¹ Petero la Joani wakade lo tepelo, lo saa ke dombelo: eki lo saa ke divwa. ² Aki oto omotshi eteku tate mboto, lakawembaka ndo kitsha shii tshee lo mulango ke tepelo lakaweleka Bela, lote akalombaka musaada le wane wakotoka lo tepelo. ³ Oko oto, akeni Petero la Joani wakaye le ndjoto, akalombe musaada. ⁴ Petero popo ndo Joani wakwende tee, ko mbuta: otende. ⁵ Ko akaende tee, akonga da nongola malewo yango miotshi. ⁶ Laso Petero akawote: lemi kema l'akuta, kana fesa; koko kene kele lami, lambokosha: lo lokombo la Yeso Kristo yose Nazareta, emala ndo kendakenda. ⁷ Ko akokime lo lonya la lomi, akawemada. kanoo, ekolo wende ndo asonga wende wakadihama; ⁸ La fumbofumbo akemala, ndo akatate la kendakenda. akoto lo tepelo akendakenda, afumbofumbo, ndo atombola Zambii. ⁹ Oto tshee akaweni akendakenda ndo atombola Zambi. ¹⁰ Wakeyaka da eki one leki kita la Bela mulango wa lo tepelo da mbisha musaada, ndo weki la dambo ndo l'ohokohoko lo dikambo ne dakakome. ¹¹ Oko akiwo ko mumo Petero la Joani, wodja tshee wakaambe wakalawo lewo, lo mulango welewo Salomona. ¹² Petero, lo mena okone, akatee wodja: ato wase Izariele, lote wana wambanyu okone? lote wana atendanyu tee okone, kana nyu fonyaka da kudu keso shwame kana ma lo otakaso waso kekatakendjakendja oko oto? ¹³ Zambi ke Abrahama, Isaka la Yakobo, Zambi ke washeso, akatombola okambi wande Yeso, lakanyatowe ndo manguna letondo ke Pilato, one leki kame da mbokimo. ¹⁴ Nyakanguna ekila ndo kanga mete, nyakalombe da nyosha daaso da ndjaka . ¹⁵ Nyakadake kumekanga ke loseno, lele Zambi akolola ma lo nyoyi; taleko atemo. ¹⁶ Ma lo mbetawo ke lokombo lande kele lokombo lande akafe one lenanyu ndo leyanyu; mbetaw ke lende kekasha one oto kene ekonwelo, letondo kenyu tshee. ¹⁷ Ko kakiye ane, analengo, lemi mbeyaka da nyakatshee aha la mbeya, nyu l'ewandji wanyu. ¹⁸ Koko Zambi akatsha lote akateketa tondo l'onyo w'Ambutshi wande tshee, da Kristo kende akahomba sowa. ¹⁹ Nyoyo tubu okone ndo nyokadimo, kele pekato yanyu yadimo, kele wenya wa keketshama waye ma le Owandji, ²⁰ Ndo ambotoma one lakatomama, Yeso Kristo, ²¹ Olongo ahomba nongola polo lo saa keshikikalelo k'akambo tshee, wele Zambi akateketa edjedja l'onyo w'ekilami Ambutshi wande. ²² Mose akate: Owandji Zambi kenyu akotondja lateyi w'analengo anyu Ombutshi oko lemi, kanyowokele lo kene tshee kondonyote, ²³ Ndo one tshee lahowokela Ombutshi ako akomanema lateyi wa wodja. ²⁴ Ambutshi tshee wakateketa omotshi l'okina, tate Samwele, vo lokina wakateketa lo shii nye. ²⁵ Nyaleko ana w'Ambutshi ndo lo daka da Zambi akalakana la mbapa yanyu, ate Abrrahama, kumbo tshee ya lo kete yakotshokoma lo lolonga laye. ²⁶ Maleye tondotondo kele Zambi, akatondja okambi wande, akotomi da kotshokola, ndonyewola oto l'oto lo pekato yande.