¹ Saa kekawasukana le Yerusalema, ndo wakakomi le Betafagiya, otsha lo kidima koliva, Yeso akatomi Ambeki ahende, ² Akawate; nyotshu lo shunga kele letondo kenyu; nyakotana lano osongo wa punda okelekami, ndo punda lande; nyotakelekole, ndo nyombelawo. ³ Naka oto omotshi nyote dikambo dimotshi, kanyokadimule: Owandji aleko laa dihombo. ndo kako akatshike watshu. ⁴ Koko, keso kekakomi kele kekotshami kene kekate Ombutshi: ⁵ Nyote osekaseka wa le Siyona: enda, kumekanga kende amboya leye, ndola la kangi, ndo ahemi ladiko da punda, ladiko da punda, ona punda. ⁶ Ambeki wakatshu, ndo wakatshe kene kekawate Yeso. ⁷ Wakela ona punda ndo punda, wakakitsha ladiko dawo ahondo wawo, ndo wakokitsha ladiko. ⁸ Efula keto wa loloyi wato wakale ahondo wawo lo mboka; akina wakahembola tahi yesongo, ndo ndola lo mboka. ⁹ Wane watshi letondo ndo wane wakatayelaka Yeso wakawanaka: Hosanna le okana wa Davidi! otshokwami le one laya lo lokombo lOwandji! Hosanba lo fashi yalediko efula! ¹⁰ Saa kekandoto le Yerusalema, ngelo tshee kekaambe, ndo wakataka: naa one nde naa? ¹¹ Oloyi wato wakakadimula: Yeso, Ombutshi, wose Nazareta le Galileya ¹² Yeso akoto lo tepelo ke Zambi. akatshanya wane tshee wakasondjaka ndo sombaka lo tepelo; akatsholaka mesa wa amengodi wa falanga, ndo dee asondji wa tokudumba. ¹³ Ndo akawate: akandikama: lo loodu lami lakelame lo loodu la dombelo. koko nyu, nyambolitshe lokoto la wevi. ¹⁴ Akanga wa dimi ndo wane watshumbe wakasukana lende lo tepelo. ndo akakonola. ¹⁵ Koko epalanga wa Wakohani ndo Endele nombe wakomala, lo mena akambo wa dimena wakandatshe, ndo ana wakawanaka lo tepelo: Hosanna le okana wa Davidi! ¹⁶ Wakawote: wee lomboka kene ketawo? mete, kekakadimula Yeso. nyotasomaka eso eteketa: ombosa lotombo oma lonyo wana ndo le wane wele lalemba? ¹⁷ Ndo, akatshike, akatombe lo ngelo da tsho otsha le Betaniya, leko kekandatolala. ¹⁸ La pendju, lokaloya oma lo ngelo, atshi la ndjala. ¹⁹ Akeni fingo lo mboka, akasukana; koko akatani paka akatshi, ndo akawote: pondjo aha olowa to leye! ndo kako fingo yakomi. ²⁰ Ambeki, wakeni okone, wakambe, ndo wakate: okonde wele kene fingo amboma saa keko keme? ²¹ Yeso akakadimula: lambonyote lo mete, naka nyaleko la mbetawo ndo naka nyu kema la mashaka, aha kitoo nyakotshe kene kembotshema le fingo, koko saa konyote kene kidima: one omalane ndo yadja loduwa, keso kekotshema. ²² Kene tshee konyolomba la mbetawo lo dombelo, nyakopata. ²³ Yeso akatshu lo tepelo, ndo, saa kekandafundishaka, epalanga wa Wakohani ndo wazee wa wodja wakaye ndjowote: la lowandji lakona latsheye ane akambo, ndo akakosha dikoka? ²⁴ Yeso akakadimula: lambonyombola ne dimbola; ndo, naka nyakokadimula, lakonyote ladikoka dakona da tshemi ane akambo ²⁵ Obatizu wa Joani, lende akawaye? oma lolongo, kana oma le ato? koko wakakanyiya okone lasawo; naka sho kadimula: oma lolongo, akotote: loote wana ahanyambetawo? ²⁶ Ndo naka sho kadimula: oma le ato, sho pombaka oloyi wato woma, ne da ato tshee mbosaka Joani Ombutshi. ²⁷ Laso wakakadimula Yeso: hateye. ndo akawate lo mala kende: ndo lemi, hamonyote ladikoka dana datshemi ane akambo. ²⁸ Afonyanyu? oto omotshi atshi lana ahende; ndo, akate latondo, akate: onami, tshoka lelo totumike lo shamba yami ya vinyo. ²⁹ Akakadimula: halande. lemwisho, akatubu, ndo akatshu. ³⁰ Akate oko okina oteketa wako wame. ndo oko ona akakadimula: lambolanga dimena, Owandji. ndo nde kotsho. ³¹ Naa lovo vahende lakatshe lolango la mbapa? wakakadimula: latondo. ndo Yeso akawate: lambonyote lo mete, elambodi welambo ndo akanga wa seka wanyokome tondo lo Dolelo da Zambi. ³² Ne da Joani akaye lenyu lo mboka ke losembwe, ndo nyu kombetawo. koko elambodi ndo akanga wa seka wakawetawo; ndo nyu, wakeni okone, nyu nyukotobu lemwisho da mbetawo lende. ³³ Nyolonge okela okina. atshiko oto omotshi, mwadimu wa loodu, lakone vinyo. akodinge lo lokoto, akatshime hyole, ndo akakosha otshimbedi; ko akafe la tovinyo, ndo akatombe lo wodja. ³⁴ Saa ke dina kekakoke, akatomi ekambi wende lo tovinyo, da ndjolongola olowa wa lo vinyo yande. ³⁵ Enami, watshi kita oma le ekambi wande, wakakomola omotshi, wakadake okina, ndo mbishanya lasato. ³⁶ Akatomi lokina akina asato, woleki leembe ndeka watondo; ndo enami wakatshe yoho yako yame. ³⁷ Le mwisho, akatomi lewo onande, ata: wakolenya onami. ³⁸ Koko, saa kekeni enami ona, wakatane lasawo: nyende ohena; nyoye, todake, ndo toshi lohena lande. ³⁹ Ndo wakawonde, wakosokola landja wa vinyo, ndo wakodake. ⁴⁰ Kakiye, saa koya mwadimu wa vinyo, naa kene kondotshe enami? ⁴¹ Wakokadimula: akada la kele tshee ako ase sowi, ndo akodiha vinyo le enami akina, owasha woho lo saa ke dina. ⁴² Yeso akawate: nyotasomaka lo miandiko kanga loshi otoyi: dive dakawasokola wane wakakaka aya dive dalateyi; oma le Owandji kele keso kekaye, ndo aleko okela lo washo waso? ⁴³ Dako dele, lambonyote, Dolelo da Zambi dakonyokuyama, ndo dakoshama le wodja lotondja elowa. ⁴⁴ One loko lo dive dako akohandjo, ndo one lele dive dakokwe akohandjo. ⁴⁵ Kisha mboka eso ekela, epalanga wa Wakohani ndo ase Farisayo wakoke davo kekataka Yeso, ⁴⁶ Ko wakoni da mbonda; koko wakokaka oloyi woma, loote wakawoshaka Ombutshi.