¹ Lo etena keso, efula k'Ambeki kekongezeka, ase Helenita waka ngunanguna lote wa ase Hebero, lote wadi waki edo wawo wakonyoma l'ohakanyelo wakatshemaka loshi tshee. ² Dikumi l'ahende wakele leemba l'Ambeki, ko wakate: kema dimena da sho tshika oteketa wa Zambi da nenya meesa. ³ Dako dele, analengo, nyosonole lasanyu apami esambele, one lele lenyawo oshuuda wa dimena, wele ndodama la nyuma k'ololo ndo la yimba, ndo takowasha lone lotomu. ⁴ akao sho, takotetemala la ndjasha lo mawombi ndo lo lolombo l'oteketa. ⁵ Loso lokani lakangenyangenya ato tshee. wakasone Etsheni, pami kolodami la mbetawo ndo la nyuma k'ololo, Filipe, Prokore, Nikanor, Timana, Parmena, ndo Nikolas, okonyanya w'Atiyoshiya. ⁶ Wakatondo le Atomami, vo, kisha nomba, wakawahe anya. ⁷ Oteketa wa Zambi wakatawala yema yema, leemba l'Ambeki lakongezeka efula le Yerusalema, ndo oloyi wato wa Wakohani wakalenya olembe. ⁸ Etsheki, ndodama la ketshi ndo la kudu, akatsheka aloho ndo ahindo wa weke lateyi wa wodja. ⁹ Wanyawo amotshi wa lo Sinagogi welewo wane womboteho, wane wa le Syrenana ndo wane wa le Alexandrins, la ase Yuda ya le Sisisiya ndo l'Aziya, wakatate mbidjana tamu lande; ¹⁰ Koko vo kopomba mbidja tamu lo yimba yande ndo lo nyuma kele kekanateketa. ¹¹ Okone wakaanya ato wakate: sho takawoke atondja eteketa wa lotengo le Mose ndo le Zambi. ¹² Ekeda wodja, epalanga ndo Endele nombe, ndo, sokola lende, wakawonde, ndo wakotole le Sanehedrin. ¹³ Wakatondja atemo wa kashi, wakate: one oto hoke tondja eteketa lo fashi k'ekila ndo l'olembe; ¹⁴ Ne da takawoki ata da Yeso, ose Nazareta, akolanya kene fashi ndo akotshikitanya ashidi wane wakatosha Mose. ¹⁵ Wane wakalombolaka lo Sanehedrin wakende Etsheni, elongi kende kekayala oko ondjelo.