatomi Yeso, kisha mbasha elembe wane: tanyotshokake le apagani, ndo tanyotoke lo ngelo yase Samariya; ⁶ Nyotshu djekaleka le ekoko wakashisho lo loodu lIzariyele. ⁷ Nyotshu, nyotosambisha, ndo nyotote: Dolelo da lolongo daya suke. ⁸ Nyotokonole ekoni, nyotolole edee, nyotonya sodi, nyototshanya edenge. nyakapate anyanya, nyosha anyanya. ⁹ Nyotosake kanga lowoko, kana akuta, kana falanga, lekawa; ¹⁰ Kana saki lo lokende, kana kandjo hyende, kana elato, kana tshini yosongo; ne da ose olemu kokaka la yongo yande yande. ¹¹ Lo ngelo kana lo shinga mwisho konyoto, nyombole naka koleko oto omotshi la kinemo da nyolongola; ndo nyotshikale lakande polo lonyokaloya. ¹² Lombotwelo ke lo loodu, nyowemule; ¹³ Ndo, naka loodu aleko la kinemo, kii kenyu keye loko; koko naka lo kema la kinemo, kii kenyu kekaloya lenyu. ¹⁴ Sa kele hawonyolongola ndo hawolonge eteketa wanyu, nyotombe lo loodu lako kana lo ngelo keko ndo nyohome otoko wa lekolo wanyu. ¹⁵ Lambonyote lo mete: loshi la kilombo, wodja wa Sodoma ndo Gomora hoyala la sowi oko ngelo kiko. ¹⁶ Nyende, lambonyotoma oko esongo wekoko lateyi wa foo. nyoyale yeewo oko eloyi, ndo kii oko kunguru. ¹⁷ Nyoyakitsha la yeewo lato; ne da wakonyotowa le tuminadi, ndo wakonyokomola adanga lo Sinagogi yawo; ¹⁸ Wakonyosoya, loote wami, letondo ke wa guvelenele ndo letondo ke kumiyadokanga, da menya oshuuda lewo ndo le apagani. ¹⁹ Koko, saa kownyotowa, tanyengengake kana lo yoho yonyoteketa kana kene konyota: kene konyota kekonyoshama kokiko saa; ²⁰ Ne da aha nyu keteketa, nyuma ke shenyu koteketa lenyu. ²¹ Wane wakoto wakodakana, ndo ona lombotshi; ana hawoke ambotshi wawo, ndo wakadaka. ²² Nyakotonama lato tshee, loote wa lokombo lami; koko kanga lovumidiya polo lemwisho akoka. ²³ Saa kowonyosoya lo ngelo kimotshi, nyolawo lo kikina. lambonyote lo mete, hanyoma mbeteta ngelo ya Izariyele ko ona oto ataye. ²⁴ Ombeki haleki mwadimu, kana okambi haleki owandji wande. ²⁵ Ahombama Ombeki ayale oko mwadimu wande, ndo okambi oko owandji wande. naka wakele mwadimu wa loodu Belezebule, mala ngiana yowele okone ato wa lo loodu lande! ²⁶ Tanyowakake okone woma poo; ne da ko dikambo doshami daheyama, naka shidi yaheyama. ²⁷ Kene kenyotemi lo didjima, nyokite lateyi wa loshi; ndo kene kenyotewo lo toyi, nyosambisha lo tshoto. ²⁸ Tanyokake woma wane wadaka demba ndo wahahombe daka anima; nyoke woma kanga ladaka anima ndo demba lo Gehena. ²⁹ Hawosondjaka fudu hyende lo dikuta otoyi? koko, hako lo kete aha lolango la shenyu. ³⁰ Ndo kanga divo da lote wanyu mbademaka. ³¹ Tanyokake okone woma poo: nyu ndeka fudu efula kinemo. ³² Dako dele, oto tshee lahatubu letondo kato, lakotubu letondo ke shemi lele lolongo; ³³ Koko lomanguna letondo kato, lakowanguna ndolemi letondo ke shemi lele lolongo. ³⁴ Tanyofonyake da lakaye lendjodja kii lo kete; lemi kondja ndjodja kii, koko opanga. ³⁵ Ne da lakaye da ndjohandjola oto la shende, osekaseka la nyangende, okilo la wadi oto; ³⁶ Ndo oto akoyala latoyi ato wa lo loodu lande. ³⁷ Kanga lalanga shende kana nyangende ndekami kema la kinemo lemi, ndo kanga lalanga onande kana osekaseka wande ndekami kema la kinemo lemi; ³⁸ Kanga la hembe kuruse kende, ndo handjele, kema la kinemo kemi. ³⁹ Kanga lolanga loseno lande akolishisha, ndo kanga loshisha loseno lande loote wami akolitana ⁴⁰ Kanga lonyolongola amonongola, ndo kanga lamonongola, ambolongola kanga lakatomi. ⁴¹ Kanga lalongola Ombutshi oko Ombutshi akolonga madipo wOmbutshi, ndo kanga lalongola kanga losembwe oko kanga losembwe akalongola madipo wa kanga losembwe. ⁴² Ndo oto tshee losha kanga kopo dashi watshitshi le dikenda le ane akenda loote aleko Ombeki wami, lambonyote lo mete, hoshisha poo madipo wande.