¹ Nyotshike da ndjaenyanya lo losembwe lanyu letondo ke ato, da menamo; lokongo, hanyopata madipo omale shenyu lele lolongo. ² Saa ketowanyu, ahamboda danga letondo keye, oko watshe wanafiki lo Sinagogi ndo lesese, kele da vo tombwama le ato. lambonyote lo mete, wambolongolaka madipo dawo. ³ Koko saa ketowaye, aha lonya laye la lomoso mbeya kene ketshe la lomi, ⁴ Kele woshasha waye wete lo siri; ndo sheye, lena lo siri, kakosha. ⁵ Saa kelombanyu, ahanyu ndjala oko wanafiki, wane walanga nomba wemema lo Sinagogi ndo latshuku wesese, da menamo le ato. lambonyote lo mete, wambolongolaka madipo wawo. ⁶ Koko saa kelombaye, oto lo tshumba keye, diha mulango waye, ndo lomba sheye lele leko lo fashi ke siri; ndo sheye, lena lo siri, akokosha. ⁷ Lo nomba, totake eteketa efula wanyanya, oko apagani, wafonya kana one la kudu keteketa kowowasha. ⁸ Tanyafonake; ne da shenyu mbeyaka kele kelenyu laa lazima, tondo kenyu mbolomba. ⁹ Nyende okone okonde wahombanyu nomba: sheso lele lolongo! lokombo laye la tshakwami; ¹⁰ Dolelo daye daye; lolango laye latshemi la kete oko lolongo. ¹¹ Otosha lelo okate waso wa loshi tshee; ¹² Otodimanyiya lo makosa waso, oko wadimanyiyaso ndosho wane watonge; ¹³ Totokonyake lohemba, koko ototshungole le otoni. ne da leye kele dango tshee, lo nongo tshee, Dolelo, kudu ndo lotombo. Amina! ¹⁴ Naka nyu dimanyiyaka ato munga yawo, shenyu lele lolongo akonyodimanyiya ndonyu; ¹⁵ Koko naka nyu hanyodimanyiya ato, shenyu honyodimanyiya lokina munga yanyu. ¹⁶ Saa ke keshanyu, tanyoyalake lokeyi, oko wanafiki, watsho elongi mbola, da menya ato da waleko lo kesha. lambonyote lo mete, wambolongolaka madipo wawo. ¹⁷ Koko saa kekeshaye, otele ote waye ndo sola elongi keye, ¹⁸ Kele aha menya ato da oleko lo kesha, koko sheye lele leko lo fashi ke siri; ndo sheye, lena lo siri, akokosha. ¹⁹ Nyo tshike ndjaombe dango da nemo lo kete lene ele loombo la kutu da lanya ndo lene akoka wovi tungona ko mbuva; ²⁰ Koko nyo yaombe dango da l'olongo, lene ele loombo la kutu hawokoke tondola poo, ndo lene ele wevi hawokoke mboto ko mbuva. ²¹ Ne da lene ele ongonyu, leko kahomba monga otema waye. ²² Soo aleko tala da demba, ndo naka soo daye deko dimena kete demba daye tshee dakonga osase; ²³ Koko naka soo daye deko koolo, kete demba daye tshee dakonga lo wodjima. koko naka osase wele leye aleko wodjima, angana woyala lo wodjima efula lo wodjima! ²⁴ Ndokoto lakoka kambee ewandji ehende olemu. neda akohetsha omotshi ko nanga okina; omotshi, ko nde mbeko okina. nyu hanyokoke kambee Zambi la ongonyu. ²⁵ Lote wako kanyoyemi te: nyotshike ndjakiyanya lote wa loseno lanyu nyate ayotole naa? kana lote wa demba danyu nyate: ayotolota? kana loseno haleki yango ya nde! kana demba haleki ahondo? ²⁶ Nyende fudu ya l'olongo: vo hawone ndo hawoni ndo hawombe dango lo lokala, koko shenyu lele l'olongo mbaleshaka, ko nyu hanyoleki fudu kinemo? ²⁷ Oto akona ahomba mboda wodu wande wa lonya lote wa yakiyanya nde lo loseno lande? ²⁸ Ndo lande ayakiyanya nyu lote wa ahondo? nyo pate wetshelo oma le alembolembo wa loswee woho wolawo hawokambe ndo hawotele ahondo? ²⁹ Ko lemi lambonyotee te: kaanga Salomona la lotombo lande tshee koondo taa oko otoyi omotshi wa l'ateyi wawo. ³⁰ Ko naka Zambi ndotshaka alembolembo wane wele lelo ko loyi wakosokoma, ayoleka nyolotsha nyu akanga wa mbetawo ketshiki? ³¹ Okone nyotoyakiyanyake popo nyate otole naa? kana otono naa? kana otolota naa? ³² Ne da asakambo aleko apaganu katawoni shenyu lele l'olongo mbeyaka da ate nyaleko l'ohomba. ³³ Nyoni tondotondo Dolelo ndo losembwe la Zambi; kele so dango tshee nyakodipata ladiko. ³⁴ Nyotoyakiyanyake okone da loyi; l'akambo wande loshi la loshi l'akambo wande.