¹ Loshi lako, Yeso akatombe oma lo loodu, ndo akakite lomamu woduwa. ² Oloyi wato wa woke wakahomana suke lande, akade lo wato, ndo akakite. oloyi wato tshee wakawendaka lelongi. ³ Akateketeka lo ekela lo akambo efula, ndo akate: omoni akatombe da mone. ⁴ Oko wakandoneka, etshi ke wojo wakako lotale wa mboka: fudu yakaye, ndo wakale. ⁵ Etshi kikina kekako lo fashi ya lboko, kene atshi kondjala kete efula: akemala kako, loote wa nde kotana kete yotale; ⁶ Koko, saa kekahoto wonya, akoto dja ndo moma, loote wa koedo. ⁷ Etshi kikina kekako lateyi watende: atende wakade, ndo wakasenya. ⁸ Etshi kikina kekako lo kete ya dimena: akasha olowa, lotongo lokama, okina akumi asamalo, okina akumi asato. ⁹ Kanga lele latoyi wa mboka oke. ¹⁰ Ambeki wakasukana, ndo wakawote: loote wana wateketaye lo ekela? ¹¹ Yeso akakadimula: loote wakanyosha da mbeya lolombo la Dolelo da lolongo, ndo keso kombishama lewo. ¹² Ne da wakosha kanga lele laa, ndo akoyala lefula, koko kanga laha laa wakokumuya kanga kene kelende laa. ¹³ Dako dele ndeko lo mbatekete lo ekela, loote lo mena da haweni poo, ndo lo mboka da hawoke kana hawoyele. ¹⁴ Ndo lewo akotshami otabiri wa Ezayi: nyakoka latoyi wanyu, ndo hanyoka poo; nyakenda la washo wanyu, ndo hanyena poo. ¹⁵ Ne da otema wa wone wodja aya anyanya; wambokeketshe atoyi wawo, ndo wambodiha washo wawo, la woma wa hawoyena la washo wawo, hawoyoka latoyi wawo, hawoyoyela otema wawo, hawoyokadimo, ndo kele handjakonola. ¹⁶ Koko ololo le washo wanyu, loote waleko lo mena, ndo atoyi wanyu loote waleko lo mboka! ¹⁷ Lambonyote lo mete, efula ke Ambutshi ndo ase losembwe wakakombola mena kene kenanyu, ndo hawokieni, mboka kene kokanyu, ndo wahokioki. ¹⁸ Nyu okone, nyolonge kene keta one okela wa omoni. ¹⁹ Saa kele oto lo ndjela oteketa wa lo Dolelo ko hoke, otoni londja ndo minya kene kekonama lotema wande: one oto ele kanga lakalongola woho lo mboka. ²⁰ Kanga lakalongola woho lo fashi ya mboko, ele kanga loka oteketa ndo lalongola kako lolo; ²¹ Koko nde kema ledo lende ndame, aleko lo kosa mbokike kana la sowi loote woteketa, ambotana yekenende. ²² Kanga lakalongola woho lateyi watende, ele kanga loka oteketa, koko lende sakisaki da lone lolonga ndo otakanya wase engonyi kitshakitshaka oteketa wako, ndo mbetshaka komazima. ²³ Kanga lakalongola woho lo kete ya dimena, ele kanga loka oteketa ndo lalonga; aleko lo tondja olowa, ndo lotongo mbishaka lokama, okina akumi asamalo, okina akumi atanu. ²⁴ Akawate okela okina, ndo akate: Dolelo da lolongo fonaka la oto lakone woho wa dimena lo shamba yande. ²⁵ Koko, saa kele ato lo ndala, otoni wande akaye, okone lokangaka lateyi wa mana, ndo akatshu. ²⁶ Saa kekole denge ndo tondja olowa, lokangaka lakatombe ndonde. ²⁷ Ekambi wa mwadimu wa lo loodu wakaye ndjowote: Owandji, wee komone woho wa dimena lo shamba yaye? lende ayaye okone lone lokangaka? ²⁸ Akakadimula: aleko paka otoni kekatshe osoku. ndo ekambi wakawote: wee nangaka sho tsho totolionule? ²⁹ Kema, kekandate, la woma lo monula lokangaka, hanyotonula saa keko keme mana. ³⁰ Nyotshike mbola kame omotshi lokina polo lo dina, ndo lo etena ke dina, lakote wase wanaa: nyonule tondo lokangana, ndo nyone lomamu da mbotshumba, koko nyoni mana lo tongo yami. ³¹ Akawate okela okina, ko akat: Dolelo da lolongo fonaka la lotongo lele oto akoshi da mone lo shamba yande. ³² Tshyongotongo tatshiki lo weho tshee; koko, lo saa ketombande, aleko woke ndeka djeshi ndo ndjala osongo, lo yoho yele fudu ya lolongo ndjokita lo taki yande. ³³ Akawte one okela okina: Dolelo da lolongo fonaka la wana wosa odimoto ndo mbidja lo bipimu esato yofumbu, polo edja kosohana mbunga tshee. ³⁴ Yeso akate oloyi wato aso akambo tshee lokela, ndo nde kombateka paka lokela, ³⁵ Kele kakotshami kene kekatekata Ombutshi: lakodihola onyo wami lokela, lakotangaza akambo wakashama tate etongelo ke duniya. ³⁶ Okone akakaloya oloyi wato, ko akakaloya le ngelo. Ambeki wande wakasukana lende, ko wakate: otofafanuwe okela wolevi wa lo shamba. ³⁷ Akakadilula: kanga lone woho wa dimena, ele ona oto; ³⁸ Shamba, ele duniya; woho wa dimena, ele ana wa lo Dolelo; olevi, ele ana wa mayele; ³⁹ Otoni lakone, ele Diabolo; dina, ele mwisho wa duniya; wane wana, ele andjelo. ⁴⁰ Koko, oko wanyawo olevi ndo wawodjawo lo dja, akoyala yoho yako yame le mwisho wa duniya. ⁴¹ Ona oto akotoma andjelo, wakoyokumuya lo Dolelo dande looka tshee ndo wane watshe koolo: ⁴² Ndo akasokola lo loombe la kangi, leko koyala delo ndo ekakatanelo ke wanyu. ⁴³ Okone wane wele kokele wako angaziya oko wonya lo Dolelo da shewo. kanga lele latoyi wa mboka oke. ⁴⁴ Dolelo da lolongo fonaka lokina oko yango lo shami lo shamba. oto lakotani akoyishe; ndo lolo wande, akosondja kene tshee kelende laa, ndo akosomba oko okonda. ⁴⁵ Dolelo da lolongo fonaka la kanga koolo lona woho wa dimena . ⁴⁶ Akatani woho wa beyi kudu; ko akatshu tosondja kene tshee kekinde la, ndo akalisombe. ⁴⁷ Dolelo da lolongo fonaka loteyi wakawasokola lo ndjale ndo mundaka see ya yoho tshee. ⁴⁸ Lo saa kondolola, ekenya wakowosa; ko, kisha kita lomamu wa ndjale, wakokita lo wato kene kele dimena, ndo wakosokola kene kele koolo. ⁴⁹ Akoyala yoho yako yame le mwisho wa duniya. andjelo wakoya ndjokakitola aknga wa koolo lakanga wololo, ⁵⁰ Ndo wakasokola lo kuka ke kangi, leko koyala delo ndo ekeketani ke wanyu. ⁵¹ Nyamboka aso akambo? - okoso, kekawakadimula. ⁵² Ko akawate: dako dele, Ondele tshee landikami le kanga lenda Dolelo da lolongo fonaka mwadimu wa loodu la tondja yango yande akambo weyoyo ndo akambo wedjedja. ⁵³ Lo saa kekashile Yeso eso ekela, akamo malanoo. ⁵⁴ Akatshu lo wodja wande, akafundisha lo Sinagogi, lo yoyo ya wane wakoke wakamne ndo wakate: omalende oye nye yimba ndo ane ahindo? ⁵⁵ Aha ona kanga leme loodu? aha Madiya kele nyangende? Jakobo, Yozefu, Simona ndo Yuda, aha vo kele anangende? ⁵⁶ Ndo akadiyo wande vo tshee kema laso lane? omande oye ane akambo tshee? ⁵⁷ Ndo atshi lewo yoho ya mbohemba. koko Yeso akawate: Ombutshi monyomaka paka lo wodja wande ndo lo loodu lande. ⁵⁸ Ndo nde ko tshee ahindo efula lo kiko fashi, lote wetema kudu kewo.