¹ Koko Petro la JOani wakateka wodja, Wakohani wakakomi, opalanga wa tepelo, ndo akanga wa kashi, ² Kongenangena lo kene kekawafundishaka wodja, ndo wakasambisha lo lokombo la Yeso elwelo ke lo nyoyi. ³ Wakawande, ndo wakawadje lo muyololo polo la wediapendju; ne da atshi aya la dikolo. ⁴ Koko, efula ke wane wakoke oteketa waketawo, ndo leemba lato lakafule suke midiyo tshanu. ⁵ La wediapendju, ewandji wa wodja, wazee ndo Endele nombe, ⁶ Wakahomana le Yerusalema, la Anna, opalanga Kohani, Kayifa, Joani, Alexandele, ndo wane tshee watshi lo doho kepalanga Kohani. ⁷ Wakakitsha lateyi wawo Petro la Joani, ndo wakawambola: lakoka wakona, kana lo lokombo lana akanyatshe okone? ⁸ Laso Petro, akalodama la nyuma kekila, akawate: ewandji wa wodja, ndo wazee wa lo Izariyele, ⁹ Loote tambomboma lele lo dikamba da dimena dotshami le oto okoni, kele sho tote okonde wakandakonwe, ¹⁰ Nyeye nyutshee, wodja tshee wa Izariyele weye! lo lokombo la Yeso Kristo lose Nazaretha, lakanyadje lo kuruse, ndo lele Zambi akawolola lo nyoyi, omalende kele one oto aya la demba da dimena letondo kenyu. ¹¹ Yeso aleko dive dakasokoma lanyu wakaka, ndo lele laya nguzo ke lateyi. ¹² Ko panda le oto okina; ne da kema leese kolongo lokombo lokina lakashama lateyi wato, lone lakatahombe sho mbika. ¹³ Saa kekaweni mbetawo ke Petro la Joani, wakambe, wakeyaka da watshi ato wa wodja waha la ewo; ndo wakaeye da watshi la Yeso ¹⁴ Koko oko wakawenaka suke lawo oto lakakono, vo kondjala la dikambo da kadimula. ¹⁵ Wakawate da tomba lo Sanehedrina, ndo wakatane lasawo, ¹⁶ Wata: atsheso ane ato? ne da amboloyala le akiti tshee wa lo Yerusalema dihindo dakenyama dakakotshama lawo, ndo sho hatohombe manguna. ¹⁷ Koko, kele dikambo hadoyewoma efula lateyi wa wodja, tatekete la manee da teketa lokina le oto tshee lo lokombo loko. ¹⁸ Ndo wakawaele, wakatekete dimena da teketa ndo fundisha lo lokombo la Yeso. ¹⁹ Petro la Joani wakakadimula: nyolombosha naka aleko losembwe, letondo ke Zambi, da nyolenya tondo ke Zambi; ²⁰ Ne da sho hatohombe tshika teketa kene kekateni ndo kene kekatoke. ²¹ Waka wanee lokina, ndo wakakimo, haweye okonde wa mbakaripiya, loote wa wodja, loote ato tshee wakatombolaka Zambi lo kene kekakomi. ²² Ne da oto latshi kyiko ya ekonwelo wa dihindo atshi la miaka ndeka akumi aneyi. ²³ Kisha mbakimo, wakatshu le wane wele wawo, ndo tasambe kene tshee kekate epalanga Wakohani ndo wazee wawo. ²⁴ Saa kekawalonge, wakaduya le Zambi doyi votshee, ndo wakate: Owandji, wee kekatshe olongo, kete, oduwa, ndo tshee kele loko, ²⁵ Wee kekate oma le nyuma kekila, oma lonyo wa sheso, okambi waye Davidi: loote wana one leemba lateyi wa wedja, ndo tone tokani ta koolo lateyi wa wedja? ²⁶ Kumiyadikanga ya la kete wakemala, ndo kumiyadikanga waka towe le Owandji ndo le okitami wande. ²⁷ Okone, ndo le okilami waye okambi Yeso, lakayadise esoo, Herode ndo la Pose Pilato wakatowe lo kene ngelo la wedja ndo lato wa Izariyele, ²⁸ Da tshe kene kele lonya laye ndo dako daye dakayate tondo. ²⁹ Ndo kakiye, Owandji, enda manee yawo, ndo osha ekambi waye da sambisha oteketa waye la mbetawo ke kudu, ³⁰ La munula lonya laye, kele ekonwelo kayale, ahindo ndo akadikadi, lo lokombo la okilami waye okambi Yeso. ³¹ Saa kekawalombe, fashi kene ketshiwo kekadidima; votshee wakalodama la nyuma kekila, ndo wakasambisha oteketa wa Zambi la mbetawo. ³² Leemba la wane waketawo atshi otema ndo anima otoyi. ko oto lakataka elolo wande wendana lende, koko tshee ketshi lotoyi lasawo. ³³ Atomami wakenyaka la kudu kefula oshuuda wa elwelo wOwandji Yeso. ndo ketshi ke woke ketshi lasawo votshee. ³⁴ Ne da kondjala lateyi wawo kanga ose ngelo: wane tshee watshi la mashamba kana vudu wakasondja, wakoshi abeyi wakawasondja, ³⁵ Ndo wakakitshaka lekolo wa Atomami; ndo wakakahaka le oto loto oko watshinde la lazima. ³⁶ Yozefu, lakelame lAtomami Barnabasi, lata ona losengosengo, Levita, ose Shypra, ³⁷ Akasondja shamba yatshinde laa, akoshi akuta, ndo akakitsha lekolo wa Atomami.