¹ Tanyolomboshake poo, kele ndonyu hanyolomboshama ndonyu. ² Ne da wakonyolombosha lo kilombo kelomboshanyu, ndo wakonyopima lo kipimu kepimananyu. ³ Loote wana wenaye efumbu kele lo soo da onangeye, ndo wee heni yetshi yotamba yele lo soo daye? ⁴ Kana okonde wateye onangeye: otshike minya efumbu kele lo soo daye, wee lele la tshini yitamba yele lo soo daye? ⁵ Wanafiki, onya tondo tondo tsheni ya otamba yele lo soo daye, ndo laso koyena okonde wa minya efumbu lo soo da onangeye. ⁶ Tanyoshake akambo wekila le foo, ndo tanyosokolake fusa letondo ke tonona, la woma wa hawoyotambatamba lekolo, hawoyokaloya ndo hawonyohembola. ⁷ Nyolombe, ndo wakonyosha; nyoni, ndo nyakopata; nyokokole, wakonyodihola. ⁸ Ne da oto tshee lalomba nongolaka, kanga lona tanaka, ndo wakodihola kanga lakokola. ⁹ Oto akona lasanyu lasha onande dive, naka ambolomba okate? ¹⁰ Kana, nde mbolomba lose, ko nde mbosha oloyi? ¹¹ Naka okone, ato wa koolo oko welenyu, nyumbeyaka mbisha dango damena le ana wanyu, mala ngiana le mbapa lele lolongo akosha dango damena le wane wolomba. ¹² Kene tshee konanyu ato tshe lenyu, nyotshe yoho yako yame lewo, ne da oso olembe ndo Ambutshi. ¹³ Nyoto lo mulango wa tshiki. ne da woke kele mulango, woke kele mboka ketola ato leshishwolo, ndo efula koto loko. ¹⁴ Koko mboka ke tshiki, osese watshiki kele mboka ketola ato lo loseno, ndo koleko tshiki ke tana. ¹⁵ Nyowo Ambutshi wa kashi. waleko londja lenyu lahondo wekoko, koko leteyi waleko koto apotodi. ¹⁶ Nyakaweya lelowa wewo. onde vo mumbaka elowa ladiko datende, kana fingo ladiko dakalanga? ¹⁷ Osongo tshee toshaka elowa wamena, koko osongo wa koko toshaka elowa wa koolo. ¹⁸ Osongo wa dimena hakoke tondja elowa wa koolo, kana osongo wa koolo hakoke tondja elowa wa dimena. ¹⁹ Osongo tshee wahato elowa wa dimena akohemboma ndo lokwama lo dja. ²⁰ Oma lo elowa wawo okone konyowaweya. ²¹ Wane wambute: Owandji, Owandji! hawoto votshe lo Dolelo da lolongo, koko one tshee latshe lolonga la shemi lele lolongo. ²² Efula wakombute loshi lako: Owandji, Owandji, sho kotabiri lo lokombo laye? sho kombitshanya edenge lo lokombo laye? ndo sho kotshe ahindo efula lo lokombo laye? ²³ Laso lakowate hwehwe: lemi konyeya kanga loshi, nyomumwe, nyu wane wakatsheka pekato. ²⁴ Dako dele, oto tshee loka eso eteketa watami ndo awadje lotsha, akofona la oto la yewo lakate loodu lande lo wave. ²⁵ Vula kekalo, pepe ya kudu yakaye, pepe yakapepe ndo yakayakosha lo loodu lako: loodu lako koko poo, loote akahikama ladiko da wave. ²⁶ Koko oto loka eso eteketa watami, ndo hawadje lotsha, akofona la oto laha la yimba lakake loodu lande lo lokongo. ²⁷ Vula kekalo, pepe ya kudu yakaye, pepe yakapepe ndo yakakosha loodu lako: loodu lako lakako, ndo sowi datshi woke. ²⁸ Kisha Yeso shila la mbuta eso eteketa, oloyi wato wakalange mafundisho lande; ²⁹ Ne da akafundishaka oko atshi la lowandji, ndo aha oko Endele nombe wawo.