¹ Laso ase Farisayo ndo Endele nombe wakaye le Yerusalema le Yeso, ndo wakawote: ² Loote wane wele Ambeki waye waholenya loshidi la wazee? ne da hawosole anya, saa kelewo dango dande dawo. ³ Akakadimula: ndo nyu, loote wana wahanyalenya amuri wa Zambi ndeka loshidi lanyu? ⁴ Ne da Zambi akate: olenya sheye ndo nyangeye; ndo: kanga lodja shende kana nyangende mananu akoyala la dilanya da nyoyi. ⁵ Koko nyu, nyaleko lo mbuta: kanga lote shende kana nyangende: kene kekamahombe kokimanyiya aleko woshasha le Zambi, ⁶ Kema nenya shende kana nyangende. nyamboseka okone oteketa wa Zambi ndeka loshidi lanyu. ⁷ Wanafiki, Ezayi akatabiri dimena lenyu, saa ketande: ⁸ Wodja wone nenyakami lelomo, koko otema wande etale lami. ⁹ Anyanya kenenyawo, lo fundisha akambo wane wele amuri wato. ¹⁰ Akele lende oloyi wato, akawote: nyolonge, ndo nyoke. ¹¹ Aha kene koto lonyo kelanya oto; koko kene ketomba oma lonyo, keso kelanya oto. ¹² Laso Ambeki wande wakasukana, ko wakawote: wee mbeyaka da ase Farisayo wakengengi lo eteketa wakawoki? ¹³ Akakadimula: osongo wone wetshi shemi ke lolongo komone wakonywama. ¹⁴ Nyatshike: dimi lo dimi kokolombonaka; naka dimi ambolombola dimi, wakoko vovahende lo difuku ¹⁵ Petro, akoshi oteketa, akawote: otofafanuwa oso okela. ¹⁶ Ko Yeso akate: ndonyu lokina, nyalekoko koyimba? ¹⁷ Hanyoke da kene tshee koto lonyo tshokaka lotema, ko sokomaka lo fashi ya siri? ¹⁸ Koko kene keya oma lonya ndjakaka oma lotema, ndo keso kelanya oto. ¹⁹ Ne da oma lotema keya tokani ta koolo, ondjakatani, loseka, pekato, kiva, eshuuda wa kashi, emamatani. ²⁰ Oso kele akambo walanya oto; koko nde aha sola anya, halanya oto poo. ²¹ Yeso, akamo oma lanoo; akakaloya lo ngelo ke Tyra ndo Sidona. ²² Ndo nyende, odimoto ose Kanana, lakayayakaka lo leeke lako, akawawane: omboke ketshi, Owandji, okana wa Davidi! osekaseka wami aleko lo soyama lodenge. ²³ Nde kombokadimula kodikambo, ndo Ambeki wande wakasukana, ndo wakawote la kyokomiya: kaloyande, ne da aleko lo mbawana lokongo waso. ²⁴ Akakadimula: lakatomama le ekoko wakashisho lo loodu la Izariyele. ²⁵ Koko akaye ndjoko letondo kende, ata: Owandji, okimanyiya! ²⁶ Akokadimula: kema dimena mbosa okate wana, ko sokole tofofo takenda. ²⁷ Mete, Owandji, kekandate, koko tofofo takenda ndekaka fusa yako lo mesa ke mwadimu wawo. ²⁸ Laso Yeso akawote: odimoto, mbetawo keye keleko woke; atshemi oko walangaye, kokiko saa, osekaseka wande akakono. ²⁹ Yeso akamo kiko faashi, ndo akatshu suke loduwa wa le Galileya. akade lo kidima, akakite. ³⁰ Laso oloyi wato wakayasukanaka djalende, watshi la tshumbe, totshungu, poke, diwete, ndo efula kekoni ekina. wakakitsha lekolo wande, ndo akakonola; ³¹ Lo yoho yele oloyi wato watshi lolo da mena poke wakateketa, diwete dakakono, kuse dakakendakenda, dimi dakeni, ndo wakatombola Zambi kIzariyele. ³² Yeso, akele Ambeki wande, akate: ndeko la kangi le oloyi wone wato; ne da nyende aya shi shato kelewo suke lami, ndo watale koyango yande. halange mbaloya la ndjala, la woma wa kudu hayashila lo mboka. ³³ Ambeki wakawote: okonde wotopata lo kene fashi ke shenga efula kekate da ndotsha one oloyi wa woke wato? ³⁴ Yeso akawambola: ekate engana walenyu laa? esambele, kekawakadimula, ndo yema ya tosese. ³⁵ Laso akakitsha oloyi wato lo kete, ³⁶ Akoshi ekate esambele ndo la see, ndo, kisha mbisha losaka, akahembola ndo akasha Ambeki wanse, da vo kahanye oloyi wato. ³⁷ votshee wakale ndo wakalote, ndo wakatongona tonga esambele ndola too la mbetshi dakatshikala. ³⁸ Wane wakale watshi midiyo nyeyi yapami, aha mbada adimato ndo ana. ³⁹ Le mwisho, akakaloya oloyi wato, akade lo wato, ndo akatshu lo leeke la Magadana.