¹ Kisha sabato, lokese la loshi latondo la yinga, Madiya yose Magadala ndo Madiya okina wakatshu tenda doombo. ² Ndo nyende, atshi adidimu wa kete wa woke; ne da ondjelo wOwandji wakaholo oma lolongo, akaye ndjonya dive, ndo akakite ladiko. ³ Sura kende ketshi oko sase da wonya, ndo dihondo dande datshi wema oko dunge. ⁴ Anami wakadidima la woma, ndo wakayala oko edo. ⁵ Koko ondjelo akoshi oteketa, ndo akate adimato: lenyu, tanyokake woma; ne da lemi mbeyaka da yaleko lo toni Yeso lakawadje lo kuruse. ⁶ Nde kema lane; nde ambolo, oko akandate. nyoye, nyende fashi kene ketshinde, ⁷ Ndo nyotshu esadisedi nyotote Ambeki wande da nde ambolo lo nyoyi. ndo nyende, akonyokome tondo le Galileya: leko konyowena. nyende, lambonyote. ⁸ Wakamo esadi esadi lo doombo, la woma ndo lolo wefula, ndo wakalawo tota lokumu lololo le Ambeki. ⁹ Ndo nyende, Yeso akaye ndjohomana lawo, ko mbate: lambonyemula. wakasukana da mbokime lekolo wande, ndo wakakolama letondo kende. ¹⁰ Laso Yeso akawate: tanyokake woma; nyotshu nyotote anangemi watshu le Galileya: leko kowomena. ¹¹ Saa ketshiwo lo mboka, ato amotshi walama wakoto lo ngelo, ndo mbute epalanga wa Wakohani kene tshee kekakomi. ¹² Wane, kisha vo pomana vo la wazee ndo mbosa dako, wakasha asoda leemba lakuta, ¹³ Wakawate: nyote: Ambeki wande wakaye lotsho ndjova, saa kekatalalaka. ¹⁴ Ndo naka guvelenele ambeya, takokitshakitsha, ndo sho takonyokaloya sowi. ¹⁵ Asoda wakoshi akuta, ndo wakayele elembe wekawawasha. ndo loso looka lakatawala le ase Yuda, polo ndo lelo. ¹⁶ Ambeki dikumi lotoyi wakatshu le Galileya, lo kidima kene kekawawenya Yeso. ¹⁷ Saa kekawaweni, wakakolama letondo kende. koko amotshi watshi la mashaka. ¹⁸ Yeso, akasuka,a, akatekete okone: mamulaka tshee wakambishama oma lolongo ndo lo kete. ¹⁹ Nyotshu, nyete wedja tshee Ambeki, nyabatiza lo lokombo la mbapa, lona ndo la nyuma kekila, ²⁰ Ndo nyafundishake da nama kene tshee kekamanyote. ndo nyende, ndeko lanyu shii tshee, polo le mwisho wa duniya.