¹ Lo wonya wako, Ambeki wakasukana le Yeso, ndo mbuta: ele okone oleki opalanga lo Dolelo da l'olongo? ² Yeso, akele ona dikenda, ko mbokitsha lateyi wawo, ³ Ko mbuta: lambonyote lo mete, naka hanyokadimwe nde hanyoyadi oko ana w'akenda, hanyoto lo Dolelo da l'olongo. ⁴ Dako dele, oto tshee loyala l'okitshakitsha oko one ona dikenda akonga kanga loleki opalanga lo Dolelo da l'olongo. ⁵ Ndo oto tshee lalongola lo lokombo lami ona dikenda oko one, amonongola lemi leme. ⁶ Koko, naka oto omotshi ambohenyahenya omotshi l'akenda wane wane wambetawo, otoleka dimena lende mbokeleka yoole lo woodi, ndo mbosokola lomamu wa ndjale. ⁷ Mananu le duniya lote wohenyohenyo! ne da aleko dimena da ohenyohenyo koma; koko mananu le oto lahenyahenya koma! ⁸ Naka lonya laye kana lokolo laye laleko leye yoho yakokosha, hembola ndo sokola etale laye, otoleka dimena leye mboto lo loseno etshumbe kanga soo otoyi, tondo k'ekolo ehende kana anya ahende ko kosokola lo djaa ya pondjo. ⁹ Ndo kana soo daye daleko leye yoho ya kokosha, hatolado, ndo sokolado etale laye; otoleka dimena leye mboto lo loseno, haha kanga soo, tondo kendjala la washo ahende ndo sokoma lo djaa ya Gehena. ¹⁰ Nyoyalami da monyola otoyi wa ane akenda; ne da lambonyote da andjelo l'olongo waleko lo mena saa tshee elongi ke shemi lele l'olongo. ¹¹ Ne da ona oto akaye da ndjotsha one lakashisho. ¹² Afonyanyu? naka oto aleko l'ekoko lokama, ko otoyi lasawo amboshisho, nde hotshika akumi divwa la divwa lo kidima, da tsho letona oko otoyi lakashisho? ¹³ Ndo naka ambowoshola, lambonyote lo mete, akoleka mboka olo lote wande tondo ke ako akumi divwa la divwa waki koshisho. ¹⁴ Yoho yako, kema lolango la shenyu lele l'olongo lakoka kombola otoyi wa ane akenda shisho. ¹⁵ Naka onangeye ambotshe pekato, tshoka ndo towenya lasaye we lande ko pee. naka ambokoke, ombokondja onangeye. ¹⁶ Koko, naka hakoke, tshoka we l'oto kana l'ato ahende, kele dikambo tshee d'ete l'oteketa w'atemo ahende kana asato. ¹⁷ Kana amboseka mbaoke, tote kanisa; ndo kana amboseka ndo lo kanisa, yala lende oko opagani ndo oko ose wodja. ¹⁸ Lambonyote lo mete, kene tshee konyokeleka lo kete kekokelekama ndo l'olongo, ndo kene tshee konyokelekola lo kete kekokelekoma ndo l'olongo. ¹⁹ Lambonyote lokna, naka ahende lasanyu wambokana da nomba yango miotshi, shemi lele l'olongo akowasha yo. ²⁰ Ne da lene ele ahende kana asato wambohomana lo lokombo lami, ndeko lateyi wawo. ²¹ Laso, Petero akasukana lende, ko mbuta: Owandji, lama nywana yomodimanyiyaka onangemi, lo saa konomungeka? onde polo mala esambele? ²² Yeso akawote: lemi hakote polo mala esambele, koko polo mala akumi esambele ndoda l'esambele. ²³ Dako dele, Dolelo da l'olongo daleko lo fona l'owandji lalanga dipa ekambi wande. ²⁴ Lo saa kedande, wakawela oto otoyi lakahombe nongola talata midiyo dikumi. ²⁵ Oko wele nde kema la yango ya dipa, owandji wande akalamula da sondja, ndame, wadende, ana wande, ndo kene tshee kekinde laa, ndo deni dakashile. ²⁶ Oko okambi, akayasokola lo kete, akake adwe le tndo kende, ko mbuta: okonge yema, ndo lakokodipa tshee. ²⁷ Akawoke kangi, owandji wa oko okambi akotshike atshu, ndo dimanyiya diko deni. ²⁸ Kesha nde tomba, oko okambi akahomana laa wonyande lakanahekaka akuta dikumi. akaweme ndo mbohenyahenya, ndo mbote: dipa kene kele kemi. ²⁹ Wonyande, akayakosha lo mete, ko mbosengasenga, ata: ovumidiya, ndo lakokodipa. ³⁰ Koko okokina konanga, ndo akatshu lande towodja lo muyololo, polo edja kekanodipe kene keki kende. ³¹ Wanyande, wakeni kene kekakomi, waki la kangi eula, ndo wakatshu totee owandji wawo kene tshee kekete. ³² Laso owandji akele oko okambi, ko mbote: okambi wa koolo, lakakodimaniya deni dakiye laa tshee, lote okasengasenga; ³³ We kopomba monga la kangi ke wonyaye, oko wakime la kangi keye? ³⁴ Ko owandji wande, akomala, akokimo l'anya w'atomboki, edja polo lakanamani la dipa kene tshee kekinde laa. ³⁵ Okone shemi lele l'olongo kondotshe, naka oto l'oto lasanyu hadimanyiya onangende l'otema wande tshee.