¹ Ne da Dolelo da l'olongo daleko lo fona olombodi wa loodu lakatombe makopendju, da mamba asolemu vinyo yande. ² Akokana lawo dikuta otoyi lo loshi, ndo akatomaka lo vinyo yande. ³ Akatombe tsha lo eshidi esato, ndo akeni wakina wakiko kako hawotshe ki yango. ⁴ Akawate: nyotshu ndonyu lo vinyo yami, ndo lakonyosha kene koleki dimena. ndo kakatshu leko. ⁵ Akatombe lokina tsha lo eshidi esamalo ndo otsha lo eshidi divwa, ko akatshe woho wako. ⁶ Akatombe lo eshidi dikumi l'otoyi, akatani akina waki kanoo, ko akawate: lote wana emalanyu lane loshi l'otondo aha tshee kodikambo? ⁷ Wakokadimula: mbuta ate ko oto lo taambi. nyutshu ndo nyu lo vinyo yami, kekanawate. ⁸ Dikolo dakakoke, okambi wa vinyo akate okimanyedi wande: ele asolemu, ndo dipawo malipo wawo, tate wa mwisho polo watondo. ⁹ Wane weki l'eshidi dikumi l'otoyi wakaye, ko wakalongola oto l'oto dikuta dande. ¹⁰ Wako watondo kisha, wakafonya nongola djekaleka; koko wakalongola ndovo oto l'oto dikuta otoyi. ¹¹ Kisha nongola dikuta dako, wakangunanguna lote w'oko okambi wa loodu, ¹² Ndo mbuta: wane wa mwisho wakakambi oshidi otoyi, ko ombowasha sawasawa laso, sho wane wakavudiya olembi wa loshi ndo yani. ¹³ Akakadimula omotshi lasawo: ongenyi wami, hakanya; hanyokani lami lo dikuta otoyi? ¹⁴ Osa kene kele keye, ndo tshoka. lakosha one efula tondo keye. ¹⁵ Kema dikimo da lemi tshee yango yami kene kelangami? kana we menaka koolo soo kele ndjale dimena? - ¹⁶ Okone wa mwisho wakoyala wa tondo, ndo wa tondo wakoyla wa mwisho. ¹⁷ Saa kekadee Yeso le Yerusalema, akakoshi Ambeki dikumi dako l'ahende, ko akawate lo mboka: ¹⁸ Enda, tambotsho lediko ke Yerusalema, ndo ona oto akotowama le Wakohani ndo wa Endele nombe. wakolambola lo nyoyi, ¹⁹ Ndo wakolambola le apagani, lote wa vo mbola, mbokomola adanga, ndo mbodja lo kuruse; ndo loshi l'asato akolo. ²⁰ Okone nyangende la Zebedeyo akasukana le Yeso l'ana wande, ko akakolama, da mbolomba. ²¹ Akawote: nakelangaye? dikimo, kekanawote, ane ana wami, wane, wakite, lo Dolelo daye, omotshi lo lonya laye la lomi ndo okona lo lonya laye la lomoso. ²² Yeso akokadimula: we heye kele kelombaye. nyu koka noo kikombe kene kehombami noo? sho kokaka noo, kekawokadimula. ²³ Ko akakadimula: aleko mete da nyakono kikombe kemi; koko lo kene kendana la kita lo lomi ndo lo lomoso lami, keso hendana lami, ndo kekoshama le wane mbapa kemi akalongosole. ²⁴ Wane dikumi, kakawoke osoku, wakayala l'okeyi le ako analengo ahende. ²⁵ Yeso akawele, ko mbuta: nyumbeyaka da owandji wa ngelo lombawaheme, ndo epalango waleko lo mbakitshakitsha. ²⁶ Hoyala yoho yako yame lateyi wanyu. koko oto tshee lalanga ndjala opalanga lasanyu, ayale okambi wanyu; ²⁷ Ndo oto tshee lalanga ndjala la tondo lasanyu, ayale ohombo wanyu. ²⁸ Loko kele ona oto akaye,aha da ndjokimanyiyama, koko da kimanyiya ndo mbisha loseno lande oko woshasha wato efula. ²⁹ Lo saa kekawatombe oma le Yeriko, leemba l'ato wakayele Yeso. ³⁰ Ndo enda, akanga wa dimi ahende, wakakite l'omamu wa mboka, ndo wakawana: otoke kangi, Owandji, ona Davidi! ³¹ Oloyi wato wakashimbe, da mbalembohada; koko wakawana la kudu efula: otoke kangi, Owandji, ona Davidi! ³² Yeso akemala, akawele, ndo mbuta: alanganyu lemi nyotshee? ³³ Akawoke kangi, Yeso akakime washo wawo; ndo kakiye wakakeni, ndo wakoyele.