¹ Kakatate wonya poto, epalanga tshee wa Wakohani ndo wazee wa wzdja wakoshi dako loote wa Yeso, da mbodaka. ² Kisha mbokeleka, wakotole, ndo mbotowa le Pose Pilato, guvelenele. ³ Laso Yuda, lakofunge, akeni ambofunga, akatubu, ndo kaloya akuta akumi asato le epalanga wa Wakohani ndo wazee, ⁴ Ata: lakatshe pekato, da funga dikila doto laha ladikambo. wakokadimula: keso hatende? keso kendaka weme. ⁵ Yuda akasokola akuta lo telepo, akakaloya, ndo akatshu toyadja yole. ⁶ Epalanga wa Wakohani wakatongona ndo wakate: kema dihombo mbidja lo woshasha wekila, loote aleko beyi da dikila. ⁷ Ndo, kisha vo mbofunga, wakasombe la ako akuta shamba ya potifaro, lo doombo dangendangenda. ⁸ Dako dele shamba yako yakelame shamba ya dikila, polo lelo. ⁹ Laso kekakotshama kene kekateketa oma le Yeremiya, Ombutshi: wakotshi akuta akumi asato, kinemo ke one lakapime, lakawapime oma le ana wIzariyele; ¹⁰ Ndo wakawosha lo shamba ya potifaro, oko Owandji akandawate. ¹¹ Yeso akasambe tondo ke guvelenele. guvelenele akawombola, lo ene eteketa: wee kele kumekanga kase Yuda? Yeso akokadimula: wee keta. ¹² Koko nde kokadimula lo wembola wa epalanga wa Wakohani ndo wazee. ¹³ Laso Pilato akawote: wee hoke akambo angana wakoshitawo? ¹⁴ Ndo Yeso kombokadimula lo kanga oteketa otoyi, keso kekambe guvelenele efula. ¹⁵ Lo fete tshee, guvelenele atshi la otshaa wa tondja ose muyololo, one lakalomboka oloyi wato. ¹⁶ Watshi laa okone ose muyololo la lokumu, lokombo lande Barabasi. ¹⁷ Oko wakawahomana, Pilato akawate: naa lalanganyu nyotondje, Barabasi, kana Yeso, lelewo Kristo? ¹⁸ Ne da akeyaka da atshi lo lolanga kekawafunge Yeso. ¹⁹ Saa ketshinde kita lo tuminadi, wadende akawote: kodikambo lasaye la oto one laha ladikambo; ne da lelo lakasowi efula lodo loote wande. ²⁰ Epalanga Wakohani ndo wazee wakenya oloyi wato da nomba Barabasi, ndo ndjakisha Yeso. ²¹ Guvelenele akoshi oteketa, akawate: naa lalanganyu lo vo vahende mbotondja? wakakadimula: Barabasi. ²² Pilato akawate: atshemi okone Yeso, one lelewo Kristo? votshee wakakadimula: adjami lo kuruse! ²³ Guvelenele akate: koko naa koolo kotshende? ndo wakawana lokina la kudu efula: adjami lo kuruse! ²⁴ Pilato, akeni da nde kopata koyango, koko looka lakatetemala, akoshi ashi, akasole anya letondo koloyi wato, ndo akate: ndeko kema ladikambo lo dikila da one oto laha la dikambo. keso nyendaka. ²⁵ Ko wodja tshee wakakadimula: dikila dande dako leso ndo le ana waso! ²⁶ Laso Pilato akatondjiya Barabasi; ndo, kisha komola Yeso adanga, akotowe da mbodja lo kuruse. ²⁷ Asoda wa guvelenele wakatole Yeso lo fashi ketowodakanaka, ndo wakahomana lande oloyi wato wa woke. ²⁸ Wakokolola ahondo wande, ndo wakolotsha kandjo ke wotsho. ²⁹ Wakatele shapo ketende, kekawakitsha ladiko dote wande, ndo wakawodje losondjo lo lonya la lomi; ko, wakakake adwe letondo kende, wosoka, wata: moyo, kumekanga ke Yuda! ³⁰ Ndo wakawote soyi, waokshi losondjo, ndo wakokomola ladiko dote wande. ³¹ Kisha vo mbola, wakokolola kandjo, wakokaloya ahondo wande, ndo wakotole da towodja lo kuruse. ³² Saa kekawatombe, wakahomana la oto omotshi lose Sirena, lelewo Simona, ndo wakawodjange da memba kuruse ke Yeso. ³³ Wakakomi lo fashi kelewo Gologota, kene keta ewako, ³⁴ Wakawosha kendeno wana tshanga lololo; koko, saa kekangalonge, nde konanga noo. ³⁵ Kisha vo mbodja lo kuruse, wakahakana ahondo wande, wakoke owale, kele kene kekateketa Ombutshi akotshami: wakahakana ahondo wami, ndo wakoke owale kandjo kemi. ³⁶ Ko wakakite, ndo wakawendaka. ³⁷ Da menya dikambo da nyoyi kende, wakandika ladiko dote wande:one kele Yeso, kumekanga kase Yuda. ³⁸ Lande wakadje andjakatani ahende lo kuruse, omotshi lo lonya lande la lomi, okina lo lonya lande la lomoso. ³⁹ Ambetshetshi wakotolaka, ndo mbokime lote, ⁴⁰ Wata: wee kekahandjola tepelo, ndo lakalike lo shii shato, yatsha wee weme! naka oleko ona Zambi, holo oma lo kuruse! ⁴¹ Epalanga wa Wakohani, la Endele nombe ndo wazee, wakawole ndovo, ndo wakate: ⁴² Akatsha akina, ndo nde koka ndjatsha nde ndame! naka aleko kumekanga kIzariyele, aholo oma lo kuruse, ndo takowetawo. ⁴³ Akayasha le Zambi; na Zambi otshungole kakiye, naka aleko lo mbolanga. ne da akate: ndeko ona Zambi. ⁴⁴ Andjakatani, wakadje lande lo kuruse, wakotole woho wako wame. ⁴⁵ Tate eshidi esamalo polo eshidi divwa, didjima dakayala la kete. ⁴⁶ Ndo otsha lo eshidi divwa, Yeso akawana la doyi da kudu: Eli, Eli, lama sabachthani? mbuta ate: Zambi kemi, Zambi kemi, loote wana amboyosokola? ⁴⁷ Amotshi wane watshi lanoo, wakoke, wakate; ambele Eliya. ⁴⁸ Ndo kako omotshi lewo akalawo da mbosa eponge, kekandaloda la wana, ndo, akahane lo losondjo, akawosha dande noo. ⁴⁹ Koko akina wakate: tshika, tende naka Eliya akoya le ndjowotsha. ⁵⁰ Yeso akade lokina doyi da woke, ndo akakaloya nyuma. ⁵¹ Ndo nyende, dihondo da lo tepelo dakahandjo lahende, tate lediko polo leese, kete kekadidima, wade wakatete, ⁵² Awombo wakafo, ndo efula kelemba wekilami wane wakavu wakolo. ⁵³ Wakatombe lawaombo, kishha mbolo ke Yeso, wakakaloya lo ngelo kekila, ndo wakatanemo oloyi wa woke wato. ⁵⁴ Olambodi ndo wane watshi lande da nama Yeso, wakeni adidimu wa kete ndo kene kekakomi, wakandama la woma wefula, ndo wakate: mete mete, one oto atshi ona Zambi. ⁵⁵ Atshiko lanoo adimato efula wakendaka letale; wane wakatshinde Yeso tate le Galileya, da mbokambe. ⁵⁶ Lasawo watshi Madiya yose Magadala, Madiya, nyango Yakobo ndo Yoazfu, ndo nyango ana wa Zebede. ⁵⁷ Dikolo dakakoke, oto omotshi kanga ongonyi akakomi oma le Arimatiya, lokombo lande Yozefu, ndonde lokina atshi Ombeki wa Yeso. ⁵⁸ Akatshu le Pilato, ndo akalombe demba da Yeso. ndo Pilato akalamula da mbosha. ⁵⁹ Yozefu akoshi demba, akawombe la dihondo da wema, ⁶⁰ Ndo akadikitsha lo sanduku koyoyo, kene kekandasele lo dive. ko akeda dive da woke lombotwelo ke doombo, ndo akatshu. ⁶¹ Madiya yose Magadala ndo Madiya okina watshi lako, wokiti mbelane la doombo. ⁶² La wediapendju, latshi loshi la kisha nongoswama, epalanga wa Wakohani ndo ase Farisayo wakatshu pamodja le Pilato, ⁶³ Ndo wakawote: Owandji, sho tamboho kene kekate one latshi kodikambo, saa katshinde la koseno: kisha shii shato lakolo. ⁶⁴ Dja didjango okone da doombo dalamami polo loshi lasato, kele Ambeki wande hawoyoya ndjova demba, ndo mbute wodja: ambolo oma lo nyoyi. kene nyoyi kekoleka ketondo koolo. ⁶⁵ Pilato akawate: nyaleko lolami; nyotshu, nyolami oko wokonganyu. ⁶⁶ Wakatshu, ndo wakakite lo doombo oma lo tshimbo yonami, kisha vo diha dive.