¹ Lo shii yako, Yeso akete lo mashamba wa mana loshi la sabato. Ambeki wande, watshi la ndjala, wakatate la pembola seke ko vonde. ² Ase Farisayo, wakeni okone, wakawote: enda, Ambeki waye wambotshe kene kehakoke tshe saa ke sabato. ³ Koko Yeso akakadimula: nyu kosoma kene kekakomi Davidi, saa ketshinde la ndjala, nde ndo wane watshi lande; ⁴ Okonde wakandoto lo loodu la Zambi, ndo atale ekate wa dambo, wakiwo komborusiya dande, aha le wane watshi lande, ndo wane wakawakonge le Wakohani watoo? ⁵ Kana, nyu kosoma lolembe da, shii ya sabato, Wakohani mbuvaka sabato lo tepelo, aha landjaanya? ⁶ Koko, lambonyote, koleko lane yango miotshi yoleki tepelo woke. ⁷ Naka nyumbeyaka kene keta: lambosa yambalo lo ketshi, ndo aha lo weshasha, totonyohomba mbisha dilanya le akanga waha la dikambo. ⁸ Ne da ona oto kele mwadimu wa sabato. ⁹ Akamo malano, Yeso akoto lo Sinagogi. ¹⁰ Ndo nyende, akatani oto omotshi latshi lonya mbola.wakambola Yeso: kokaka da konola shii ya sabato? atshi kele da pata yoho ya mboshita. ¹¹ Akakadimula: naa oto lateyi wanyu, aleko lokoko otoyi ndo amboko lo difuku loshi la sabato, howonda da mbolongosola? ¹² Mala nywana yele oto ndeka okoko kinemo! aleko dimena da tshe ololo shii ya sabato. ¹³ Laso akate oko oto: nula lonya laye. akanula, ndo lakayala dimena oko lokina. ¹⁴ Ase Farisayo wakatombe, ndo wakendana lo yoho ya mbodaka. ¹⁵ Koko Yeso, akeye, akatshu etale la kiko fashi. oloyi wato wakoyele. akakonola ekoni tshee, ¹⁶ Ndo akawadjange la kyokomiya da aha vo mbewonya, ¹⁷ Kele kekotshami kene kekateketa oma le Esaya, Ombutshi: ¹⁸ Nyende okambi wami lakamasone, olangemi wami lende anima wami waleko lolo. lakodja nyuma kemi lende, ndo akosambisha losembwe lo wedja. ¹⁹ Hotshikitanya poo; hawana poo, ndo kowoto loka doyi dande lesese. ²⁰ Nde holanya losondjo lakahembo, ndo hodima shase ya dja, polo londolendja losembwe. ²¹ Ndo wedja wako tokoni lo lokombo lande. ²² Wakawela kanga edenge dimi ndo ehoke, ndo akokonola, kele ehoke akateketa ndo mena. ²³ Oloyi wato tshee wakambe wakate: aha one kele okana wa Davidi? ²⁴ Ase Farisayo, wakoke osoku, wakate: one oto mbitshanyaka edenge oma le Belezebule, owandji wedenge. ²⁵ Oko Yeso akeyaka tokani tawo, akawate: Dolelo tshee da yakahanya lende ndame dambolanyema, ndo ngelo tshee kana loodu layakahanya lende ndame hakoke sena. ²⁶ Naka Shetani ambotsha Shetani, amboyahakanya nde ndame; okonde okone wotshikala Dolelo dande? ²⁷ Ndo naka lemi, lambotshanya edenge oma le Belezebule, ana wanyu, omalena owotshanya? loote wana kowoyala vo vame toshushi tanyu. ²⁸ Koko, naka oma lo nyuma ke Zambi ke tshanyami edenge, Dolelo da Zambi dakaye okone djalenyu. ²⁹ Kana, okonde oto omotshi koka mboto lo loodu loto la kudu ndo mbuva dango dande, aha keleka tondo oko oto kanga kudu? laso ndame akova loodu lande. ³⁰ Kanga lele kema lami aleko otoni wami, ndo kanga lahasangana lami ashisho. ³¹ Dako dele lambonyote: pekato tshee ndo toyi tshee dakodimanyiyama le ato, koko toyi da tola nyuma hadodimanyiyama. ³² Oto tshee loteketa da koolo le ona oto, akodimanyiya; koko oto tshee loteketa koolo le nyuma kekila, howodimanyiya kanaga lo lone lolonga kanga lo lolonga layaye. ³³ Kana mbuta da osongo waleko dimena ndo olowa wande waleko dimena, kana mbuta osongo waleko koolo ndo olowa wande waleko koolo; ne da vo mbeyaka osongo oma lo olowa. ³⁴ Doho deloyi, okonde wahombanyu mbuta akambo wa dimena, koolo kelenyu? ne da elola kotema keteketa onyo. ³⁵ Oto la dimena tondjaka akambo wa dimena lo woshasha wande wa dimena, ndo oto la koolo tondjaka akambo wa koolo lo woshasha wande wa koolo. ³⁶ Lambonyote: loshi la kilombo, ato wakenya oteketa tshee wa koolo wakandatondja. ³⁷ Ne da oma lo eteketa waye oko handa, ndo oma lo eteketa waye oko hukumiwa. ³⁸ Laso amotshi wa Endele nombe ndo ase Farisayo wakoshi oteketa, ndo wakate: mwadimu, sho nangaka mena wee sala dihindo. ³⁹ Akakadimula: lolona la koolo ndo la loseka lambolomba dihindo; kodihondo dikina dowonyasha ele ne da Ombutshi Joanase. ⁴⁰ Ne da, woho waka watshi Jonase shii shato ndo etsho esato lotema wa losee la woke, yoho yako koyala ona oto shii shato nso etsho esato leese ke kete. ⁴¹ Ato wa le Niniva wakemala, loshi la kilombo, la lolonga lone ndo wakohukumiwa, loote wakayakaloya lo esambishelo ke Jonase; ndo nyende, koleko lane woleki Jonase. ⁴² Kumekanga ke Midi akemala, loshi la kilombo, la lone lolonga ndo akohukumu, loote akaye atshuku wa kete le nonga lomba la Salomona, ndo nyende, koleko lane kanga loleki Salomona. ⁴³ Saa kekatombe nyuma ke koolo le oto omotshi, akatshu lo fashi ketale, letona momuya, ndo kotana poo. ⁴⁴ Laso akate: lakokaloya lo loodu lami kele akamatombe; ndo, saa kondokama, akalitani hwe, pepe ndo nongoswama. ⁴⁵ Akotsho, ndo akosa lande nyuma kyina esambele ya koolo efula mboleka; wakoto lo loodu, wakokita, ndo shurti la mwisho ya oko oto ndeka koolo ya tondo. akoyala woho wako wame le lone lolonga la koolo. ⁴⁶ Oko yeso akateka lokina oloyi wato, nyende, nyangende ndo analengo wande, watshi landja, wakonaka da mbote. ⁴⁷ Oto omotshi akawote: enda, nyangeye ndo anangeye waleko landja, ndo waleko lo kona da kote. ⁴⁸ Koko Yeso Akakadimula kanga lakawoteka: ele mama kemi, wana wele anawalengo wami? ⁴⁹ Ko akanula lonya le Ambeki wande, akate: nyende nyangemi ndo anawalengo wami. ⁵⁰ Ne da, oto tshee la tshe lolango la shemi lele lolongo, oso kele onangemi, ndo kadiyomi, ndo nyangemi.