¹ Koko pami kimotshi lokombo lande Ananiya, nde la wadende Safiran akasondja yango yande, ² Ndo akakime yema dikuta, wadende akeyaka; ko akembe yema yakatshikala, ndo akakitsha l'ekolo w'Atomami. ³ Petero akawote: Ananiya, lote wane wele Shetani ambolola l'otema waye, polo ndo we senga nyuma k'ololo, ndo we tshikala yema y'akuta wa lo shamba? ⁴ Naka we kosondja, we kotshika? ndo, kisha sondja, dikuta kondjala leye? okonde wakahombi mbidja l'otema waye nye yoho ya doonga? aha ato kekasengi, koko Zambi. ⁵ Ananiya, akoke eso eteketa, akako, ndo akavu. woma w'efula wakoto le anongi. ⁶ Elongololongo, wakemala, wakawombe, wakotole, ndo tokunde. ⁷ Kisha shi shato, wadende akoto, aha lambeya kene kekakomi. ⁸ Petero akawote one oteketa: ombute, onde lo so beyi kekanyasondja shamba? mete, kekandokadimula, lo beyi dako. ⁹ Okone Petero akawote: okonde wakanyokani da pima nyuma k'Owandji? enda, wane wakakudnde omeye wele lo mulango, ndo wakokemba. ¹⁰ Ko kiko saa akako l'ekolo w'Otomami ndo vo. elongololongo, wakakaloya, wakotani wakavwe; wakawembe, ndo mbokunde suke l'omende. ¹¹ Woma wa woke wakoto l'oloyi tshee ndo le wane akoke aso akambo. ¹² Ehindo ndo aloho efula wakatshema lateyi wa wodja oma l'anya w'Atomami. wakemalaka vo tshee lo disoko da Salomona, ¹³ Ndo kanga oto okina ko pima koma lewo; koko wodja wakotombolaka la kudu. ¹⁴ Leemba la wane waketawo le Owandji, apami ndo adimato, wakongezeka yema yema; ¹⁵ Lo yoho yakawelaka ekoni lo mikoba ndo wakakitshaka lo tanda ndo lo totandanda, kele, lo saa kaketetaka Petero, didjima dande yema dakadihaka oto omotshi lasawo. ¹⁶ Efula k'ato lokina wa lo ngelo ya suke la Yerusalema, akela ekoni ndo ato weki l'ohenyohenyo la nyuma ya koolo; ndo vo tshee wakakono. ¹⁷ Koko opalanga Kohani ndo wane tshee waki lande, mbeya tshama k'ase Sadika, wakemala, ndodama la lomendja, ¹⁸ Wakande Atomami, ndo wakawadje lo muyololo wa wodja. ¹⁹ Koko ondjelo w'Owandji, akadihola l'otsho milango wa muyololo, akatondja, ndo mbate: ²⁰ Nyotshu, nyotemale lo tepelo, ndo nyotee wodja eteketa tshee wa lone loseno. ²¹ Kakawoke keso, wakoto tate la pendju lo tepelo, ndo wakatate la fundisha. opalanga Kohani ndo wane waki lande wakokome, wakele Sanihedrina ndo epalanga tshee w'ana w'Izariyele, ndo wakatomi da tona Atomami lo muyololo. ²² Elami, lo saa kekawakomi, vo kombatana lo muyololo. wakakaloya, ndo wakatosha wotelo wawo, ²³ Wata: takatani muyololo dihama dimena, ndo elami letondo ke milango; koko, kisha dihola, sho hatotani kanga oto otoyi leteyi. ²⁴ Lo saa kekawote eso eteketa, kumanda ke lo tepelo ndo Wakohani wakeyaka paka mbaza lote w'Atomami ndo mwisho wa so dikambo. ²⁵ Oto omotshi akaye da ndjo wate: enda, ato wakanyadji lo muyololo waleko lo tepelo, ndo waleko lo fundisha wodja. ²⁶ Okone kumanda akatshu l'elami, ndo mbalombola aha la kudu, ne da waki la woma wa ndjakema la wodja. ²⁷ Kisha vo mbakonya letondo ke Sanehedrina, opalanga Kohani akawambola ²⁸ Lo ene eteketa: sho hatonyoshimbi da nyufundisha la kyokomiya lo loso lokombo? ndo ende, nyamboloda Yerusalema tshee la mafundisho wanyu, ndo nyaleko lo nanga kosha leso dikila d'onoto! ²⁹ Petero ndo Atomami wakakadimula: paka nenya Zambi tondo k'ato. ³⁰ Zambi ke wa sheso akolola Yeso, lakanyadake, lakanyaje yole l'osongo. ³¹ Zambi akawedola lo lomi lande oko ona kumekanga ndo ombitshi, da mbisha Izariyele tubu ndo edimanyelo ke pekato. ³² Taleko atemo w'akombo wako, woho wako wame oko nyuma ko'ololo, kene kele Zambi akasha le wane w'olenya. ³³ Wakomala lo eso eteketa, wakalange da mbadaka. ³⁴ Koko ose Farisayo, lokombo lande Gamaliyele, ombeyi w'olembe, lele wodja tshee wakawokeka, akemala lo Sanehedrina, ndo akadjanga da tondja l'etena ke tshiki Atomami l'andja. ³⁵ Ko akawate: ato w'ase Izariyele, nyoshi yambalo lo kene konyotshe le ane ato. ³⁶ Ne da, kema edja kekatombe Teyida, lakayashaka lo dikambo dimotshi, ndo dele wakahomama otsha lo ato kama nyeyi: wakadake, ndo wane tshee wakayele wakadjama lo muyololo ndo monga ato wanyanya. ³⁷ Kisha nde, Yuday'ose Galileya akenamo, l'etena ke mandikisha kombo, ndo akoshi lo duniya tshama kende: akadake nde lawo, ndo wane tshee wakoyela wakahandjo. ³⁸ Ndo kakiye anen lambonyote ahanyu ndjasha le ane ato, ndo nyatshike watshu. naka one olemu kana ne dikambo deko d'ato, dakohandjo; ³⁹ Koko naka deko Zambi, nyu kema l'akoka wa dihandjola. tanyongake la mananu da ndosha Zambi. ⁴⁰ Wakendana lo lokani lande. ko wakele Atomami, wakakomola adanga, wakashimbe da teketa lo lokombo la Yeso, ndo wakakimo. ⁴¹ Atomami wakakaloya letondo ke Sanehedrina, waki l'olo da nomboshama la tolama lo lokombo la Yeso. ⁴² Ndo loshi tshee, lo tepelo ndo lo vudu, vo konemba la fundisha, ndo sambisha lokumu l'ololo la Yeso Kristo.