¹ Saa kekamani Yeso mbisha elembe wande le Ambeki wande dikumi lahende, akamo lano, da fundisha ndo sambisha lo ngelo ke wodja. ² Joani, akoke wateketa lo muyololo wande etshaa wa Kristo, akatomi Ambeki wande da mbote: ³ Wee kele one lahombandja, kana shokaka konga okina? ⁴ Yeso akakadimula: nyotshu nyotote Joani kene kokanyu ndo kene kenanyu: ⁵ Dimi dena, dikuse dokendakenda, sodi yamboshila, poke wamboka, edo wambolo, ndo lokumu lololo lambosambishama le ase wola. ⁶ Ololo le kanga lahoyala lemi lokolo lotakanya! ⁷ Oko wakawatatshokaka, Yeso akatate la mbute oloyi wato, lo dikambo da Joani: akanyatshu tenda lo shenga? losondjo lakembama la lopepe? ⁸ Koko, akanyatshu tenda? oto oloti ahondo wa beyi? nyende, wane walota ahondo wa beyi waleko lo vudu ya kumiyadikanga. ⁹ Akanyatshu okone tenda? Ombutshi? mete, kenyotemi, ndo ndeka Ombutshi. ¹⁰ Ne da one ele kanga lakandikama: nyende, lambotoma dikendji dami letondo kelongi keye, da tayarisha mboka keye letondo keye. ¹¹ Lambonyote lo mete, lateyi wa wane wakoto oma le adimato, kolakenamo woke ndeka Joani obatizani. koko, kanga loleki dikenda lo Dolelo da lolongo aleko opanga tondo kende. ¹² Tate shii ya Joani obatizani polo lelo, Dolelo da lolongo daleko la kudu, ndo akanga wa kudu koto loko. ¹³ Ne da Ambutshi ndo olembe wakatabiri polo le Joani; ¹⁴ Ndo, naka nyunangaka mboka, one lele Eliya lakahombe ndja. ¹⁵ Kanga lele latoyi wamboka oke. ¹⁶ Lana alinganishami lone lolonga? aleko lo fona lana wokiti lo fashi yamboledi, ndo wele, wate ana akina, ¹⁷ Wata: takanyonwe tokenyo, ndo nyu hanyokenyisha; takembi esambo, ndo nyu hanyoyakiyanyisha. ¹⁸ Ne da Joani akaye, konde kana kono, ndo wakate: aleko la odenge. ¹⁹ Ona oto akaye, ale ndo ano, ndo wambota: kanga deshi ndo kanga noshi, ongenyi wa elambodi welambo ndo ato wa loseno la koolo. koko lomba lakenya etshaa wende. ²⁰ Laso akatate manya ngelo yele yatshi la efula kehindo wande, loote ngelo yako kotubu. ²¹ Mananu leye, Korazina! mananu leye, Bethsaïda! ne da, naka ahondo wakatshema lateyi wanyu watshi lo Tyra ndo lo Sidona, aya edja wakatubu, wosa saki ndo otoko. ²² Dako dele lambonyote: loshi la kilombo, Tyra ndo Sidona hawoyala la dikambo efula oko nyu. ²³ Ndo leye, Kapernauma, okembama lolongo? kema. okokitshakitshama polo lo shii la nyoyi; ne da, naka ahindo wakatshema lateyi waye wakatshema le Sodoma, wotoyala lokina ndo lelo. ²⁴ Dako dele lambonyote: loshi la kilombo, wodja wa Sodoma hoyala la dikambo efula oko wee. ²⁵ Lo shii yako, Yeso akoshi oteketa, ndo mbuta: lambokotombola, mbapa, Owandji wa lolongo ndo wa lo kete, lo woho wakayashe ane akambo le ase lomba ndo ase timba, ndo lo woho wakatshike le ana. ²⁶ Mete, mbapa, lambokotombola lo yoho yakalange okone. ²⁷ Akambo tshee wakambishama oma le shemi, kowoto leya ona, naka aha mbapa; kowto leya lokina mbapa, naka aha ona ndo kanga lele ona lo nanga mboduya. ²⁸ Nyoye lemi, nyu tshee wane wambolemba ndo wele la wotsho, ndo lakonyosha mapumuziko. ²⁹ Nyoshi lowanga lami lenyu ndo nyolongole elembe wami, ne da ndeko kii ndo okitshakitsha lotema; ndo nyakotana mapumuziko lo anima wanyu. ³⁰ Ne da lowanga lami laleko kii, ndo wotsho wami waleko osadi.