¹ Saa kekamani Yeso teketa eteketa wako tshee akate Ambeki wande: ² Nyumbeyaka da Pasaka kekoyala ambotshikala shii hyende, ndo paka ona oto akotowama da mbidjama lo kuruse. ³ Laso epalanga wa Wakohani ndo wazee wa wodja wakahomana lo seke da ngelo opalanga Kohani, lelewo Kaïfa; ⁴ Ndo wakalamula lo yoho ya munda Yeso lohemba, ndo da mboyakisha. ⁵ Koko wakate: aha loshi la fete, kele tamu hatoyoyala lateyi wa wodja. ⁶ Oko watshi Yeso le Betaniya, lo loodu la Simona kanga sodi, ⁷ Odimoto omotshi akasukana lende, okime poke ke diwomba, katshi la malashi wa beyi kudu; ndo, saa ketshinde lo mesa dande, akohoke malashi lo ote wande. ⁸ Ambeki, wakeni okone, wakomala, ndo wakate: landena ele dimena one oshishelo? ⁹ Otohomba sondja one malashi ke beyi kudu, ko mbisha ase wola akuta. ¹⁰ Yeso, akawende, akawate: loote wana wasoyanyu one odimoto? ambotshe otshaa wa dimena lemi; ¹¹ Ne da nyaleko paka la ase wola lanyu, koko nyu kema lami loshi tshee. ¹² Lo mbute one malashi lo demba dami, lambote lo doombo dami. ¹³ Lambonyote lo mete, fashi tshee lene osambishama lone lokumu lololo, lo duniya tshee, wakoteketa lokina da mboho one odimoto kene kembonotshe. ¹⁴ Laso omotshi lo dikumi lahende, lelewo Yuda Esikariyote, akatshu le epalanga wa Wakohani, ¹⁵ Ko mbuta: alanganyu mbishami, ndo lakonyotowende? ndo wakawosha akuta akumi asato. ¹⁶ Tate keso saa, wakoni daaso dadimena da towa Yeso. ¹⁷ Loshi la mwaza ekate aha wana, Ambeki wakate Yeso, da mbote: lende alangaye sho kokate deshi da Pasaka? ¹⁸ Akakadimula: nyotshu lo ngelo le oto omotshi, ndo nyotowote: mwadimu ate: saa kemi keya suke; lakole Pasaka lakaye lAmbeki wami. ¹⁹ Ambeki wakatshe kene kekawate Yeso, ndo wakatayarisha Pasaka. ²⁰ Dikolo dakakoke, akakite lo mesa nde la dikumi lahende. ²¹ Saa kekawalekaka, akate: lambonyote lo mete, omotshi lateyi wanyu akotowa. ²² Wakandama votshee lokeyi wefula, ndo oto loto akatate la mombola: onde lemi, Owandji? ²³ Akakadimula: one lakatshangi lami lonya lo sahani, oso kotowa. ²⁴ Ona oto akotsho, oko akandandikama loote wande. koko mananu le oto lomalende lakatowe ona oto! otoleka dimena le oto ako totondoto. ²⁵ Yuda, lakotowe, akoshi oteketa ndo mbuta: onde lemi, Rabbi? Yeso akokadimula: wee keta. ²⁶ Saa kekawalekaka, Yeso akoshi okate; ndo, kisha tshokola, akahembola, ndo akasha Ambeki, ata: nyoshi nyole, one kele demba dami. ²⁷ Akoshi lokina kikombe; ndo kisha tshokola, akawasha, ata: nyono nyutshee; ²⁸ Ne da one kele dikila dami, dikila dosanga, dakahandjo le efula, loote wedimanyelo ke pekato. ²⁹ Lambonyote, homono lokina olowa wa lo kene vinnyo, polo loshi lone lomono lokina lanyu lo Dolelo da shemi. ³⁰ Kisha vo memba esambo, wakatsho lo kidima kolova. ³¹ Laso Yeso akawate: lakoyala lenyutshee, one otsho, yoho yotakanya; ne da akandikama: lakokomola onami wekoko, ndo ekoko wa loloyi wakohandjone. ³² Koko, kisha lomolo oma lo nyoyi, lakonyokome tondo le Galileya. ³³ Petro, akoshi oteketa, akawote: saa kekona koyoyala leso tshee yoho yotakanya, wee hoyala poo lemi. ³⁴ Yeso akawote: lambokote lo mete, one otsho, tondo ke koko mbeka, oko manguna lokina mala shato. ³⁵ Petro akokadimula: naka pombamaka vo laye, hamokanguna. ndo Ambeki tshee wakate yoho yako yame. ³⁶ Loko leteyi, Yeso akatshu lawo lo fashi kelewo Getesemani, ko akate Ambeki: nyokite lane, saa kembomotsho etale da nomba. ³⁷ Akoshi Petro ndo lana ahende wa Zebede, ndo wakatate mboka oketi ndo ndela. ³⁸ Akawte laso: anima wami waleko lokeyi polo lo nyoyi; nyotshikale lane, ndo nyokesha lami. ³⁹ Ko, akatshu yema letondo, akakole ote, ndo nomba okone: shemi, naka aleko dimena, kene kikombe keyale etale lami! koko, aha kene kelangami, koko kene kelangaye. ⁴⁰ Ko akaye le Ambeki, wakandatani woshami, ko akate Petro: hanyokoki kesha saa otoyi lami! ⁴¹ Nyokesha ndo nyolombe, kele hanyoyoko lohemba; nyuma keleko kako, koko demba daleko wodu. ⁴² Akatshu etale lokina mala kehende, ndo akalombe okone: shemi, naka aleko dimena kene kikombe ketshu etale aha lemi noo, lolango laye latshemi! ⁴³ Akakaloya, ndo akatani lokina woshami; ne da washo wawo watshi wodu. ⁴⁴ Akatshike, ndo, akatshu etale, akalombe mala ke sato, akakaloya eteketa wako wame. ⁴⁵ Ko akatshu le Ambeki wande, ndo akawate: nyamboshama kakiye, ndo nyu nyambomuya! nyende, saa keya suke, ndo ona oto ambotowama lanya wa akanga wa pekato. ⁴⁶ Nyemale, totshu; nyende, one lotowa ambosukana. ⁴⁷ Oko wakandateketa, lokina heni Yuda otoyi omotshi lo dikumi l'ahende akakomi ndo la oloyi efula wa asoda la tokuwa ndo l'akonga, waka tomama le elombodi wa Wakohani ndo le epalanga wa ngelo. ⁴⁸ Ndo one lak'otewe aka washa halama: one lomo busu oko kele nde, nyo wonde. ⁴⁹ Kako, akasukana le Yeso mala otoyi aka wotee: akemwe! Olombodi! ko ako busu. ⁵⁰ Yeso aka wotee ate: ongenyi ami, kene kamboya laa landjotshee, tsheto. ko ato wako waka sukana waka dje Yeso anya ndo waka wonde. ⁵¹ Ko nyende omotshi wa lateyi wa Yeso akoshi lonya ko momola lokuwa: ko aka kote okambi welombodi wa Wakohani, ko akahembola toyi. ⁵² Ko Yeso aka wotee ate: kaloya lokuwa lo yombo; neda one tshee ladana la yombo akovo la yombo. ⁵³ Onde we fonyaka da lemi hakoke nomba Mbapa da nde tomemi oloyi Wandjelo ndekana dikumi l'ahende lo saa kene? ⁵⁴ Ko naka osoku nayoho yokotshama wandikelo wakate da kene kahomba ndjala naa ⁵⁵ Ko lo saa keko, Yeso ka tee oloyi: nyu nyamboya, oko le otomboki, la tokuwa ndo la teengu, da nyu nyo munda. leki lanyu shii tshee kita lateyi wanyu, ombetsha wa lo tepelo, ndo nyu hanyomundi. ⁵⁶ Koko kene tshee kembokoka le mwisho ne da miandiko Ambutshi kotshama. ko Ambeki tshee wakohandjo, ndo ndawo tute ⁵⁷ Wane waka nde Yeso wakotole le dikumanyi da ngelo Kayase, lene akahomana Endele nombe la dikumanyi lene aka wahomana. ⁵⁸ Petero akoyele l'etatelo polo looko la Kohani keladiko, akoto ndo kita l'ekambi, da menda na woho wowokomee. ⁵⁹ Wakohani ndo mbaraza ke tumiladi wakoni ato wane waka koke mbuta kashi da vo mboyaka. ⁶⁰ Koko vo kotana, kanga wakaye wa temo le mwisho wakaye ahende, ⁶¹ Wata vate: one akate: lemi koka nukola telepo ka Zambi, ndo mbika lo shii shato. ⁶² Kohani ke ladiko akemala, ko mbotee: we hakadimola kaanga? na kene kembokitsha ato lo tshimbo yaye? ⁶³ Yeso aka tshikala kii. ndo Kohani ke ladiko, akoshi oteketa, akawote: lambosengasenga, lote wa Zambi. ⁶⁴ Yeso aka kadimola ate: oko wataye. Ko laso lambonyote, nyu malo shosanya kena ona oto okiti lo lonya la pami la Zambi, ndo nyu lo wange wa l'olongo. ⁶⁵ Ko kohani akaate ahondo wande, wata: aka tole! kekona kele keso l'ohemba wa temo? ndo nyu nyamboka toyi kenyu kefona. ⁶⁶ Waka kadimola: aleko koka la nyoyi. ⁶⁷ Leko la diko, waka wotee soyi l'longi, ko wako komola angumi ndo ehafu ⁶⁸ Wata: Kristo, tabiri; otote okokomodi. ⁶⁹ ko laso Petero, aki kita landja lo seke. okambi omotshi w'odimoto aka sukana tsha lende ko mbote: ndo we, omotshi la l'oloyi wa Yeso ya le Galileya. ⁷⁰ Koko nde akawanguna le tondo keto tshee, ata: haleye kene konaye mbuta. ⁷¹ Oko waka ndatatshokaka tsha lo lokuke, okina okambi w'odimoto aka weni ko nde mbote; one akiko ndo nde la Yeso yose Nazarete. ⁷² Aka wanguna lokina, alapa: haleye osoto. ⁷³ Ko malaso, wane weki lano, waka sukana, wate Petero: mete ndo we omotshi lawo, ne da oteketa waye fonaka lawo. ⁷⁴ ko aka kite tate mbidja mananu ndo akalape: haleye osoto. kako ndo koko kekeke. ⁷⁵ Ko Petero akoho eteketa wa Yeso wakandawote: tondo ke koko mbeka, okomanguna mala shato. ko nde aka tombe ata lele, efula.